.jpg)
លោក Bruno Le Maire រដ្ឋមន្រ្តីហិរញវត្ថុបារាំង ថ្លែងក្នុងកិច្ចប្រជុំមួយកាលពីថ្ងៃទី៣១ ខែតុលា។ រូបថត AFP
ក្រុងប្រ៊ុចសែលៈ ប្រទេសបារាំងបានឲ្យដឹងកាលពីថ្ងៃអង្គារថា ខ្លួនត្រៀមខ្លួនពន្យារពន្ធឌីជីថល ដែលស្នើឡើងដើម្បីដកហូតពន្ធលើក្រុមហ៊ុនបច្ចេកវិទ្យាធំៗនៅទូទាំងសហភាពអឺរ៉ុប ដើម្បីជួយសង្គ្រោះសំណើពន្ធមួយនេះ ដែលប្រឈមមុននឹងការប្រឆាំងពីប្រទេសអៀរឡង់ និងប្រទេសនៅភាគខាងជើងអឺរ៉ុប។
ទីក្រុងបារីសបាននិងកំពុងជំរុញដៃគូអឺរ៉ុបរបស់ខ្លួនឲ្យដាក់ចេញនូវពន្ធថ្មីមួយដើម្បីធានាថា ក្រុមហ៊ុនបច្ចេកវិទ្យាខ្នាត់ពិភពលោកនានាដូចជា Facebook និង Google បង់ពន្ធដោយស្មើភាព។
ប៉ុន្តែលោក Bruno Le Maire រដ្ឋមន្រ្តីហិរញវត្ថុបារាំងបានថ្លែងថា ប្រទេសបារាំងឥឡូវនេះឯកភាពជាមួយប្រទេសអាល្លឺម៉ង់ថា ពន្ធនេះអាចនឹងពន្យារពេល ខណៈកំពុងស្វែងដំណោះស្រាយអន្តរជាតិឲ្យបានច្រើនជាងនេះ។
កាលពីថ្ងៃចន្ទ សមភាគីអាល្លឺម៉ង់របស់លោក Le Maire គឺលោក Olaf Scholz បានគាំទ្រពន្ធអឺរ៉ុបនេះ ប៉ុន្តែលុះត្រាតែមិនអាចស្វែងរកដំណោះស្រាយទូលំទូលាយជាងនេះ «ក្នុងរយៈពេលមួយឆ្នាំ មួយឆ្នាំកន្លះ» ខាងមុខ។
នៅពេលធ្វើដំណើរទៅដល់កិច្ចប្រជុំរដ្ឋមន្រ្តីហិរញ្ញវត្ថុអឺរ៉ុបក្នុងទីក្រុងប្រ៊ុចសែល លោក Le Maire បានប្រាប់ទីភ្នាក់ងារព័ត៌មាន AFP ថា សេចក្តីព្រាងច្បាប់របស់សហភាពអឺរ៉ុប «គ្រោងនឹងត្រូវអនុម័តនៅខែធ្នូ ឆ្នាំ២០១៨ ប៉ុន្តែយើងបើកចំហឲ្យមានការពន្យារពេលក្នុងការចូលជាធរមានដើម្បីអនុញ្ញាតឲ្យមានពេលវេលាសម្រាប់អង្គការ OECD ធ្វើសំណើច្បាប់មួយដែលមានលក្ខណៈទូលំទូលាយជាងនេះ។
លោក Le Maire បានថ្លែងថា៖ «មិនមានការខ្វែងគំនិតគ្នាជាមួយលោក Scholz អំពីបញ្ហានេះទេ។ មានភាពលំបាកបច្ចេកទេសដែលត្រូវដោះស្រាយ ហើយយើងត្រូវតែដោះស្រាយវាក្នុងរយៈពេលបួនសប្តាហ៍ខាងមុខ»៕ AFP/PS
