.jpg)
រថភ្លើងដឹកកុងត័ន័រចូលចតនៅស្ថានីយកុងត័ន័រនាទីក្រុងវូសាន ខេត្តហ៊ូប៉ី ប្រទេសចិន។ រូបថត People's Daily
ក្រុងប៉េកាំងៈ ពាណិជ្ជកម្មបរទេសរបស់ប្រទេសចិន នឹងរក្សាបានកំណើនថេរក្នុងឆ្នាំ ២០១៨ ខណៈដែលសេដ្ឋកិច្ចរបស់ប្រទេសនេះបានបង្ហាញលទ្ធផលថេរ ក្នុងគ្រាដែលភាពមិនច្បាស់លាស់ខាងក្រៅកំពុងកើនឡើង។ នេះបើយោងតាមរបាយការណ៍ដែលចេញដោយក្រសួងពាណិជ្ជកម្ម។
របាយការណ៍នេះបានឲ្យដឹងថា ពាណិជ្ជកម្មបរទេសរបស់ចិនបានកើនឡើងយ៉ាងលឿននៅក្នុងពេលបីត្រីមាសដំបូង។ ពាណិជ្ជកម្មទំនិញរបស់ប្រទេសនេះបានកើនឡើង ១១,១ ភាគរយធៀបនឹងឆ្នាំមុនដល់ ២៧,៨៨ ពាន់ពាន់លានយន់ (ប្រមាណ ៤ ពាន់ពាន់លានដុល្លារអាមេរិក) នៅក្នុងរយៈពេល ១១ ខែដំបូងនៃឆ្នាំនេះ។ នេះបើតាមទិន្នន័យគយចិន។
ការនាំចេញបានកើនឡើង ៨,២ ភាគរយធៀបនឹងឆ្នាំមុនដល់ ១៤,៩២ ពាន់ពាន់លានយន់ក្នុងរយៈកាលពីខែមករាដល់វិច្ឆិកា ខណៈការនាំចូលបានកើនឡើង ១៤,៦ ភាគរយដល់១២,៩៦ ពាន់ពាន់លានយន់ ដោយជួយឲ្យចិនទទួលបានអតិរេកពាណិជ្ជកម្មចំនួន ១,៩៦ពាន់ពាន់លានយន់ ដែលថយចុះ ២១,១ ភាគរយ។
ទោះយ៉ាងណាក្តី ក្រសួងពាណិជ្ជកម្មចិនបានឲ្យដឹងថា កំណើនពាណិជ្ជកម្មបរទេសនេះ អាចនឹងថមថយវិញ ដោយសារមូលដ្ឋានប្រៀបធៀបខ្ពស់ក្នុងអំឡុងរយៈពេលដូចគ្នាកាលពីឆ្នាំមុន។
របាយការណ៍ដដែលនេះបានបន្តថា សេដ្ឋកិច្ចរបស់ចិនបច្ចុប្បន្នបានបង្ហាញលក្ខខណ្ឌអំណោយផលជាច្រើនក្នុងការរក្សាបានកំណើនកម្រិតមធ្យមខ្ពស់ ហើយឈានទៅរកកម្រិតមធ្យមទៅកម្រិតខ្ពស់ ដោយធ្វើឲ្យមានមូលដ្ឋានរឹងមាំសម្រាប់ការអភិវឌ្ឍពាណិជ្ជកម្មបរទេស។
មូលដ្ឋាននៃការអភិវឌ្ឍសេដ្ឋកិច្ចរបស់ចិននៅតែមានស្ថិរភាព និងវិជ្ជមានក្នុងរយៈកាល ១១ ខែកន្លងមក។ ផលិតផលក្នុងស្រុកសរុបរបស់ប្រទេសចិនបានកើនឡើង ៦,៧ ភាគរយក្នុងរយៈកាល ៣ ត្រីមាសដំបូងក្នុងឆ្នាំនេះ ធៀបនឹងរយៈពេលដូចគ្នាកាលពីឆ្នាំមុន ដែលខ្ពស់ជាងទិសដៅរបស់រដ្ឋាភិបាលដែលមានតែ ៦,៥ ភាគរយ៕ People’s Daily/PS
