.jpg)
កម្មកររ៉ែលើកបង្ហាញត្បូង Ruby។ រូបថត AFP
ក្រុងអ៊ីស្លាម៉ាបាដៈ ពាណិជ្ជករប៉ាគីស្ថានជឿថា ការនាំចេញត្បូងមានតម្លៃ និងគ្រឿងអលង្ការពីប្រទេសប៉ាគីស្ថានដែលសម្បូរត្បូងទៅកាន់ប្រទេស ចិន នឹងជួយប្រទេសនេះឲ្យបង្កើតប្រាក់ចំណូល។ នេះបើយោងតាមសេចក្តីរាយការណ៍របស់ប្រព័ន្ធផ្សព្វផ្សាយក្នុងស្រុក។
ថ្លែងនៅគណៈកម្មការលើកកម្ពស់ការនាំចេញនៃសភាពាណិជ្ជកម្ម និងឧស្សាហកម្មរួមគ្នារវាងចិន-ប៉ាគីស្ថាន (PCJCCI) លោក Zarak Khan ប្រធាន PCJCCI បានថ្លែងថា ប្រទេស ចិន គឺជាអ្នកប្រើប្រាស់ត្បូង និងគ្រឿងអលង្ការធំបំផុតក្នុងពិភពលោក ហើយប៉ាគីស្ថានដែលជាប្រទេសមានកំណប់រ៉ែត្បូងបំផុតទី ៥ ក្នុងពិភពលោកអាចទាញយកសក្តានុពលពីទីផ្សាររបស់ចិន។
ក្រៅពីមានត្បូងច្រើន ប៉ាគីស្ថានក៏មានត្បូងយូនីកមួយចំនួនផងដែរក្នុងពិភពលោករួមទាំងត្បូង Pink Topaz និងត្បូង Kashmir Ruby ដែលមានឈ្មោះល្បីដោយសារពណ៌ និងសម្រស់របស់វានៅទីផ្សារអន្តរជាតិ។ ត្បូង Pink Topaz ក៏ត្រូវបានចាត់ទុកថាជាត្បូងមួយក្នុងចំណោមត្បូងរ៉ែមានតម្លៃខ្ពស់បំផុតនៅក្នុងពិភពលោកផងដែរ។
ប្រទេសប៉ាគីស្ថានមានសក្តានុពលធ្វើអាជីវកម្ម និងនាំចេញត្បូង Ruby ចំនួន ៨០០ ០០០ ការ៉ាត់ ត្បូង Emerald ចំនួន ៨៧ ០០០ ការ៉ាត់ និងត្បូង Peridot ចំនួន ៥ លានការ៉ាត់ ប៉ុន្តែទិន្នផលត្បូងមានកាន់តែទាប ដោយសារកង្វះជំនាញបច្ចេកវិទ្យា និងចំណេះដឹងសម្រាប់ការកែច្នៃរ៉ែត្បូងទាំងនេះ។ នេះបើយោងតាមលោក Zarak Khan។
ប៉ាគីស្ថានក៏មិនអនុវត្តសេវាតម្លៃបន្ថែមផងដែរចំពោះត្បូងកែច្នៃរួច ដោយសារកង្វះឧបករណ៍កាត់ និងដុសខាត់សមរម្យ៕ People''s Daily/KC
