.jpg)
ពិព័រណ៍ពាណិជ្ជកម្មផលិតផលខ្មែរ នាំចេញ-នាំចូល លើកទី ១៣ កម្រិតអន្តរជាតិនៅទីក្រុងកោះពេជ្រ។
ភ្នំពេញៈ ពិព័រណ៍ពាណិជ្ជកម្មផលិតផលនាំចេញ នាំចូល របស់កម្ពុជា នឹងនាំយកឱកាសកាន់តែច្រើនសម្រាប់ផលិតផលក្នុងស្រុក ដូចជាផលិតផលកសិកម្ម ដើម្បីចូលទីផ្សារអន្តរជាតិ ខណៈព្រឹត្តិការណ៍នេះ គឺជាវេទិកាមួយ ដើម្បីទាក់ទាញក្រុមវិនិយោគិនបរទេសកាន់តែច្រើនមកកម្ពុជាផងដែរ។ នេះបើយោងតាមក្រសួងពាណិជ្ជកម្ម។
ពិព័រណ៍ផលិតផលនាំចូល និងនាំចេញ រយៈពេល ៤ ថ្ងៃ លើកទី ១៣ ដែលបានបើកកាលពីថ្ងៃសៅរ៍ នៅកោះពេជ្រ មានបំណងបង្ហាញផលិតផលក្នុងស្រុក និងការលើកកម្ពស់ឱកាសនាំចូល និងនាំចេញ។
ក្នុងព្រឹត្តិការណ៍នេះ មានស្ដង់បង្ហាញផលិតផលចំនួន ២៧២ កន្លែង មកពីសហគ្រាសក្នុងស្រុក ក្រុមហ៊ុន និងមន្ទីរពាណិជ្ជកម្មខេត្ត និងការចូលរួមពីប្រទេស ថៃ ចិន កូរ៉េខាងត្បូង ជប៉ុន វៀតណាម ឥណ្ឌូនេស៊ី ម៉ាឡេស៊ី សិង្ហបុរី អាមេរិក ឡាវ ព្រមទាំងមីយ៉ាន់ម៉ាផងដែរ។
លោក ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម បានឲ្យដឹងថា ពិព័រណ៍ពាណិជ្ជកម្មប្រចាំឆ្នាំ មានបំណងលើកកម្ពស់ពាណិជ្ជកម្ម និងការវិនិយោគ ជាពិសេសសកម្មភាពនាំចេញ ទៅដល់ទីផ្សារអន្តរជាតិ ដែលរួមចំណែកដល់ការអភិវឌ្ឍសេដ្ឋកិច្ចកម្ពុជា។
លោកបានថ្លែងថា៖ «ព្រឹត្តិការណ៍ពាណិជ្ជកម្មនេះ នឹងបង្កើតឱកាសកាន់តែច្រើន និងឥទ្ធិពលដ៏រឹងមាំ ដល់សកម្មភាពជួញដូរក្នុងស្រុក នៅតាមបណ្ដាខេត្ត និងបង្កើតទំនាក់ទំនងពាណិជ្ជកម្ម រវាងពាណិជ្ជករកម្ពុជា និងពាណិជ្ជករបរទេស»។
លោកបន្ថែមថា ពិព័រណ៍ពាណិជ្ជកម្មនេះ បានតភ្ជាប់ការផ្គូរផ្គងពាណិជ្ជកម្ម សម្រាប់ពាណិជ្ជករកម្ពុជា និងពាណិជ្ជករអន្តរជាតិផងដែរ។
រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ កម្ពុជា ដែលបានចូលរួមក្នុងការបើកពិព័រណ៍នេះ បានឲ្យដឹងថា កម្ពុជាត្រូវបានចាត់ទុកថាជា បេះដូងនៃអាស៊ាន សម្រាប់ការវិនិយោគប្រកបដោយសក្ដានុពល។
លោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា កម្ពុជា គឺជាបេះដូងដ៏សំខាន់មួយ សម្រាប់ឱកាសពាណិជ្ជកម្មអាស៊ាន។
លោកបានថ្លែងថា៖ «ប្រទេស កម្ពុជា គឺជាទីតាំងដ៏សំខាន់សម្រាប់អាស៊ាន ដែលបើកចំហឱកាសសម្រាប់ពាណិជ្ជកម្ម ស្វាគមន៍ក្រុមវិនិយោគិនទាំងអស់សម្រាប់ការវិនិយោគ ឬការបង្កើតក្រុមហ៊ុន»។
លោកបន្តថា៖ «វិស័យឯកជន គឺជាក្បាលម៉ាស៊ីនមួយសម្រាប់ការលើកកម្ពស់កំណើនសេដ្ឋកិច្ច»។
លោកបានឲ្យដឹងថា រដ្ឋាភិបាលកំពុងព្យាយាមក្នុងការកាត់បន្ថយ តម្លៃឡូជីស្ទីកការតភ្ជាប់ហេដ្ឋារចនាសម្ព័ន្ធទាំងអស់ ព្រមទាំងតម្លៃថាមពល ដើម្បីកាត់បន្ថយការចំណាយផងដែរ។
លោក តែ តាំងប៉រ ដែលជាប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានឲ្យដឹងថា ពិព័រណ៍ពាណិជ្ជកម្មនេះ គឺដើរតួនាទីដ៏សំខាន់ ដើម្បីផ្សព្វផ្សាយផលិតផលកម្ពុជា ខណៈកម្ពុជា គឺជាមជ្ឈមណ្ឌលវត្ថុធាតុដើមកសិកម្ម។
ទោះបីយ៉ាងនេះក្តីលោកឲ្យដឹងថា ការធ្វើឲ្យមានកំណើនផលិតផលក្នុងស្រុក នៅតែប្រឈមនឹងបញ្ហា ក្នុងការសម្រេចបានសមត្ថភាពប្រកួតប្រជែងជាមួយទីផ្សារអន្តរជាតិ។
លោក តែ តាំងប៉រ បានថ្លែងថា៖ «ពិព័រណ៍ពាណិជ្ជកម្ម មិនគ្រាន់តែភ្ជាប់ទំនាក់ទំនងនឹងការប្រើប្រាស់អន្តរជាតិប៉ុណ្ណោះទេ ប៉ុន្តែថែមទាំងធ្វើឲ្យ SME របស់យើងផងដែរ អាចសម្រេចបានបណ្ដាញពាណិជ្ជកម្ម ក្នុងការលើកកម្ពស់ផលិតផលរបស់យើង ដោយមានការវេចខ្ចប់ប្រកបដោយស្ដង់ដារ និងបច្ចេកទេស»។
លោកបន្តថា៖ «បញ្ហាប្រឈមរបស់យើងគឺកង្វះហិរញ្ញវត្ថុ SME ត្រូវការការគាំទ្រការទទួលបានហិរញ្ញវត្ថុដើម្បីលើកកម្ពស់ចង្វាក់ ផលិតកាន់តែប្រសើរដើម្បី កាត់បន្ថយការចំណាយ»។
លោក អិុន ឆៃវ៉ាន់ ប្រធានសមាគមស្វាយកំពង់ស្ពឺ បានឲ្យដឹងថា ពិព័រណ៍ពាណិជ្ជកម្ម គឺជាឱកាសមួយសម្រាប់ការផ្សព្វផ្សាយផលិតផលកសិកម្ម និងបង្កើតបណ្ដាញសម្រាប់ ការជួញដូរបន្ថែមទៀត។
លោកថ្លែងថា៖ «វាជាឱកាសមួយ ក្នុងការផ្សព្វផ្សាយផលិតផលរបស់យើង ដល់ប្រជាជនរបស់យើង និងពាណិជ្ជករអន្តរជាតិ ដើម្បីយល់ដឹងពីគុណភាពផ្លែស្វាយរបស់យើង»។
លោកបានបញ្ជាក់ថា ហើយវាក៏ជាឱកាសមួយ ក្នុងការបង្កើតបណ្ដាញពាណិជ្ជកម្មផងដែរ។
លោកបានបន្តទៀតថា ប៉ុន្តែវិស័យផ្លែស្វាយ នៅតែត្រូវការការបញ្ជាក់អនាម័យ និងភូតគាមអនាម័យដើម្បីបង្កើនការនាំចេញ ខណៈដែលកសិករផ្លែស្វាយ ចាំបាច់ត្រូវតែយល់ដឹងអំពីបច្ចេកទេស និងស្ដង់ដារផ្លែស្វាយដើម្បីឆ្លើយតបតាមទីផ្សារអន្តរជាតិ៕LA
