ក្រុងប៉ារីសៈ ការចំណាយរបស់ពិភពលោកលើការបំពុលខ្យល់បង្កដោយឥន្ធនៈផូស៊ីលមាន ៨ ពាន់លានដុល្លារក្នុង ១ ថ្ងៃ ឬប្រហែល ៣,៣ នៃ ផ.ស.ស របស់ពិភពលោក។ នេះបើយោងតាមការឲ្យដឹងរបស់ក្រុមស្រាវជ្រាវបរិស្ថានកាលពីថ្ងៃពុធ។
លទ្ធផលរកឃើញពីមជ្ឈមណ្ឌលស្រាវជ្រាវថាមពល និងខ្យល់ស្អាត (CREA) និងអង្គការ Greenpeace Southeast Asia គឺជាលទ្ធផលរកឃើញដំបូងដើម្បីវាយតម្លៃការចំណាយរបស់ពិភពលោកលើការបំពុលខ្យល់ ជាពិសេសការបំពុលដែលបង្កឡើងដោយការដុតប្រេង ឧស្ម័ន និងធ្យូងថ្ម។
របាយការណ៍នេះបានឲ្យដឹងថា៖ «យើងបានរកឃើញថា ប្រទេសចិនដីគោក អាមេរិក និងប្រទេសឥណ្ឌាទទួលបន្ទុកចំណាយច្រើនខ្ពស់បំផុតពីការបំពុលខ្យល់ដោយឥន្ធនៈផូស៊ីលនៅទូទាំងពិភពលោក ដែលមានប្រមាណ ៩០០ ពាន់លានដុល្លារ ៦០០ ពាន់លានដុល្លារ និង ១៥០ ពាន់លានដុល្លារក្នុង ១ ឆ្នាំរៀងគ្នា»។
ស្ថាប័នស្រាវជ្រាវទាំង ២ នេះបានរកឃើញថា ភាគល្អិតដែលបញ្ចេញដោយការប្រើប្រាស់ឥន្ធនៈផូស៊ីលបង្កឲ្យមនុស្ស ៤,៥ លាននាក់ស្លាប់មុនអាយុកាលក្នុង ១ ឆ្នាំ នៅជុំវិញពិភពលោករួមទាំងចំនួន ១,៨ លាននាក់ នៅប្រទេស ចិន ចំនួន ១ លាននាក់ នៅប្រទេស ឥណ្ឌា។
តួលេខថ្មីនេះមានភាពស្របគ្នាទៅនឹងអង្គការសុខភាពពិភពលោក (WHO) ដែលបានប៉ាន់ប្រមាណថា មានមនុស្សស្លាប់ចំនួន ៤,២ លាននាក់ ក្នុង ១ ឆ្នាំ ដែលមានទំនាក់ទំនងទៅនឹងការបំពុលខ្យល់ដែលភាគច្រើនស្លាប់ដោយសារជំងឺបេះដូងដាច់សរសៃឈាមក្នុងខួរក្បាល មហារីកសួត និងការឆ្លងជំងឺផ្លូវដង្ហើមស្រួចស្រាល់ចំពោះកុមារ។
របាយការណ៍កម្រាស់ចំនួន ៤៤ ទំព័រនេះបានប៉ាន់ប្រមាណថា ការចំណាយរបស់ពិភពលោកសម្រាប់ឆ្នាំ ២០១៨ មានចំនួន ២,៩ ពាន់ពាន់លានដុល្លារ៕ KC