.jpg)
អនុស្ថានីយថាមពលអគ្គិសនី និង ខ្សែបញ្ជូនតង់ស្យុងខ្ពស់នៅផ្លូវជាតិលេខ ៣។ ហុង មិនា
ភ្នំពេញៈ ព្រឹទ្ធសភាបានអនុម័តលើគម្រោងសាងសង់រោងចក្រអគ្គិសនីដំណើរការដោយធ្យូងថ្មចំនួន ២ និងខ្សែបញ្ជូនថាមពលអគ្គិសនីដែលមានតម្លៃរួម ១,៧ ពាន់លានដុល្លារកាលពីថ្ងៃម្សិលមិញ ដើម្បីបើកផ្លូវឲ្យក្រុមហ៊ុនទទួលបានសម្បទានចាប់ផ្ដើមដំណើរការសាងសង់ ហើយដែលនេះគឺផ្នែកមួយក្នុងការជួយឲ្យរដ្ឋាភិបាលសម្រេចបាននូវបេសកកម្មរបស់ខ្លួនក្នុងការផ្ដល់ថាមពលដែលអាចទុកចិត្តបាន និងបង្កើនប្រភពថាមពលបន្ថែមចន្លោះពីឆ្នាំ ២០២០ ដល់ឆ្នាំ ២០៣០។
គម្រោងនេះត្រូវបានព្រឹទ្ធសភាអនុម័តកាលពីថ្ងៃម្សិលមិញនាសម័យប្រជុំវិសាមញ្ញរបស់ខ្លួន។
សេចក្ដីប្រកាសព័ត៌មានបានឲ្យដឹងថា៖ «គម្រោងនេះនឹងផ្តល់ផលប្រយោជន៍ក្នុងការជំរុញការផ្គត់ផ្គង់អគ្គិសនីឲ្យបានគ្របដណ្តប់គ្រប់ភូមិនៅទូទាំងប្រទេស ព្រមទាំងធានាបាននូវសន្តិសុខក្នុងការផ្គត់ផ្គង់ថាមពលអគ្គិសនី មានគុណភាព និងតម្លៃសមរម្យថែមទាំងអាចជួយកាត់បន្ថយការទិញអគ្គិសនីដែលមានតម្លៃថ្លៃពីប្រភពនាំចូលមកពីប្រទេសជិតខាង។ ប្រការនេះនឹងរួមចំណែកក្នុងការអនុវត្តគោលនយោបាយរបស់រដ្ឋាភិបាលក្នុងការកាត់បន្ថយថ្លៃលក់អគ្គិសនី ដែលនឹងជំរុញបន្ថែមទៀតនូវការអភិវឌ្ឍសេដ្ឋកិច្ច សង្គម និងកាត់បន្ថយភាពក្រីក្ររបស់ប្រជាជនទូទាំងប្រទេស»។
ការអនុម័តដោយព្រឹទ្ធសភានេះធ្វើឡើងក្រោយរយៈពេល ២ ខែ បន្ទាប់ពីរដ្ឋាភិបាលបានអនុម័តចាប់តាំងពីដើមខែកុម្ភៈក្នុងអំឡុងកិច្ចប្រជុំនៅទីស្ដីការគណៈរដ្ឋមន្ដ្រី។
ក្រុមហ៊ុន រ៉ូយ៉ាល់ គ្រុបនឹងអភិវឌ្ឍរោងចក្រទី ២ ដែលមានសមត្ថភាពផលិតថាមពលបាន ៧០០ មេហ្គាវ៉ាត់។ រោងចក្រនេះនឹងប្រើប្រាស់ធ្យូងថ្មនាំចូល ដោយមានទីតាំងស្ថិតនៅក្នុងស្រុកបទុមសាគរ ខេត្តកោះកុង ចំណែកក្រុមហ៊ុន Han Seng Coal Mine Co Ltd (HSCMC) នឹងវិនិយោគលើរោងចក្រថាមពលអគ្គិសនីដំណើរការដោយធ្យូងថ្មមានអានុភាព ២៦៥ មេហ្គាវ៉ាត់ ស្ថិតក្នុងស្រុកត្រពាំងប្រាសាទ ខេត្តឧត្តរមានជ័យដោយប្រើប្រាស់ធ្យូងថ្មនៅក្នុងតំបន់នេះតែម្តង។
ជាមួយគ្នានេះ HSCMC ក៏បានទទួលការអនុម័តពីរដ្ឋាភិបាលសម្រាប់ការសាងសង់ខ្សែបញ្ជូនថាមពលអគ្គិសនី ២៣០ គីឡូវ៉ាត់ដែលតភ្ជាប់ស្រុកត្រពាំងប្រាសាទជាមួយអនុស្ថានីយខាងកើតសៀមរាបផងដែរ។
គម្រោងវិនិយោគទាំង ៣ នេះចាំបាច់ត្រូវធានាឲ្យបានសុវត្ថិភាព និងសន្តិសុខនៃការផ្គត់ផ្គង់អគ្គិសនីក្នុងប្រទេសកម្ពុជានៅចន្លោះឆ្នាំក្រោយដល់ឆ្នាំ ២០២៤ ជាពិសេសនៅក្នុងរដូវប្រាំងនៅពេលការផលិតអគ្គិសនីពីវារីអគ្គិសនីមានកម្រិតទាបបំផុត។
លោក ផៃ ស៊ីផាន អ្នកនាំពាក្យរដ្ឋាភិបាលបានឲ្យដឹងកាលពីខែកុម្ភៈថា គម្រោងរោងចក្រថាមពលអគ្គិសនីដំណើរការដោយធ្យូងថ្មរបស់ HSCMC ត្រូវការទុនវិនិយោគ ២៩៤,៣ លានដុល្លារហើយនឹងប្រតិបត្តិការនៅចុងឆ្នាំក្រោយ ឬដើមឆ្នាំ ២០២២ រីឯរោងចក្រថាមពលរបស់ក្រុមហ៊ុន រ៉ូយ៉ាល់ គ្រុប ដែលនឹងអភិវឌ្ឍរួមគ្នាជាមួយក្រុមហ៊ុន Sinosteel Equipment and Engineering Co Ltd ដែលមានការិយាល័យកណ្ដាលនៅទីក្រុងប៉េកាំង ត្រូវការទុនវិនិយោគ ១,៣៤ ពាន់លានដុល្លារ ហើយនឹងប្រតិបត្តិការក្នុងឆ្នាំ ២០២៣ ឬ ២០២៤ ចំណែកកាលបរិច្ឆេទអភិវឌ្ឍខ្សែបញ្ជូនថាមពលអគ្គិសនី មានទុនវិនិយោគដែលប៉ាន់ប្រមាណ ៦១,៥ លានដុល្លារមិនត្រូវបានប្រកាសនោះទេ។
យោងតាមទិន្នន័យក្រសួងរ៉ែ និងថាមពលកាលពីឆ្នាំមុនប្រទេសកម្ពុជាមានសមត្ថភាពផលិតអគ្គិសនីសរុបចំនួន ២,៥ ជីហ្គាវ៉ាត់។ រោងចក្រថាមពលវារីអគ្គិសនីមាន ១,៣ ជីហ្គាវ៉ាត់រោងចក្រដំណើរការដោយធ្យូងថ្មមាន ៦៤ មេហ្គាវ៉ាត់ ស្ថានីយថាមពលឥន្ធនៈផូស៊ីលមាន ២៧ មេហ្គាវ៉ាត់រោងចក្រថាមពលសូឡាមាន ៩០ មេហ្គាវ៉ាត់ និងរោងចក្រជីវម៉ាស់មាន ៥៦ មេហ្គាវ៉ាត់។ ការផលិតថាមពលសូឡាត្រូវរំពឹងថា នឹងកើនប្រហែល ៩០ មេហ្គាវ៉ាត់ កាលពីចុងឆ្នាំមុនដល់ ៤០០ មេហ្គាវ៉ាត់ត្រឹមចុងឆ្នាំនេះ៕ LA
