.jpg)
លោក Jean-Dominique Senard ប្រធានក្រុមហ៊ុន Renault ជំនួសតំណែងរបស់លោក Ghosn។ AFP
ក្រុងតូក្យូៈ ម្ចាស់ភាគហ៊ុនរបស់ក្រុមហ៊ុន Nissan កាលពីថ្ងៃចន្ទម្សិលមិញ បានបោះឆ្នោតដកលោក Carlos Ghosn អតីតប្រធានក្រុមហ៊ុនផលិតរថយន្តនេះចេញពីតំណែង ជាក្រុមប្រឹក្សាភិបាលរបស់ក្រុមហ៊ុន ខណៈដែលលោកកំពុងតតាំងក្តីចំនួន ៣ ដែលត្រូវបានចោទប្រកាន់ពីបទប្រព្រឹត្តកំហុសផ្នែកហិរញ្ញវត្ថុ ដែលបណ្តាលឲ្យលោកត្រូវបានឃុំខ្លួន។
កិច្ចប្រជុំវិសាមញ្ញរបស់ភាគហ៊ុនិកដែលបានធ្វើឡើងកាលពីម្សិលមិញ ក្នុងទីក្រុងតូក្យូ គឺជាកិច្ចប្រជុំលើកទី១ គិតចាប់ពីមានការចាប់ខ្លួនលោក Ghosn ដ៏គួរឲ្យភ្ញាក់ផ្អើលកាលពីថ្ងៃទី ១៩ ខែ វិច្ឆិកា។
បន្ទាប់ពីមានការចោទសួរអស់រយៈពេលជាច្រើនម៉ោងពីម្ចាស់ភាគហ៊ុន ពួកគេបានបោះឆ្នោតដកលោក Ghosn និងលោក Greg Kelly ដែលជាមន្ត្រីប្រតិបត្តិជនជាតិអាមេរិក និងជាមនុស្សជំនិតរបស់លោក Ghosn និងក៏កំពុងប្រឈមការចោទប្រកាន់នៅជប៉ុនផងដែរ។
ម្ចាស់ភាគហ៊ុនក៏បានអនុម័តសំណើមួយ ដើម្បីតែងតាំងលោក Jean-Dominique Senard ប្រធានក្រុមហ៊ុន Renault ជំនួសតំណែងរបស់លោក Ghosn ផងដែរ។
ក្រុមហ៊ុន Nissan បានបណ្តេញលោក Ghosn ចេញពីប្រធានស្ទើរតែភ្លាមៗបន្ទាប់ពីលោកត្រូវបានចាប់ខ្លួនដំបូង ប៉ុន្តែដើម្បីដកលោកចេញពីតំណែងជាក្រុមប្រឹក្សាភិបាល កិច្ចប្រជុំវិសាមញ្ញរបស់ម្ចាស់ភាគហ៊ុនចាំបាច់ត្រូវធ្វើឡើង។
លោក Hiroto Saikawa អគ្គនាយកក្រុមហ៊ុន Nissan បានបើកកិច្ចប្រជុំជាមួយនឹងសុន្ទរកថាដែលលើកឡើងពីការចោទប្រកាន់នានាប្រឆាំងនឹងលោក Ghosn ដោយចោទប្រកាន់លោកពីការប្រើប្រាស់មូលនិធិមិនត្រឹមត្រូវនិងព្យាយាមលាក់បាំងករណីសំណងរបស់លោក។
លោក និងមន្ត្រីប្រតិបត្តិផ្សេងទៀតបានឱនក្នុងកាយវិការសុំទោសនៅចំពោះមុខម្ចាស់ភាគហ៊ុនរាប់ពាន់នាក់ក្នុងកិច្ចប្រជុះនេះ៕ AFP/KC
