.jpg)
លោក លី តៃសេង (ឆ្វេង) ចាងហ្វាងនិងអគ្គនាយក ភ្នំពេញ ប៉ុស្តិ៍ និងលោក Hwangbo Eun ប្រធាន Incheon Daily ក្នុងពិធីចុះ MOU។ ស្រេង ម៉េងស្រ៊ុន
ភ្នំពេញៈ ភ្នំពេញ ប៉ុស្ដិ៍ ជាស្ថាប័នព័ត៌មានបោះពុម្ពផ្សាយ ២ ភាសាតែ ១ គត់នៅប្រទេសកម្ពុជា (ខ្មែរ-អង់គ្លេស) បានចុះកិច្ចព្រមព្រៀងជាមួយស្ថាប័នព័ត៌មានកូរ៉េ The Korea Incheon Daily ដើម្បីសហការផ្លាស់ប្តូរព័ត៌មានទៅវិញទៅមក ក្នុងគោលដៅលើកកម្ពស់កិច្ចសហប្រតិបត្តិការទ្វេភាគី។
អនុស្សរណៈនៃការយោគយល់គ្នា (MoU) នេះត្រូវបានធ្វើឡើងកាលពីថ្ងៃសុក្រ នៅការិយាល័យ កាសែតភ្នំពេញ ប៉ុស្ដិ៍ នៅទីក្រុងភ្នំពេញ រវាងលោក លី តៃសេង ចាងហ្វាង និងអគ្គនាយកកាសែត ភ្នំពេញ ប៉ុស្ដិ៍ និងលោក Hwangbo Eun ប្រធានព័ត៌មាន Incheon Daily។
ថ្លែងទៅកាន់សមភាគីកូរ៉េរបស់លោកកាលពីថ្ងៃសុក្រ លោក តៃសេង បានឲ្យដឹងថា កាសែត ភ្នំពេញ ប៉ុស្ដិ៍ គឺជាស្ថាប័នសារព័ត៌មានធំជាងគេនៅក្នុងប្រទេសកម្ពុជា និងទទួលបានការគាំទ្រពីប្រជាជនកម្ពុជា។ ការចេញផ្សាយរយៈពេល ២៦ ឆ្នាំ កាសែត ភ្នំពេញ ប៉ុស្ដិ៍ ទទួលបានពានរង្វាន់អន្តរជាតិជាច្រើន និងជាស្ថាប័នព័ត៌មានដែលមានចំនួនអ្នកអានច្រើនបំផុត។
យោងតាម លោក តៃសេង សារព័ត៌មាន ភ្នំពេញ ប៉ុស្ដិ៍ បានទាក់ទាញអ្នកអានមកពីសហគមន៍ពាណិជ្ជកម្មកូរ៉េនៅក្នុងប្រទេស កម្ពុជា ដូច្នេះវានឹងជាគំនិតផ្ដួចផ្ដើមដ៏ល្អមួយ ដើម្បីលើកកម្ពស់ព័ត៌មានអំពីសក្ដានុពលកម្ពុជា ដល់ប្រជាជនកូរ៉េផ្សេងទៀត ដើម្បីយល់ដឹងអំពីការអភិវឌ្ឍរបស់កម្ពុជា។
លោកថ្លែងថា៖ «យើងសង្ឃឹមថា ចាប់ពីពេលនេះតទៅនឹងមានកិច្ចសហប្រតិបត្តិការកាន់តែប្រសើរ ដើម្បីផ្តាស់ប្តូរព័ត៌មានរវាងប្រទេសទាំង ២ ពិសេសព័ត៌មានល្អៗអំពីប្រទេស កម្ពុជា ដល់ប្រជាជនកូរ៉េ»។
ស្ថាប័នព័ត៌មាន The Incheon Daily និងកាសែតភ្នំពេញប៉ុស្ដិ៍ នឹងខិតខំដើម្បីអភិវឌ្ឍទំនាក់ទំនងកិច្ចសហប្រតិបត្តិការ និងលើកកម្ពស់មិត្តភាព ដោយផ្អែកលើការគោរពទៅវិញទៅមកដោយស្មោះត្រង់។
ភាគីទាំង ២ នឹងជំរុញការផ្លាស់ប្តូរក្នុងការប្រមូលព័ត៌មាន អត្ថបទនៅក្នុងវិស័យផ្សេងៗ ដូចជាសេដ្ឋកិច្ច វប្បធម៌ កីឡា ការសម្ដែង សិល្បៈ និងទេសចរណ៍ និងការបញ្ជូនក្រុមអ្នកយកព័ត៌មានទៅវិញទៅមកជាដើម។
ភាគីទាំង ២ នឹងរៀបចំកិច្ចប្រជុំកម្រិតការងារ តាមរយៈការពិគ្រោះយោបល់ទៅវិញទៅមក ដើម្បីអនុវត្តជាក់ស្ដែងនៃកិច្ចព្រមព្រៀងនេះ និងលើកកម្ពស់ការពិគ្រោះយោបល់ជាទៀងទាត់។
លោក Hwangbo Eun ប្រធាន Incheon Daily បានឲ្យដឹងថា ស្ថាប័នរបស់លោក កំពុងប្រតិបត្តិការរយៈពេល ២០ ឆ្នាំហើយ រហូតមកដល់ពេលនេះ ដើម្បីបម្រើអ្នកអាននៅទីក្រុង Incheon ប្រទេស កូរ៉េ ដែលពេញដោយសកម្មភាពព្រលានយន្តហោះ និងសកម្មភាពកំពង់ផែសមុទ្រ។
លោកបានបន្ថែមថា សក្ដានុពលរបស់កម្ពុជា កាន់តែមានចំណាប់អារម្មណ៍ក្នុងចំណោមប្រជាជនកូរ៉េ ហើយជាលើកដំបូងសម្រាប់ស្ថាប័នព័ត៌មាន Incheon Daily ដើម្បីស្វែងរកភាពជាដៃគូជាមួយស្ថាប័នព័ត៌មានធំមួយ នៅកម្ពុជា ដើម្បីចែករំលែកព័ត៌មានអំពីកម្ពុជា ទៅអ្នកអានជនជាតិកូរ៉េ។
លោកHwangbo Eun បានលើកឡើងថា៖ «នេះជាលើកដំបូងដែលស្ថាប័នព័ត៌មានប្រចាំថ្ងៃ Korean Incheon ចាប់អារម្មណ៍ពិតប្រាកដលើស្ថាប័នព័ត៌មានកម្ពុជា និងសម្រេចចិត្តធ្វើកិច្ចសហប្រតិបត្តិការចាប់ពីថ្ងៃនេះ»៕LA
