.jpg)
កម្មករបង្ហាញផ្លែដូងប្រេងនៅក្នុងចម្ការមួយក្នុងខេត្ត Riau ប្រទេស ឥណ្ឌូនេស៊ី។ រូបថត AFP
ក្រុងគូឡាឡាំពួៈ រដ្ឋមន្ដ្រីរបស់ម៉ាឡេស៊ីបានឲ្យដឹងកាលពីថ្ងៃអង្គារថា ប្រទេស ម៉ាឡេស៊ី នឹងដាក់ពាក្យបណ្ដឹងទៅកាន់អង្គការពាណិជ្ជកម្មពិភពលោក (WTO) ជុំវិញផែនការរបស់សហភាពអឺរ៉ុប (EU) ដើម្បីបញ្ឈប់ការប្រើប្រាស់ប្រេងដូងនៅក្នុងផលិតកម្មជីវឥន្ធនៈ។
ប្រទេសអាស៊ីអាគ្នេយ៍មួយនេះ គឺជាប្រទេសផលិតប្រេងដូងធំជាងគេទី២ របស់ពិភពលោក បន្ទាប់ពីប្រទេស ឥណ្ឌូនេស៊ី ហើយនឹងរងផលប៉ះពាល់យ៉ាងខ្លាំងដោយផែនការរបស់សហភាពអឺរ៉ុបក្នុងការកាត់បន្ថយការប្រើប្រាស់ប្រេងដូងនៅក្នុងការផលិតជីវឥន្ធនៈនៅត្រឹមឆ្នាំ ២០៣០។
លោកស្រី Teresa Kok រដ្ឋមន្ដ្រីម៉ាឡេស៊ីទទួលខុសត្រូវខាងប្រេងបន្លែដែលអាចញ៉ាំបាន បានប្រាប់ទីភ្នាក់ងារព័ត៌មាន AFP ថា៖ «ប្រទេស ម៉ាឡេស៊ី នឹងប្ដឹងទៅអង្គការ WTO ដោយសង្ឃឹមថា នឹងដាក់ពាក្យនៅខែវិច្ឆិកា»
លោកស្រីបានឲ្យដឹងថា ការិយាល័យរបស់អគ្គមេធាវីម៉ាឡេស៊ីកំពុងធ្វើការងារលើបណ្ដឹងនេះ ហើយប្រទេស ម៉ាឡេស៊ី សង្ឃឹមថា នឹងសហការជាមួយប្រទេស ឥណ្ឌូនេស៊ី នៅក្នុងករណីនេះ។
ប្រេងដូង គឺជាគ្រឿងផ្សំដ៏សំខាន់មួយនៅក្នុងផលិតផលជាច្រើនរាប់ចាប់ពីអាហាររហូតដល់ផលិតផលគ្រឿងសម្អាង ប៉ុន្តែប្រេងនេះស្ថិតក្នុងបញ្ហាចម្រូងចម្រាសរយៈពេលយូរមកហើយ ដោយសារតែក្រុមអ្នកបរិសា្ថនបានឲ្យដឹងថា ការដាំដុះដូងប្រេងបានជំរុញឲ្យមានការកាប់ឆ្ការព្រៃ ដោយសារតែតំបន់ដ៏ធំនៃព្រៃទាក់ទាញទឹកភ្លៀងត្រូវបានកាប់បំផ្លាញក្នុងរយៈពេលប៉ុន្មានទសវត្សរ៍ថ្មីៗនេះ ដើម្បីបើកផ្លូវសម្រាប់ការដាំដុះដូងប្រេង។
ការប្រើប្រាស់ប្រេងដូងក្នុងការផលិតអាហារ និងគ្រឿងសម្អាង បានធ្លាក់ចុះរួចហើយនៅអឺរ៉ុប ដែលមួយផ្នែកដោយសារការរងសម្ពាធពីក្រុមអង្គការបរិស្ថានដែលបានដាក់លើក្រុមហ៊ុនធំ ប៉ុន្តែកំពុងកើនឡើងការប្រើប្រាស់ក្នុងផលិតកម្មជីវឥន្ធនៈ។
លោកនាយករដ្ឋមន្ដ្រី ម៉ាហាធៀ ម៉ូហាម៉ាដ កាលពីខែមីនាបានរិះគន់វិធានការរបស់សហភាពអឺរ៉ុបក្នុងការទប់ស្កាត់ ការប្រើប្រាស់ប្រេងដូងក្នុង ផលិតកម្មជីវឥន្ធនៈ ដោយលើកឡើងថា វាបង្កឲ្យបើកចំហសង្គ្រាមពាណិជ្ជកម្មមួយជាមួយប្រទេស ម៉ាឡេស៊ី។
លោកក៏បានព្រមានពីការសងសឹកដោយការទិញយន្តហោះប្រយុទ្ធថ្មីៗ ពីប្រទេស ចិន ជំនួសឲ្យយន្តហោះ Rafale ឬយន្តហោះ Eurofighter Typhoon របស់ប្រទេស បារាំង។
នៅសប្ដាហ៍មុនលោកប្រធានាធិបតី ជូកូ វីដូដូ របស់ប្រទេស ឥណ្ឌូនេស៊ី បានសន្យាថា នឹងប្រយុទ្ធប្រឆាំងនឹងផែនការនានារបស់សហភាពអឺរ៉ុប ដែលលោកបានប្រាប់ទីភ្នាក់ងារព័ត៌មាន Bloomberg News ថា៖ «ប្រេងដូង គឺជាទំនិញយុទ្ធសាស្ដ្រមួយសម្រាប់ប្រទេស ឥណ្ឌូនេស៊ី»៕ AFP/LA
