ភ្នំពេញៈ រដ្ឋាភិបាលបានបង្កើនសហព័ន្ធម្រេចកម្ពុជា ដើម្បីលើកកម្ពស់ទីផ្សារ និងដោះស្រាយបញ្ហាប្រឈមរបស់វិស័យនេះ ខណៈផលិតផលកសិកម្មដែលមានតម្លៃខ្ពស់មួយនេះកំពុងប្រឈមនឹងការធ្លាក់ចុះតម្លៃជាបន្តបន្ទាប់។
សហព័ន្ធម្រេច និងគ្រឿងទេសកម្ពុជា ត្រូវបានបង្កើតឡើងកាលពីថ្ងៃសុក្រសប្ដាហ៍មុនត្រូវបានបង្កើតឡើងដោយក្រសួងពាណិជ្ជកម្ម និងក្រសួងកសិកម្ម។
លោក សុង សារ៉ន អគ្គនាយកក្រុមហ៊ុន Amru rice co.,Ltd ដែលត្រូវបានជ្រើសរើសជាប្រធានសហព័ន្ធបានឲ្យដឹងថា ទម្រង់នៃការងាររបស់សហព័ន្ធម្រេច មិនខុសគ្នានឹងសហព័ន្ធស្រូវអង្ករនោះទេ ដែលនឹងធ្វើការដើម្បីដោះស្រាយបញ្ហាតម្លៃ ទីផ្សារ និងការដាំដុះ។
លោកថ្លែងថា៖ «គោលបំណងរបស់សហព័ន្ធនេះ គឺលើកកម្ពស់តម្លៃម្រេចរបស់យើង និងស្វែងរកទិសដៅទីផ្សារថ្មី ជាពិសេសម្រេចមិនមែន GI»។ លោកបន្ថែមថា កសិករនឹងមិនពឹងផ្អែកតែលើការនាំចេញក្រៅផ្លូវការទៅប្រទេស ថៃ និងវៀតណាម ទៀតទេ។
លោកលើកឡើងថា៖ «យើងចង់មានទីផ្សារផ្ទាល់របស់យើង ជាជាងការនាំចេញក្រៅផ្លូវការទៅប្រទេស ថៃ និងវៀតណាម យើងនឹងបង្កើតទីផ្សារ និងឈ្មោះ ម្រេចកម្ពុជា របស់យើង និងដោះស្រាយរាល់បញ្ហាប្រឈមក្នុងឧស្សាហកម្មម្រេច»។
មានសមាជិកសមាគមម្រេចចំនួន ១៧ ទូទាំងប្រទេសដែលចូលរួមជាមួយសហព័ន្ធនេះ ដែលនឹងធ្វើការងាររួមគ្នាជាមួយក្រសួងពាណិជ្ជកម្ម និងក្រសួងកសិកម្ម ដើម្បីដោះស្រាយបញ្ហាប្រឈមទាំងនេះ។ នេះបើតាមលោក សុង សារ៉ន។
តាមលោក សារ៉ន កម្ពុជាភាគច្រើនដាំម្រេចខ្មៅ ដែលផ្តល់បរិមាណផល ២០ ០០០ តោន ជាមធ្យមប្រចាំឆ្នាំ។
តាមលោក សុង សារ៉ន បច្ចុប្បន្នតម្លៃម្រេចនៅចន្លោះពី ២,៥ ដុល្លារទៅ ៣ ដុល្លារក្នុងមួយគីឡូក្រាម ដែលកសិករភាគច្រើនមិនទទួលបានប្រាក់ចំណេញនោះទេ។
លោក ងួន ឡាយ ប្រធានសមាគមលើកកម្ពស់ម្រេចកំពត ដែលបានចូលរួម ជាសមាជិកក្រុមប្រឹក្សាភិបាលសហព័ន្ធនេះ បានឲ្យដឹងថា សហព័ន្ធនេះនឹងដើរតួនាទីដ៏សំខាន់ក្នុងការអភិវឌ្ឍឧស្សាហកម្មម្រេច។
លោកថ្លែងថា៖ «យើងគួរតែផ្ដោតលើរបៀបក្នុងការបង្កើតទំនុកចិត្តសម្រាប់អតិថិជន និងរក្សាគុណភាពម្រេច បន្ទាប់មកម្រេចរបស់យើងនឹងមានទីផ្សារ»។ លោកបន្តថា៖ «សហព័ន្ធមានតួនាទីសំខាន់ក្នុងការអភិវឌ្ឍវិស័យម្រេច»។
លោក បៀន ឃាងជូ អ្នកគ្រប់គ្រងកសិដ្ឋានម្រេច គីម សួរ មាន ១០ ហិកតាក្នុងខេត្តពោធិ៍សាត់ រំពឹងថា សហព័ន្ធនេះនឹងចូលរួមធ្វើឲ្យវិស័យម្រេចមានស្ថិរភាពទីផ្សារ និងការលើកកម្ពស់ដល់កសិករដាំម្រេច។
លោកបញ្ជាក់ថា៖ «នៅពេលនេះយើងកំពុងជម្នះជាមួយតម្លៃ ហើយវាពិបាកក្នុងការស្វែងរកអ្នកទិញ ប្រសិនបើសហព័ន្ធនេះអាចផ្សព្វផ្សាយពីគុណភាពម្រេចរបស់យើង ដល់ទីផ្សារអន្តរជាតិ និងធ្វើបច្ចុប្បន្នភាពទីផ្សារតម្លៃម្រេចទាំងអស់ វានឹងមានប្រយោជន៍សម្រាប់កសិករ»។
លោកបន្ថែមថា លោកអាចផលិតម្រេចបាន ៦០ តោនក្នុង ១ ឆ្នាំ ដែលលក់ទៅប្រទេស ចិន និងវៀតណាម ក្នុងតម្លៃដែលមិនទទួលបានប្រាក់ចំណេញនោះទេ៕LA