ភ្នំពេញៈ អគ្គនាយកដ្ឋានពន្ធដារ (GDT) ប្រមូលចំណូលបានជាង ២ ពាន់លានដុល្លារក្នុងអំឡុង ១១ ខែនៃឆ្នាំនេះ ដោយបានកើនឡើង ១២,៤៨ ភាគរយ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់អគ្គនាយកដ្ឋាននេះ។
របាយការណ៍ដែលបានផ្សព្វផ្សាយកាលពីម្សិលមិញបង្ហាញថា ការប្រមូលប្រាក់ចំណូលពន្ធនៅក្នុងរយៈពេល ១១ ខែ ឆ្នាំ ២០១៨ បានកើនចំនួន ២២៨ លានដុល្លារពីជាង ១,៨២ពាន់លានដុល្លារកាលពីឆ្នាំមុន ពោលគឺកើន ១២,៤៨ ភាគរយ ស្មើនឹង ១០៦,៨៨ ភាគរយនៃផែនការប្រចាំឆ្នាំ ឬលើសផែនការ ១៣២,៣៣ លានដុល្លារ។
របាយការណ៍នេះបង្ហាញថា គ្រាន់តែក្នុងខែវិច្ឆិកា អគ្គនាយកដ្ឋានពន្ធដារប្រមូលចំណូលពន្ធអាករគ្រប់ប្រភេទបានចំនួនជាង ១៨៧,៥០ លានដុល្លារស្មើនឹង ៩,៧៥ ភាគរយនៃផែនការច្បាប់ បើធៀបនឹងចំណូលខែវិច្ឆិកា ឆ្នាំ ២០១៧ ឃើញថា ការប្រមូលចំណូលក្នុងខែវិច្ឆិកា ឆ្នាំ ២០១៨ នេះបានកើនឡើង ៤៣,៧៩ លានដុល្លារ។
លោក គង់ វិបុល អគ្គនាយកនៃអគ្គនាយកដ្ឋានពន្ធដារ ក្នុងអំឡុងកិច្ចប្រជុំកាលពីថ្ងៃម្សិលមិញ បានជំរុញឲ្យភាគីពាក់ព័ន្ធទាំងអស់ ត្រូវពង្រឹងការប្រមូលពន្ធប្រកបដោយប្រសិទ្ធភាព។
លោកថ្លែងថា៖ «ជាការឆ្លើយតបនឹងអ្នកបង់ពន្ធ [យើង] ចាំបាច់ត្រូវឲ្យពួកគេមានឆន្ទៈ និងរីករាយក្នុងការបង់ពន្ធ និងធ្វើការសហការល្អសម្រាប់ប្រជាជន ក្នុងការបង់ពន្ធ»។
លោក គង់ វិបុល បានឲ្យដឹងទៀតថា ដើម្បីធានាការប្រមូលពន្ធប្រកបដោយប្រសិទ្ធភាពសម្រាប់ឆ្នាំ ២០១៨ ឲ្យសម្រេចតាមផែនការដែលបានគ្រោងទុក អគ្គនាយកដ្ឋានពន្ធដារនឹងអនុវត្តយ៉ាងម៉ឺងម៉ាត់នូវគោលនយោបាយកែទម្រង់ពន្ធដារស៊ីជម្រៅ ដែលបានដាក់ចេញដោយរាជរដ្ឋាភិបាល ដែលរួមទាំងការធ្វើទំនើបកម្ម ព័ត៌មានវិទ្យាសម្រាប់ការគ្រប់គ្រងការ ប្រមូលពន្ធទាំងអស់៕ LA