.jpg)
ជនជាតិចិនពាក់ម៉ាស់ពេលធ្វើដំណើរនៅព្រលានយន្តហោះឡូសអែនជឺលែស។ AFP
ក្រុងប៉េកាំងៈ ប្រទេស ចិន កាលពីថ្ងៃអង្គារបានជំរុញឲ្យពលរដ្ឋរបស់ខ្លួនផ្អាកការធ្វើដំណើរទៅក្រៅប្រទេស ខណៈដែលប្រទេសនេះពង្រីកកិច្ចប្រឹងប្រែងដ៏ធំមួយ ដើម្បីទប់ស្កាត់ការផ្ទុះវីរុសដែលបានសម្លាប់មនុស្សជាង ១០០ នាក់នៅទូទាំងប្រទេស។
រដ្ឋបាលអន្តោប្រវេសន៍ជាតិ (NIA) បានឲ្យដឹងក្នុងសេចក្តីថ្លែងការណ៍មួយថា ការផ្តល់អនុសាសន៍ឲ្យពន្យារពេលធ្វើដំណើរដែលមិនចាំបាច់នេះត្រូវបានចេញផ្សាយ «ដើម្បីការពារសុខភាព និងសុវត្ថិភាពរបស់ជនជាតិចិន និងជនជាតិបរទេស»។
រដ្ឋបាលនេះបានបន្ថែមថា៖ «ការកាត់បន្ថយចលនាឆ្លងព្រំដែនរបស់មនុស្ស ជួយបង្ការ និងគ្រប់គ្រងការផ្ទុះជំងឺ»។
អាជ្ញាធរបានផ្អាករួចហើយនូវក្រុមហ៊ុនទេសចរណ៍ក្នុងស្រុក និងបរទេស ដែលជាផ្នែកមួយនៃកិច្ចប្រឹងប្រែងទូទាំងប្រទេស ដើម្បីប្រឆាំងនឹងការផ្ទុះវីរុសកូរ៉ូណាដែលបានឆ្លងដល់មនុស្សជាង ៤ ៥០០ នាក់នៅទូទាំងប្រទេសនេះ។
ទីភ្នាក់ងារព័ត៌មានផ្លូវការស៊ីនហួរបានរាយការណ៍កាលពីខែឧសភា ឆ្នាំមុនថា ជនជាតិចិនបានធ្វើដំណើរជិត ១៥០ លានជើង ទៅក្រៅប្រទេសកាលពីឆ្នាំ ២០១៨។
ការកាត់បន្ថយខ្លាំងចំពោះការធ្វើដំណើរទៅបរទេសពីប្រទេសចិននេះ អាចបង្កឲ្យមានបញ្ហាធ្ងន់ធ្ងរដល់ឧស្សាហកម្មទេសចរណ៍អន្តរជាតិ។
យោងតាមរបាយការណ៍មួយដែលចេញផ្សាយដោយក្រុមហ៊ុន Capital Economics ចំនួនភ្ញៀវទេសចរមកពីប្រទេសចិនបានកើនឡើងជិត ១០ ដង គិតចាប់ពីឆ្នាំ ២០០៣ មក៕ KC
