ភ្នំពេញៈ រោងចក្រកាត់ដេរថ្មីចំនួន ៦៩ ត្រូវបានបើកដំណើរការក្នុងរយៈពេល ៩ ខែដំបូងឆ្នាំនេះ ខណៈចំនួន ៣២ ត្រូវបានបិទទ្វារក្នុងអំឡុងពេលនេះ។ នេះបើយោងតាមរបាយការណ៍បានពីក្រសួងឧស្សាហកម្ម និងសិប្បកម្ម។
មន្ដ្រីរដ្ឋាភិបាលបង្ហាញមូលហេតុនៃការបិទ និងការបើកដំណើរការរោងចក្រនេះ ថាជានិន្នាការធម្មតាក្នុងការធ្វើពាណិជ្ជកម្ម និងមិនបានបង្ហាញពីការបារម្ភពីការដកប្រព័ន្ធអនុគ្រោះពន្ធ EBAទេ។
លោក អ៊ុំ សុថា អ្នកនាំពាក្យក្រសួងឧស្សាហកម្ម និងសិប្បកម្ម បានឲ្យដឹងថា ដោយសារស្ថិរភាពនយោបាយ កំណើនសេដ្ឋកិច្ច និន្នាការកំណើនរោងចក្រថ្មីនេះកំពុងបង្ហាញសក្ដានុពលសម្រាប់ការវិនិយោគរបស់ប្រទេសនេះ។
លោកថ្លែងថា៖ «ចំនួនរោងចក្រកំពុងរក្សាបានកំណើននោះមានន័យថា ប្រទេសរបស់យើងមានសក្ដានុពលល្អសម្រាប់ក្រុមវិនិយោគិនដរាបណា យើងមានស្ថិរភាពនយោបាយល្អ ព្រមទាំងគោលនយោបាយទាក់ទាញការវិនិយោគផ្ទាល់ពីបរទេសផងដែរ»។
របាយការណ៍បង្ហាញថា ចំនួនរោងចក្រថ្មីសរុប ១២៩ ត្រូវបានបើកដំណើរការនៅរយៈពេល ៩ ខែដំបូង ក្នុងនោះ ៦៩ គឺជារោងចក្រកាត់ដេរ ខណៈរោងចក្រ ៤០ ត្រូវបានបិទទ្វារ ក្នុងចំណោមនោះ ៣២ គឺជារោងចក្រកាត់ដេរ ហើយការបិទទ្វារនេះធ្វើឲ្យកម្មករគ្មានការងារធ្វើសរុប ១៨ ៦៤៥ នាក់។
លោក អ៊ុំ សុថា បញ្ជាក់ថា ការបិទទ្វារគឺជាបញ្ហាធម្មតា សម្រាប់ការធ្វើពាណិជ្ជកម្ម។ លោកបន្តថា៖ «ការបិទទ្វាររោងចក្រជាការប្រែប្រួលនៃនិន្នាការធ្វើពាណិជ្ជកម្ម រោងចក្រទាំងនោះបិទឬបើកដំណើរការឡើងវិញ ផ្អែកលើកិច្ចព្រមព្រៀងទិញ របស់អ្នកទិញ ឬលំហូរហិរញ្ញវត្ថុរបស់ពួកគេ វាមិនមែនជាបញ្ហាសេដ្ឋកិច្ចរបស់កម្ពុជាទេ»។
លោក លឹម ហេង អនុប្រធានសភាពាណិជ្ជកម្មកម្ពុជាយល់ស្របនឹងលោក អ៊ុំ សុថា ដោយថ្លែងថា ការប្រែប្រួលរបស់ឧស្សាហកម្មនេះ នឹងមិនជាប់ពាក់ព័ន្ធជាមួយនឹងបញ្ហា EBA នោះទេ។
លោកថ្លែងថា៖ «ជាមួយគ្នានេះដែរ EBA មិនមែនជាការបារម្ភសម្រាប់កំណើនរបស់ឧស្សាហកម្មនេះទេ ដោយសារយើងនៅតែមានទីផ្សារក្នុងដៃ ហើយនៅតែរកបានប្រាក់ចំណេញ ក្រុមវិនិយោគិននៅតែបន្តជាមួយយើង»។
នីតិវិធីរបស់ EU ក្នុងការដកកិច្ចព្រមព្រៀង EBA ពីកម្ពុជាកំពុងទាក់ទាញការបារម្ភយ៉ាងខ្លាំងសម្រាប់វិស័យដែលជំរុញកំណើនសេដ្ឋកិច្ចរបស់កម្ពុជាមួយនេះ។ កាលពីសប្ដាហ៍មុន សមាគមរោងចក្រកាត់ដេរនៅកម្ពុជាបានអំពាវនាវដល់ EU កុំឲ្យ EU ដក EBA។
GMAC បានឲ្យដឹងថា៖ «ការផ្អាកបណ្ដោះអាសន្ននៃ EBA ឬការដាក់ទណ្ឌកម្មដោយឯកតោភាគីរយៈពេលខ្លីណាមួយ អាចធ្វើឲ្យប៉ះពាល់អវិជ្ជមានរយៈពេលវែងលើការរស់នៅរបស់កម្មករយើង និងក្រុមគ្រួសាររបស់ពួកគេ»។
GMAC បានបន្តថា៖ «ការរីកចម្រើនទាំងអស់ដែលកម្ពុជា សម្រេចបានក្នុងរយៈពេល ២ ទសវត្សរ៍កន្លងមក តាមរយៈកិច្ចខិតខំប្រឹងប្រែងរបស់ភាគីពាក់ព័ន្ធទាំងអស់ រួមទាំងដៃគូអភិវឌ្ឍន៍ដូចជា EU អាចត្រូវបានបំផ្លាញយ៉ាងរហ័ស»។
របាយការណ៍ឲ្យដឹងថា វិស័យកាត់ដេររកប្រាក់ចំណូលបាន ៥,៣២ ពាន់លានដុល្លារ នៅរយៈពេល ៨ ខែដំបូងឆ្នាំនេះកើនឡើង ១២ ភាគរយធៀបនឹងរយៈពេលដូចគ្នាកាលពីឆ្នាំមុន។
EU គឺជាទីផ្សារនាំចេញឈានមុខគេរបស់កម្ពុជា និងជាអតិថិជនធំជាងគេសម្រាប់ការផលិតសម្លៀកបំពាក់ និងស្បែកជើង។ វិស័យនេះបានផ្ដល់ការងារដល់កម្មករប្រហែល ៧០០ ០០០ នាក់ ឬប្រហែល ៧,៥ ភាគរយនៃកម្លាំងពលកម្មសរុប។
លោក អាត់ ធន់ ប្រធានសហភាពការងារកម្ពុជា បានបញ្ជាក់ថា EBA ជាការបារម្ភដ៏ធំមួយសម្រាប់កម្មករ។លោកថ្លែងថា៖ «ទោះបីជារដ្ឋាភិបាលបញ្ជាក់ថា ការបាត់បង់ EBA មិនមែនជាការបារម្ភក៏ដោយ ប៉ុន្តែវានៅតែជាការបារម្ភដ៏ធំរបស់យើង លុះត្រាតែរដ្ឋាភិបាលអាចធានាសន្ដិសុខការងារ និងប្រាក់ខែសម្រាប់កម្មករទាំងអស់»។
លោកបន្ថែមថា កំណើនរោងចក្រថ្មី ក្នុងអំឡុងពេលនេះមិនឆ្លុះបញ្ចាំងពីបញ្ហាពិតនោះទេ។ លោកលើកឡើងថា៖ «វាគឺជាផ្នែកមួយនៃចលនាបើកឡើងវិញរបស់ក្រុមវិនិយោគចាស់ៗ [បន្ទាប់ពីការបិទទ្វារ] ដូច្នេះវាមិនមែនជាកំណើនដ៏ធំសម្រាប់ឧស្សាហកម្មនេះទេ»៕LA