.jpg)
ទិដ្ឋភាពនៅទីតាំងស្តុកស្រាមួយក្នុងទីក្រុងបូកដូ ប្រទេស បារាំង។ រូបថត AFP
ក្រុងវ៉ាស៊ីនតោនៈ លោកប្រធានាធិបតីអាមេរិក ដូណាល់ ត្រាំ កាលពីថ្ងៃចន្ទបានវាយប្រហារប្រទេស បារាំង ជុំវិញពន្ធនាំចូលមិនស្មើភាពលើស្រាអាមេរិក។
លោក ត្រាំ ដែលល្បីមិនពិសាស្រាបានឲ្យដឹងថា លោកនឹងធ្វើការងារដើម្បីបើកចំហទីផ្សារអឺរ៉ុប ដោយជាថ្មីម្ដងទៀតចោទប្រទេស បារាំង ពីបទការបង្កើតរបាំងពាណិជ្ជកម្មមិនស្មើភាពចំពោះការនាំចេញស្រាអាមេរិក។
លោក ត្រាំ បានប្រាប់ទូរទស្សន៍ CNBC ថា៖ «ប្រទេស បារាំង ហូតពន្ធចំនួនច្រើនលើស្រា ប៉ុន្តែយើងដកហូតពន្ធតិចតួចបំផុតលើស្រារបស់បារាំង»។
លោកប្រធានាធិបតីបានឲ្យដឹងថា ក្រុមហ៊ុនរបស់អាមេរិកត្អូញត្អែរថា ស្រារបស់ប្រទេស បារាំង ដាក់លក់នៅតាមទីផ្សារអាមេរិកមិនគិតតម្លៃពន្ធឡើយ។ លោកបន្ថែមថា៖ «វាមិនស្មើភាព ហើយយើងនឹងធ្វើអ្វីៗចំពោះវា»។
លោកថ្លែងថា៖ «យើងក៏មានស្រាដ៏អស្ចារ្យផងដែរ»។
ទីក្រុងវ៉ាស៊ីនតោន និងទីក្រុងប្រ៊ុចសែល កំពុងរៀបចំខ្លួនចាប់ផ្ដើមការចរចាកិច្ចព្រមព្រៀងពាណិជ្ជកម្ម ដើម្បីដោះស្រាយសង្គ្រាមមួយ ដែលលោក ត្រាំ បានចាប់ផ្ដើមកាលពីឆ្នាំមុន ដោយហូតពន្ធលើដែកថែប និងអាលុយមីញ៉ូម។ ប៉ុន្តែមន្ដ្រីអឺរ៉ុបបានឲ្យដឹងម្ដងហើយម្ដងទៀតថា ពួកគេនឹងមិនពិភាក្សាអំពីវិស័យកសិកម្មនោះទេ។
ក្នុងការផ្ទុះពាក្យសម្ដីឡើងនៅលើបណ្តាញសង្គម Twitter កាលពីចុងឆ្នាំមុន លោក ត្រាំ បានត្អូញត្អែរដូចនេះដែរអំពីពាណិជ្ជកម្មស្រា។
ពន្ធនាំចូលរបស់សហភាពអឺរ៉ុប (EU) លើស្រា គឺខ្ពស់ជាងពន្ធនាំចូលរបស់អាមេរិកលើស្រាអឺរ៉ុប ដែលរួមទាំងស្រាមកពីប្រទេស បារាំង ផងដែរ ប៉ុន្តែអតិថិជនរបស់អឺរ៉ុបទិញផលិតផលអាមេរិកកាន់តែតិច។ បារាំងគឺជាប្រទេសផលិតស្រាឈានមុខគេមួយ ប៉ុន្តែជាផ្នែកមួយនៃប្លុកមានសមាជិក ២៨ ប្រទេសនេះ បារាំងមិនបង្កើតគោលនយោបាយ ឬពន្ធនាំចូលពាណិជ្ជកម្មផ្ទាល់របស់ខ្លួននោះទេ។
ការពឹងផ្អែកលើប្រភេទ និងគ្រឿងផ្សំរបស់ស្រា ស្រាដែលនាំចូលប្រឈមនឹងពន្ធអាមេរិក ៥,៣ សេនដុល្លារ ដល់ ១២,៧ សេនដុល្លារ ក្នុង ១ ដប។ នេះបើយោងតាមគណៈកម្មការពាណិជ្ជកម្មអន្តរជាតិរបស់អាមេរិក។ ស្រា Sparkling ត្រូវបានហូតពន្ធក្នុងតម្លៃខ្ពស់ប្រហែល ១៤,៩ សេនដុល្លារក្នុង ១ ដប។
ប៉ុន្តែស្រាអាមេរិក បាននាំចេញទៅអឺរ៉ុបប្រឈមនឹងពន្ធពី ១១ ទៅ ២៩ សេនក្នុង ១ ដប។ នេះបើយោងតាមវិទ្យាស្ថានស្រា (Wine Institute) ដែលជាស្ថាប័នពាណិជ្ជកម្មមួយដែលធ្វើការងារលើកកម្ពស់ការនាំចេញរបស់អាមេរិក៕ AFP/LA
