ហុងកុងៈ ក្រុមវិនិយោគិនអាស៊ីកាលពីថ្ងៃព្រហស្បតិ៍បានសាទរការសម្រេចចិត្តរបស់លោក ដូណាល់ ត្រាំ ក្នុងការពន្យារពេលការបង្កើនពន្ធនាំចូលលើទំនិញរបស់ចិន និងសេចក្ដីប្រកាសរបស់ទីក្រុងប៉េកាំងក្នុងការដកចេញទំនិញអាមេរិកមួយចំនួនពីបញ្ជីពន្ធនាំចូលរបស់ខ្លួន។
ការផ្លាស់ប្តូរនេះផ្ដល់សញ្ញាពីការបន្ធូរបន្ថយភាពតានតឹងរវាងប្រទេសមហាអំណាចសេដ្ឋកិច្ចទាំង ២ មុនពេលកិច្ចប្រជុំមួយរបស់ក្រុមអ្នកចរចាកម្រិតខ្ពស់នៅខែក្រោយ។
ពួកគេក៏បានផ្ដល់ការលើកទឹកចិត្តបន្ថែមសម្រាប់ក្រុមវិនិយោគិន ខណៈពួកគេរង់ចាំសេចក្ដីប្រកាសសំខាន់ៗពីអាមេរិក និងធនាគារកណ្ដាលអឺរ៉ុបដែលត្រូវបានរំពឹងថា នឹងមើលឃើញការបន្ធូរបន្ថយបន្ថែមទៀតនៃគោលនយោបាយរូបិយវត្ថុ។
នៅលើ Twitter កាលពីរាត្រីថ្ងៃពុធលោក ត្រាំ បានឲ្យដឹងថា៖ «យើងបានយល់ស្របចំពោះកាយវិការមួយនៃសុឆន្ទៈក្នុងការដកចេញផែនការការបង្កើនពន្ធនាំចូលលើទំនិញមានតម្លៃ ២៥០ ពាន់លានដុល្លារ (២៥ ភាគរយដល់ ៣០ ភាគរយ) ចាប់ពីថ្ងៃទី ១ ខែតុលាដល់ថ្ងៃទី ១៥ ខែតុលា»។
លោកបន្ថែមថាការពន្យារពេលនេះត្រូវបានស្នើឡើងដោយ «លោក Liu He ឧបនាយករដ្ឋមន្ដ្រីរបស់ប្រទេសចិន និងដោយសារការពិតដែលថា សាធារណរដ្ឋប្រជាមានិតចិននឹងប្រារព្ធខួបលើកទី ៧០ របស់ពួកគេ» នៅថ្ងៃទី១ ខែតុលា។
ប្រទេសចិនបានឲ្យដឹងថា ខ្លួននឹងលើកលែងជាបណ្ដោះអាសន្នលើទំនិញអាមេរិក ១៦ ប្រភេទពីការបង្កើនជាការផ្សះផ្សាមួយដល់ទីក្រុងវ៉ាស៊ីនតោន មុនពេលការចរចាធ្វើឡើងដែលលោក ដូណាល់ ត្រាំ បានហៅថាជា «ការផ្លាស់ប្តូរដ៏ធំមួយ»។
ការបង្ហាញការផ្សះផ្សាកាន់តែច្រើនពីភាគីទាំង ២ បន្ទាប់ពីការគុំកួនគ្នារយៈពេលជាច្រើនខែបានជំរុញឲ្យមានក្ដីសង្ឃឹមថា ពួកគេអាចឆ្ពោះទៅរកដំណោះស្រាយចំពោះសង្គ្រាមពាណិជ្ជកម្មដែលមានរយៈពេលយូរដែលបានធ្វើឲ្យប៉ះពាល់ដល់សេដ្ឋកិច្ចពិភពលោក និងផ្សារហ៊ុនផងដែរ។
លោក Tommy Xie សេដ្ឋវិទូនៅក្រុមហ៊ុន Oversea-Chinese Banking Corp បានថ្លែងថា ការពន្យារពេលនេះ «បង្ហាញថា លោក ត្រាំ មិនចង់បង្កើនពន្ធនាំចូលមុនពេលការចរចាពាណិជ្ជកម្មនៅដើមខែតុលា ហើយវាបង្កើតលក្ខខណ្ឌល្អៗជាច្រើន»។ លោកបន្តថា៖ «វាបន្ថែមក្ដីសង្ឃឹមថានឹងមានព័ត៌មានល្អៗពីកិច្ចប្រជុំខែតុលា ហើយទីផ្សារនឹងរង់ចាំមើលព័ត៌មាន»។
ការអភិវឌ្ឍកាលពីថ្ងៃពុធត្រូវបានស្វាគមន៍យ៉ាងទូលំទូលាយ ទោះបីជាផ្សារហ៊ុនអាស៊ីបានជម្នះក្នុងការរក្សាកំណើនថ្លៃលើកដំបូង ដោយសារតែការទទួលបានប្រាក់ចំណេញពីការកើនឡើងល្អប្រសើរនៅសប្ដាហ៍នេះ។
ផ្សារហ៊ុនតូក្យូ បានបញ្ចប់ការកើនឡើងកាន់តែខ្ពស់ ០,៨ ភាគរយនៅពេលព្រឹកម្សិលមិញ និងតម្លៃផ្សារហ៊ុនស៊ាងហៃបានកើនឡើង ០,២ ភាគរយ ខណៈតម្លៃផ្សារហ៊ុនស៊ីដនីកើនឡើង ០,៥ ភាគរយ។ តម្លៃផ្សារហ៊ុន វែល្លីងតុន និងតៃប៉ិ ក៏បានកើនឡើងផងដែរ ហើយផ្សារហ៊ុនហ្សាការតាក៏កើនឡើងផងដែរ ប៉ុន្តែតម្លៃផ្សារហ៊ុនហុងកុងបានធ្លាក់ចុះ ០,២ ភាគរយ។
លោក Jun Inoue ជាសេដ្ឋវិទូជាន់ខ្ពស់មួយរូបនៅវិទ្យាស្ថានស្រាវជ្រាវ Mizuho Research Institute បានឲ្យដឹងថា វិធានការរបស់លោក ត្រាំ ចង្អុលបង្ហាញថា លោក «អាចបត់បែនបាន ដើម្បីទទួលបានសម្បទានពីប្រទេសចិន និងថា លោកមិនមែនកំពុងព្យាយាមក្នុងការពិន័យទីក្រុងប៉េកាំងឲ្យខាងតែបាននោះទេ»។
ការបន្ធូរបន្ថយភាពតានតឹងពាណិជ្ជកម្មជាក់ស្ដែងបានបង្កើនតម្លៃប្រេង ជាក្ដីសង្ឃឹមនៃការបញ្ចប់ជម្លោះដែលបានធ្វើឲ្យមានក្ដីសង្ឃឹមឡើងវិញសម្រាប់តម្រូវការ៕ LA