ភ្នំពេញៈ ក្រុមវិនិយោគិនកូរ៉េកំពុងសម្លឹងមើលឱកាសវិនិយោគនៅទីផ្សារមូលបត្រកម្ពុជា ជាពិសេសជាមួយនឹងធនាគារអេស៊ីលីដា ភីអិលស៊ី ដែលរំពឹងថានឹងចុះបញ្ជីលើផ្សារហ៊ុននេះនៅខែខាងមុខនេះ។
ពាណិជ្ជករ និងក្រុមវិនិយោគិនរាប់រយនាក់មកពីសមាគមក្រុមហ៊ុនហិរញ្ញវត្ថុកូរ៉េនៅក្នុងកម្ពុជាបានចូលក្នុងសិក្ខាសាលាសាធារណៈមួយស្ដីពីធនាគារ ACLEDA Bank នៅទីក្រុងភ្នំពេញកាលពីថ្ងៃពុធ។
លោក Shin Chang Moo វិនិយោគិនកូរ៉េដែលបច្ចុប្បន្នជាប្រធានធនាគារ PPCBank បានឲ្យដឹងនៅក្នុងសិក្ខាសាលានេះថា វត្តមានរបស់ធនាគារអេស៊ីលីដា ភីអិលស៊ី លើផ្សារមូលបត្រកម្ពុជា (CSX) ទទួលបានការចាប់អារម្មណ៍ច្រើនពីក្រុមវិនិយោគិនសាធារណៈ ដោយសារតែធនាគារនេះមានសក្ដានុពលខ្លាំងនៅក្នុងវិស័យហិរញ្ញវត្ថុនៅក្នុងប្រទេសកម្ពុជា។
លោកថ្លែងថា៖ «នេះជា IPO លើកដំបូងរបស់វិស័យពាណិជ្ជកម្មនៅប្រទេសកម្ពុជាដែលធនាគារអេស៊ីលីដា ភីអិលស៊ីនាំមុខគេលើកដំបូង និងជាគំរូមួយសម្រាប់ធនាគារពាណិជ្ជទាំងអស់ក្នុងការចុះបញ្ជីនៅថ្ងៃខាងមុខ។ ធនាគារអេស៊ីលីដា មានសក្ដានុពលច្រើនក្នុងការរីកចម្រើន និងជាធនាគារកម្ពុជាដំបូងគេ និងរកបានប្រាក់ចំណូលយ៉ាងច្រើនជារៀងរាល់ឆ្នាំ ខ្ញុំជឿជាក់ថាក្រុមវិនិយោគិនមានចំណាប់អារម្មណ៍លើការវិនិយោគ»។
លោកបានបន្តថា៖ «ហើយក្រុមវិនិយោគិនមួយចំនួនមិនអាចរង់ចាំកាលបរិច្ឆេទចុះបញ្ជីផ្លូវការទេ ពិសេសនៅពេលនេះធនាគារអេស៊ីលីដាបានប្រកាសថា ខ្លួននឹងអនុញ្ញាតឲ្យបុគ្គលក្លាយជាភាគទុនិក។ នោះនឹងនាំយកភាពវិជ្ជមានយ៉ាងខ្លាំងទាំងផ្សារមូលបត្រកម្ពុជា និងភាគីក្រុមវិនិយោគិន ជាពិសេសសេដ្ឋកិច្ចកម្ពុជា»។
លោក Jong Weon HA អ្នកយុទ្ធសាស្ដ្រទីផ្សារ និងជាប្រធានប្រតិបត្តិការនៅ CSX បានឲ្យដឹងថា ក្រុមវិនិយោគិនកូរ៉េចាប់អារម្មណ៍ខ្លាំងក្នុងការវិនិយោគលើវិស័យធនាគារកម្ពុជាដែលត្រូវបានចាត់ទុកជាវិស័យទទួលបានប្រាក់ចំណេញខ្លាំងបំផុតក្នុងចំណោមវិស័យជាច្រើនដែលរីកចម្រើននៅក្នុងប្រទេសកម្ពុជា។
លោកថ្លែងថា៖ «មានការទិញជាច្រើនរបស់ធនាគារក្នុងស្រុកដោយក្រុមវិនិយោគិនស្ថាប័នកូរ៉េរហូតមកដល់ពេលនេះ ប៉ុន្តែក្រុមវិនិយោគិនកូរ៉េលក្ខណៈបុគ្គលមិនដែលមានឱកាសក្នុងការចូលរួមនោះទេ។ មានក្រុមវិនិយោគិនជាច្រើនដែលកំពុងស្នាក់នៅក្នុងប្រទេសកម្ពុជាដែលសួរអំពីការធ្វើ IPO របស់ធនាគារអេស៊ីលីដា។ ដូច្នេះខ្ញុំជឿជាក់ថា សិក្ខាសាលានេះនឹងផ្ដល់ព័ត៌មានលម្អិតសម្រាប់ពួកគេ ដើម្បីត្រៀមខ្លួនឲ្យហើយក្នុងការទិញភាគហ៊ុនរបស់ធនាគារក្នុងស្រុកឈានមុខគេមួយនេះ»។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាបានឲ្យដឹងថា ជាមួយនឹងការធ្វើ IPO របស់ធនាគារនេះនឹងបង្ហាញទំព័រថ្មីមួយនៃប្រវត្តិសាស្ដ្រជោគជ័យរបស់ធនាគារអេស៊ីលីដា តាមរយៈការធ្វើឲ្យធនាគារនេះក្លាយជាធនាគារសាធារណៈដំបូងគេនៅក្នុងប្រទេសកម្ពុជា។
លោកបន្តថា៖ «ធនាគារអេស៊ីលីដា ភីអិលស៊ី នឹងក្លាយជាធនាគារដំបូងគេនៅក្នុងប្រទេសកម្ពុជានឹងចុះបញ្ជីនៅ CSX ក្នុងពេលឆាប់ៗនេះ។ សិក្ខាសាលានេះនឹងជាឱកាសដ៏ល្អបំផុតសម្រាប់អ្នកចូលរួមក្នុងការទទួលបានព័ត៌មានសំខាន់ៗ និងនីតិវិធីសម្រាប់ការវិនិយោគលើវិស័យសន្ដិសុខនៅក្នុងប្រទេសកម្ពុជា»។
តាំងពីការចាប់ផ្ដើមដំបូងជាអង្គការមិនមែនរដ្ឋាភិបាលក្នុងការផ្ដល់ឥណទានដល់សហគ្រាសធុនតូច ធនាគារនេះបានបង្កើនទុនរបស់ខ្លួន ៧០០ ដង និងប្រាក់ចំណេញសុទ្ធរបស់ខ្លួនជិត ២០០០ ដង។ ទ្រព្យសកម្មរបស់ធនាគារនេះនៅពេលនេះមានតម្លៃ ៦ ពាន់លានដុល្លារ៕LA