ក្រុងហូជីមិញៈ វៀតណាមជាប្រទេសមួយក្នុងចំណោមសមាជិកអាស៊ានមួយចំនួនដែលបន្តធ្វើឲ្យ ភាពទាក់ទាញរបស់ខ្លួនមានភាពប្រសើរឡើងជានិច្ចចំពោះវិនិយោគិនបរទេស ដោយសារសេដ្ឋកិច្ចរីកចម្រើន និងបរិយាកាសវិនិយោគប្រសើរឡើងរបស់ប្រទេសនេះ។ នេះបើយោងតាមអ្នកជំនាញ។
លោក Berly D. Alvarez ប្រធានក្រុមហ៊ុន Kaunlad Lending Investors Corporation របស់ហ្វីលីពីន និងជាវាគ្មិនក្នុងកិច្ចប្រជុំ Horasis Asia 2018 ដែលធ្វើឡើងថ្មីៗនេះនៅខេត្តប៊ីញដួង ប្រទេស វៀតណាម បានឲ្យដឹងថា សមត្ថភាពរបស់វៀតណាមក្នុងការទាក់ទាញការវិនិយោគផ្ទាល់ពីបរទេសទទួលបានដោយសារកំណែទម្រង់សេដ្ឋកិច្ចជាបន្តបន្ទាប់របស់ខ្លួន មានប្រជាជនវ័យក្មេង មានប្រជាជនកាន់តែច្រើនមករស់នៅទីក្រុងមានកម្លាំងពលកម្មគ្រប់គ្រាន់ ការកែលម្អបរិយាកាសវិនិយោគ និងស្ថិរភាពនយោបាយ។
លោកបានបន្ថែមថា ការពិតដែលវៀតណាមបានរៀបចំកិច្ចប្រជុំ APEC ក្នុងឆ្នាំ ២០១៧ បានបញ្ជាក់ពីសមាហរណកម្មសេដ្ឋកិច្ចក្នុងតំបន់របស់ខ្លួន និងការកែលម្អបរិយាកាសធុរកិច្ចជាលំដាប់។
វៀតណាម បាននិងកំពុងទាក់ទាញការវិនិយោគក្នុងវិស័យហេដ្ឋារចនាសម្ព័ន្ធ រួមមានគម្រោងថាមពល ផ្លូវថ្នល់ សំណង់ផ្លូវដែក និងថាមពលកកើតឡើងវិញ។
លោក Don Lam អគ្គនាយកក្រុមហ៊ុន VinaCapital បានថ្លែងថាសេដ្ឋកិច្ចវៀតណាមនៅតែរឹងមាំជាមួយនឹងកំណើន ៦,៦ ភាគរយសម្រាប់ឆ្នាំក្រោយ អតិផរណានៅតែស្ថិតនៅក្រោមការគ្រប់គ្រងបាន និងការពង្រីកវិស័យកម្មន្តសាល។
លោកបានថ្លែងថា៖ «ការវិនិយោគបរទេសច្រើនជាងមុនរំពឹងថានឹងហូរចូលវៀតណាមនាពេលខាងមុខ»។
លោក Pakpoom Vallisuta ប្រធានក្រុមហ៊ុន Quant Group Corporation ដែលក្រុមហ៊ុនផ្តល់ប្រឹក្សាផ្នែកធនាគារវិនិយោគនាំមុខគេរបស់ថៃ បានប្រាប់សារព័ត៌មាន Viet Nam News ថា កំណែទម្រង់ទីផ្សារក៏ជួយទាក់ទាញការវិនិយោគផងដែរ។
លោក Pham Hong Hai អគ្គនាយកក្រុមហ៊ុន HSBC Vietnam បានថ្លែងថា៖ «យើងក៏មើលឃើញផងដែរនូវការបង្វែរពាណិជ្ជកម្ម (ផ្លាស់ប្តូរពីប្រទេសថ្លៃដើមទាបទៅប្រទេសថ្លៃដើមខ្ពស់ «Trade Diversion») ដែលអាចកើតមាន ខណៈតម្រូវការនំាចូលរបស់អាមេរិកបែរចេញពីប្រទេស ចិន ទៅទីផ្សារអាស៊ានដទៃៗទៀតដូចជាវៀតណាមជាដើម»។
លោកបានបន្ថែមថា ខណៈនិន្នាការនេះជាសញ្ញាល្អមួយសម្រាប់ការអភិវឌ្ឍរបស់វៀតណាម វាក៏ដាក់សម្ពាធបន្ថែមទៀតទៅលើប្រទេសនេះ និងអាជីវកម្មនានាឲ្យអភិវឌ្ឍហេដ្ឋារចនាសម្ព័ន្ធផងដែរ។ លោកបានថ្លែងថា៖ «ដូច្នេះ ខ្ញុំគិតថា ការកែលម្អផលិតភាពការងារតាមរយៈការអប់រំ និង ការបណ្តុះបណ្តាលវិជ្ជាជីវៈឲ្យកាន់តែប្រសើរឡើង គួរតែជាអាទិភាពមួយសម្រាប់រដ្ឋាភិបាល»។
លោកបានថ្លែងថា ទោះវាជាការពិតដែលថា មួយផ្នែកធំនៃកម្លាំងពលកម្ម អាចផ្លាស់ប្តូរពីកសិកម្មក្តី ក៏ពួកគេភាគច្រើនបំផុតអាចផ្លាស់ប្តូរបានទៅរកតែវិស័យផលិតកម្មបច្ចេកវិទ្យាកម្រិតទាបប៉ុណ្ណោះ ហើយនៅមានការខ្វះខាតកម្មករ ដែលមានលក្ខណសម្បត្តិគ្រប់គ្រាន់ដើម្បីឈានទៅរកតួនាទីខ្ពស់ជាងនេះ។
កិច្ចប្រឹងប្រែងបន្ថែម
រដ្ឋាភិបាលវៀតណាម បានបង្កើតកិច្ចខិតខំប្រឹងប្រែងនានាដូចជាកែលម្អគុណភាពនៃការអប់រំថ្នាក់បឋមសិក្សា និងអនុវិទ្យាល័យ ប៉ុន្តែនៅត្រូវការកិច្ចខិតខំប្រឹងប្រែងច្រើនទៀត។
ការកែលម្អការអប់រំថ្នាក់ឧត្តមសិក្សា និងការបណ្តុះបណ្តាលវិជ្ជាជីវៈ ការជំរុញការបណ្តុះបណ្តាលនៅកន្លែងការងារដែលដឹកនាំដោយវិស័យឯកជន និងការផ្តល់ឱកាសរៀនពេញមួយជីវិត គឺជាកំណែទម្រង់មួយចំនួនក្នុងចំណោមកំណែទម្រង់ដែលចាំបាច់ បើប្រទេសនេះចង់ទទួលបានអត្ថប្រយោជន៍ពេញលេញពីចំណុចល្អនៃប្រជាសាស្រ្តបច្ចុប្បន្នរបស់ខ្លួន និងការបង្វែរពាណិជ្ជកម្មដែលអាចកើតមាន។
ក្រុមអ្នកជំនាញបានផ្តល់អនុសាសន៍ថា ក្រុមហ៊ុនវៀតណាមគួរទាញយកប្រយោជន៍ពីបច្ចេកវិទ្យាឧស្សាហកម្មជំនាន់ទី ៤ ដោយវិនិយោគបន្ថែមក្នុងវិស័យបច្ចេកវិទ្យាដើម្បីបង្កើនសមត្ថភាពប្រកួតប្រជែងរបស់ខ្លួន។
ក្រុមអ្នកជំនាញទាំងនោះបានបន្តថា ជាងនេះទៀត កំណែទម្រង់គោលនយោបាយដើម្បីទាក់ទាញការវិនិយោគបរទេសច្រើនជាងមុនមានសារៈសំខាន់សម្រាប់ទទួលបានកំណើនសេដ្ឋកិច្ចបន្ថែមទៀត និងបង្កើនសមត្ថភាពប្រកួតប្រជែងរបស់ប្រទេសនេះ ជាពិសេសក្នុងវិស័យនានាដូចជា ហេដ្ឋារចនាសម្ព័ន្ធ និងកម្មន្តសាល។
បញ្ហាប្រឈម
បរិយាកាសអាជីវកម្មរបស់វៀតណាមនៅប្រឈមមុខនឹងបញ្ហាជាច្រើននៅឡើយដូចជា ក្របខ័ណ្ឌច្បាប់ដែលមិនទាន់មានការអភិវឌ្ឍ ហានិភ័យខ្ពស់នៃអំពើពុករលួយ ការការពារកម្មសិទ្ធិបញ្ញាមានកម្រិតទាប ចំនួនកម្មករជំនាញ និងកម្មករផលិតកម្មនៅមានកម្រិត។ នេះបើយោងតាមលោក Alvarez។
លោកបានថ្លែងថា ប្រព័ន្ធយុត្តិធម៌និងហេដ្ឋារចនាសម្ព័ន្ធនៅវៀតណាមត្រូវការកែលម្អ ហើយប្រព័ន្ធអប់រំថ្នាក់ឧត្តមសិក្សា និងបណ្តុះបណ្តាលវិជ្ជាជីវៈក៏ត្រូវកែលម្អដែរ។
លោក Alvarez បានថ្លែងថា ក្រុមហ៊ុនមួយចំនួនអាចដាក់រោងចក្រនៅវៀតណាមដោយសារសង្គ្រាមពាណិជ្ជកម្មរវាង អាមេរិក‑ចិន ប៉ុន្តែកម្លាំងការងារដែលជាទូទៅមានគុណភាពទាប និងសមត្ថភាពបច្ចេកវិទ្យាកម្រិតទាបរបស់ប្រទេសនេះអាចជាបញ្ហាធំមួយ។
លោក Vallisuta ប្រធានក្រុមហ៊ុន Quant ថ្លែងថា ក្រុមហ៊ុននានាក៏ចង់បានប្រព័ន្ធអេកូឡូស៊ីដែលស៊ាំនឹងពួកគេ និងភាពសម្បូរបែបនៃទំនិញផងដែរ ជាជាងគ្រាន់តែកម្លាំងពលកម្មតម្លៃសមរម្យ។
លោក Alvarez បានថ្លែងថា វៀតណាមគួរតែតម្រង់ទៅរកការហូរចូលការវិនិយោគផ្ទាល់ពីបរទេស «គុណភាពខ្ពស់» ដោយផ្តោតលើគម្រោងប្រើប្រាស់បច្ចេកវិទ្យាទំនើប បច្ចេកវិទ្យាមិនប៉ះពាល់បរិស្ថាន និងផលិតផលដែលមានលក្ខណៈប្រកួតប្រជែង ដែលអាចជាផ្នែកនៃបណ្តាញផលិតកម្ម និងចង្វាក់តម្លៃសកល។
បើយោងតាមទីភ្នាក់ងារវិនិយោគបរទេសរបស់វៀតណាម ប្រទេសដែលជាសមាជិកអាស៊ានមួយនេះ បានទាក់ទាញការវិនិយោគផ្ទាល់ពីបរទេសដែលបានចុះបញ្ជីចំនួន ៣០,៨ ពាន់លានដុល្លារនៅឆ្នាំនេះ គិតត្រឹមថ្ងៃទី ២០ ខែវិច្ឆិកា៕ ANN/PS