ក្រុងវ៉ាស៊ីនតោនៈ ទីក្រុងវ៉ាស៊ីនតោនកាលពីថ្ងៃអាទិត្យបានបន្ថែមពន្ធនាំចូលថ្មីលើការនាំចូលរបស់ប្រទេស ចិន ខណៈអាមេរិកបានបង្កើនល្បឿនយុទ្ធនាការសម្ពាធខ្ពស់សំដៅបង្ខំទីក្រុងប៉េកាំងចុះហត្ថលេខាលើកិច្ចព្រមព្រៀងពាណិជ្ជកម្មថ្មីមួយ ទោះបីវាចំពេលការបារម្ភនៃការធ្លាក់ចុះបន្ថែមទៀតនៃកំណើនសេដ្ឋកិច្ចអាមេរិក និងពិភពលោកក៏ដោយ។
ពន្ធនាំចូលបន្ថែម ១៥ ភាគរយ ដែលប៉ះពាល់មួយផ្នែកនៃទំនិញមានតម្លៃ ៣០០ ពាន់លានដុល្លារ នាំមកពីប្រទេស ចិន បានចាប់ផ្ដើមអនុវត្តនៅម៉ោង ៤ និង ១ នាទីម៉ោងសកល។ នេះបើយោងតាមការិយាល័យតំណាងពាណិជ្ជកម្មអាមេរិក។
លោកប្រធានាធិបតីអាមេរិក ដូណាល់ ត្រាំ កាលពីថ្ងៃសុក្របានច្រានចោលការពន្យារពេលបន្ថែមទៀតដោយថ្លែងថា៖ «ពន្ធនាំចូលទាំងនេះនឹងបន្តដំណើរការទៅទៀត»។
ពន្ធនាំចូលថ្មីនេះនឹងកំណត់ទិសដៅផលិតផលមួយចំនួនចាប់ពីផលិតផលម្ហូបអាហារ (ទឹកប៉េងប៉ោះ សាច់បន្ទះ សាច់ក្រកសាច់ជ្រូក ផ្លែឈើ បន្លែ ទឹកដោះគោ ឈីស) រហូតដល់ឧបករណ៍កីឡា (ដំបងវាយកូនគោល ក្ដារជិះស្គីលើទឹក កង់) ឧបករណ៍តន្ដ្រី សម្លៀកបំពាក់កីឡា និងគ្រឿងសង្ហារិម។ នេះបើយោងតាមបញ្ជីផ្លូវការ។
ក្រុមសេដ្ឋវិទូនៅក្នុងវិទ្យាស្ថានសេដ្ឋកិច្ចអន្តរជាតិ Peterson មានមូលដ្ឋាននៅទីក្រុងវ៉ាស៊ីនតោនបានប៉ាន់ប្រមាណថា ទំនិញមានតម្លៃ ១១២ ពាន់លានដុល្លារនឹងត្រូវរងផលប៉ះពាល់។
សង្គ្រាមពាណិជ្ជកម្មដែលបានបង្កឡើងដោយលោក ត្រាំ ជាង ១ ឆ្នាំកន្លងមកនេះទទួលបានភាពភ្ញាក់ផ្អើលចុងក្រោយបំផុតកាលពីសប្ដាហ៍មុនជាមួយនឹងការប្រកាសរបស់អាមេរិកថា ទំនិញរបស់ប្រទេសចិនទាំងអស់នឹងជាកម្មវត្ថុនៃពន្ធនាំចូលនៅត្រឹមចុងឆ្នាំនេះ។
តួលេខឆ្នាំ ២០១៨ បង្ហាញថាទំនិញតម្លៃជាង ២៥០ ពាន់លានដុល្លារ នៃការនាំចេញរបស់ចិនសរុបទៅអាមេរិក ៥៤០ ពាន់លានដុល្លារ បានស្ថិតក្រោមវិធានការពន្ធនាំចូលរួចទៅហើយ។
សេចក្ដីប្រកាសរបស់លោក ត្រាំ កាលពីដើមខែនេះត្រូវបានឆ្លើយវិញពីទីក្រុងប៉េកាំងដែលថានឹងដាក់ពន្ធនាំចូលទំនិញអាមេរិក ៧៥ ពាន់លានដុល្លារ ចាប់ផ្ដើមជាផ្នែកៗនៅថ្ងៃទី ១ ខែកញ្ញាទៅ។
ក្រុមហ៊ុន និងក្រុមជំនាញអាមេរិករាប់រយបានអំពាវនាវឲ្យរដ្ឋបាលលោក ត្រាំ ពន្យារពេលពន្ធនាំចូលថ្មីនេះ ដោយលើកឡើងថាពន្ធនាំចូលទាំងនេះនឹងបំផ្លាញការងារ និងដាក់បន្ទុកលើអតិថិជន។
ប៉ុន្តែកាលពីថ្ងៃសុក្រលោក ត្រាំ បានឲ្យដឹងថា អ្នកដែលត្អូញត្អែរទាំងនោះគឺពួកគេខ្លួនឯងមួយផ្នែកមានកំហុស។
លោកបានសរសេរលើ Twitter ថា៖ «បណ្ដាក្រុមហ៊ុនដែលដំណើរការមិនល្អ និងខ្សោយកំពុងស្ដីបន្ទោសយ៉ាងរហ័សលើការយកពន្ធនាំចូលដ៏តូចតាចនេះជំនួសឲ្យខ្លួនឯងសម្រាប់ការគ្រប់គ្រងមិនល្អ វាគ្រាន់តែជាលេស»៕ LA