.jpg)
ក្រូចត្លុង នៅកោះទ្រង់ ខេត្តក្រចេះដែលជាផលិតផលកសិកម្មកម្ពុជាទី ៣ ដែលទទួលបានឋានៈ GI។ KOH TRONG POMELOS VIA FACEBOOK
ក្រចេះ: កសិករក្រូចត្លុង នៅកោះទ្រង់ ខេត្តក្រចេះ កំពុងពង្រីកការដាំដុះរបស់ខ្លួន បន្ទាប់ពីផ្លែឈើមួយនេះ ត្រូវបានចុះបញ្ជីជាផលិតផលសម្គាល់ភូមិសាស្ដ្រ (GI) ។ នេះបើយោងតាមសមាគមអ្នកផលិតផ្លែក្រូចត្លុងកោះទ្រង់ ខេត្តក្រចេះ។
ក្រូចត្លុងកោះទ្រង់ គឺជាផលិតផលកសិកម្មកម្ពុជាទី ៣ ដែលទទួលបានឋានៈ GI បន្ទាប់ពីដំណាំម្រេចកំពត និងស្ករត្នោតខេត្តកំពង់ស្ពឺ។
លោកស្រី ជា រីណា ប្រធានសមាគមអ្នកផលិតផ្លែក្រូចត្លុងកោះទ្រង់ ខេត្តក្រចេះ បានឲ្យដឹងថា ការដាំដុះក្រូចត្លុង នៅកោះនេះ មើលឃើញការកើនឡើង បន្ទាប់ពីដំណាំកសិកម្មមួយនេះ ត្រូវបានទទួលស្គាល់ជាផលិតផល GI ។
លោកស្រី បានថ្លែងថា៖ «កសិករក្រូចត្លុង នៅពេលនេះបង្ហាញចំណាប់អារម្មណ៍ ក្នុងការដាំដុះដំណាំនេះ ដោយសារតែវាបាននាំយកចង្វាក់តម្លៃសម្រាប់ផលិតផលនេះ»។ លោកស្រី បន្ថែមថា សមាគមនៅពេលបច្ចុប្បន្ន មានសមាជិក ១៥៥ គ្រួសារ។
ខណៈសមាគមនេះ មិនទាន់ធ្វើបច្ចុប្បន្នភាពទិន្នន័យនៅឡើយ លោកស្រី ជា រីណា បានឲ្យដឹងថា តួលេខកាលពីមុន ស្ដីពីការដាំដុះក្រូចត្លុង មានចំនួន ៣៥ ហិកតា ដែលមានដើមក្រូចត្លុងជាង ២ ០០០ ដើម ក្នុងចំណោម ១០ ម៉ឺនដើមអាចប្រមូលផលបាន។
លោកស្រីលើកឡើងថា៖ «[ទោះបីជាយើងមិនបានធ្វើបច្ចុប្បន្នភាពទិន្នន័យនៅឡើយក៏ដោយ] ក៏យើងកត់សម្គាល់ថា កសិករបានរក្សាការពង្រីកការដាំដុះរបស់ពួកគេ ខណៈតម្លៃកើនឡើង ២ ដង»។
លោកស្រី ជា រីណា ឲ្យដឹងថា តម្លៃកើនឡើងពី ១,៥ ដុល្លារដល់ ៣,៥ ដុល្លារ ក្នុង ១ ផ្លែ បន្ទាប់ពីផ្លែឈើនេះត្រូវបានចុះបញ្ជីជាផលិតផល GI កាលពីខែមិថុនាឆ្នាំនេះ។
លោកស្រីបញ្ជាក់ថា៖ «ទោះបីតម្លៃកើនឡើង ២ ដងធៀបនឹងផលិតផលមិនមែនGI ក៏ដោយ ប៉ុន្តែអតិថិជនរបស់យើង នៅតែបង្កើនការបញ្ជាទិញ ដោយសារតែយើងធានាគុណភាព ហើយពួកគេមានទំនុកចិត្តលើផលិតផល GI របស់យើង ដោយសារតែវាមានរសជាតិពិសេស ខុសពីផ្លែក្រូចត្លុង នៅក្នុងតំបន់ផ្សេងទៀត»។
លោក ដួង សំបាន ប្រធានការិយាល័យអភិវឌ្ឍន៍ពាណិជ្ជកម្ម នៅមន្ទីរពាណិជ្ជកម្មខេត្តក្រចេះ បានឲ្យដឹងថា ផ្លែក្រូចត្លុង នៅកោះទ្រង់ មានរសជាតិផ្អែម មានគ្រាប់តិច មានរាងពងក្រពើ ដែលខុសគ្នាទាំងស្រុងពីផ្លែក្រូចត្លុងផ្សេងទៀត។
លោកឲ្យដឹងថា ទាំងនេះគឺជាមូលហេតុចម្បងដែលវាទទួលបានឋានៈ GI។ លោកបានថ្លែងថា៖ «យើងចំណាយរយៈពេលជាច្រើនឆ្នាំ សម្រាប់ការត្រួតពិនិត្យ ផ្លែ និងដើម យើងព្យាយាមដាំដើមក្រូចត្លុង នៅក្រៅកោះនេះ ហើយផ្លែបានផ្ដល់រសជាតិខុសគ្នា»។
លោកបានលើកឡើងថា៖ «ដោយសារតែលក្ខណៈរបស់វា នោះជាមូលហេតុ ដែលផ្លែក្រូចត្លុងបានទទួលឋានៈ GI»។
លោក ដួង សំបាន ឲ្យដឹងថា នៅពេលនេះកសិករ យល់ដឹងពីអត្ថប្រយោជន៍នៃផលិតផល GI ខណៈតម្រូវការការប្រើប្រាស់ក្នុងស្រុកខ្ពស់ជាងការផ្គត់ផ្គង់។ លោកបានថ្លែងថា៖ «[នៅពេលនេះ] កសិករកំពុងព្យាយាមពង្រីក ការដាំដុះរបស់ពួកគេ ជាមួយជំនាញបច្ចេកទេស»៕LA
