ក្រុងវ៉ាស៊ីនតោនៈ ទីភ្នាក់ងារព័ត៌មានថាមពលសហរដ្ឋអាមេរិក (EIA) បានឲ្យដឹងកាលពីថ្ងៃចន្ទថា សមត្ថភាពនាំចេញឧស្ម័នធម្មជាតិ (LNG) របស់សហរដ្ឋអាមេរិក ត្រូវបានរំពឹងថា នឹងកើនឡើងដល់ ៨,៩ ពាន់លានហ្វ៊ីត គុប (ប្រហែល ២៥២ លានម៉ែត្រគុប) ក្នុង ១ ថ្ងៃ នៅដំណាច់ឆ្នាំ ២០១៩។
ទីភ្នាក់ងារ EIA បានឲ្យដឹងថា ការណ៍នេះនឹងធ្វើឲ្យសហរដ្ឋអាមេរិក ក្លាយជាប្រទេសនាំចេញឧស្ម័នធម្មជាតិធំទី ៣ នៅក្នុងពិភពលោក ស្ថិតនៅពីក្រោយប្រទេស អូស្រ្តាលី និងកាតា។
ទីភ្នាក់ងារ EIA បានឲ្យដឹងថា សមត្ថភាពនាំចេញឧស្ម័នធម្មជាតិ (LNG) របស់សហរដ្ឋអាមេរិកមាន ៣,៦ ពាន់លានហ៊្វីបគុប ក្នុង ១ ថ្ងៃនាពេលបច្ចុប្បន្ន ហើយមានការរំពឹងថានឹងកើនឡើងដល់ ៤,៩ ពាន់លានហ៊្វីបគុបក្នុង ១ ថ្ងៃនៅចុងឆ្នាំនេះ ដោយសាររោងចក្រឧស្ម័នធម្មជាតិថ្មីចំនួន ២ បានបើកដំណើរការ។
ទីភ្នាក់ងារ EIA បានឲ្យដឹងទៀតថា រោងចក្រថ្មីទាំង ២ នេះគឺរោងចក្រ Sabine Pass Train 5 នៅរដ្ឋ Louisiana និងរោងចក្រ Corpus Christi LNG Train 1 នៅរដ្ឋ Texas បានចាប់ផ្តើមផលិតកម្មនៅឆ្នាំនេះ ដែលជាការចាប់ផ្តើមមុនកាលកំណត់។
EIA ក៏បានកត់សម្គាល់ផងដែរថា រោងចក្រទាំង ២ នេះ ត្រូវបានរំពឹងថា នឹងនាំចេញឧស្ម័នក្នុងរយៈពេល ២-៣ សប្តាហ៍ខាងមុខទៀត។
អាមេរិកបានចាប់ផ្តើមនាំចេញឧស្ម័នធម្មជាតិពីរដ្ឋនានារបស់ប្រទេសនេះ កាលពីខែកុម្ភៈ ឆ្នាំ ២០១៦។ នេះបើយោងតាម EIA។
ទីភ្នាក់ងារ EIA គឺជាផ្នែកមួយរបស់ក្រសួងថាមពលអាមេរិក។ ទីភ្នាក់ងារនេះទទួលខុសត្រូវលើការប្រមូល វិភាគ និងផ្សព្វផ្សាយព័ត៌មានថាមពល៕ AFP/KC