សិង្ហបុរីៈ សិង្ហបុរី បានកាត់បន្ថយការព្យាករកំណើនសេដ្ឋកិច្ចសម្រាប់ឆ្នាំនេះកាលពីថ្ងៃចន្ទ ដោយសារវីរុសកូរ៉ូណាថ្មីដែលកំពុងធ្វើឲ្យប៉ះពាល់ដល់ការមកដល់របស់ភ្ញៀវទេសចរអន្តរជាតិ និងការធ្វើពាណិជ្ជកម្ម។
សិង្ហបុរី គឺជាកន្លែងមួយក្នុងចំណោមកន្លែងដែលទទួលរងផលប៉ះពាល់អាក្រក់បំផុតនៅក្រៅប្រទេសចិនពីវីរុសកូរ៉ូណាថ្មី ដោយមានករណីឆ្លង ៧៥ ត្រូវបានរកឃើញមកដល់ពេលនេះ ខណៈចិនមានការឆ្លងជាង ៧ ម៉ឺនករណី។
សិង្ហបុរីបានទម្លាក់ការព្យាករកំណើនសេដ្ឋកិច្ច ឆ្នាំ ២០២០ របស់ខ្លួនមកនៅ ចន្លោះពី -០,៥ ដល់ ១,៥ ភាគរយ។
ការព្យាករកាលពីខែវិច្ឆិកាបានរំពឹងថា កំណើនសេដ្ឋកិច្ចនឹងមានអត្រាពី ០,៥ ភាគរយ ដល់ ២,៥ ភាគរយ។
ក្រសួងពាណិជ្ជកម្មបានឲ្យដឹងក្នុងសេចក្ដីប្រកាសព័ត៌មានមួយថា៖ «ការរីករាលដាលវីរុសកូរ៉ូណាបានប៉ះពាល់ដល់ប្រទេសចិន សិង្ហបុរី និងបណ្ដាប្រទេសជាច្រើនទៀតជុំវិញពិភពលោក»។
សេចក្ដីប្រកាសព័ត៌មាននេះបន្តថា៖ «នៅអាស៊ី ការរីករាលដាលទំនងជានឹងរារាំងចក្ខុវិស័យកំណើនសេដ្ឋកិច្ចរបស់ប្រទេស ចិន និងបណ្ដាប្រទេសដែលរងផលប៉ះពាល់ផ្សេងទៀតនៅឆ្នាំនេះ»។
ការមកដល់របស់ភ្ញៀវទេសចរបានធ្លាក់ចុះរួចហើយ ខណៈការនាំចេញត្រូវរំពឹងថានឹងទទួលផលប៉ះពាល់ ហើយការប្រើប្រាស់ក្នុងស្រុកទំនងជានឹងធ្លាក់ចុះដោយសារប្រជាជនកាត់បន្ថយលើការទិញទំនិញ និងការចេញទៅញុំាអាហារខាងក្រៅ។ នេះបើយោងតាមសេចក្ដីប្រកាសព័ត៌មាន។
ប្រទេសចិនគឺជាប្រភពភ្ញៀវទេសចរឈានមុខគេ និងជាទិសដៅនាំចេញដ៏សំខាន់មួយរបស់ប្រទេសសិង្ហបុរី។
លោក Song Seng Wun នៅធនាគារឯកជន CIMB បានព្រមានថា ប្រទេសសិង្ហបុរីកំពុងស្ថិតក្នុងគ្រោះថ្នាក់នៃការធ្លាក់ចូលទៅក្នុងការដើរថយក្រោយនៃសេដ្ឋកិច្ច។
លោកបន្តថា៖ «តាមទស្សនៈគណិតវិទ្យា វាអាចទៅរួចដោយសារតែធម្មជាតិនៃការបញ្ចូលគ្នានៃចង្វាក់ផ្គត់ផ្គង់ពិភពលោក និងផលប៉ះពាល់ដោយសារការធ្លាក់ចុះសេដ្ឋកិច្ចនៅប្រទេស ចិន ដែលអាចមានផលប៉ះពាល់យ៉ាងធំធេងលើសេដ្ឋកិច្ចដែលផ្ដោតលើពាណិជ្ជកម្មខ្នាតតូចដូចជាប្រទេស សិង្ហបុរី»។
ក្នុងនាមជាសេដ្ឋកិច្ចខ្នាតតូច និងបើកចំហ សិង្ហបុរីជារឿយៗគឺជាប្រទេសដំបូងគេដែលទទួលរងផលប៉ះពាល់ក្នុងអំឡុងវិបត្តិពិភពលោក ប៉ុន្តែវាក៏ស្ទុះងើបឡើងវិញយ៉ាងរហ័សផងដែរនៅពេលស្ថានភាពល្អប្រសើរឡើងវិញ។
លោកនាយករដ្ឋមន្ដ្រី Lee Hsien Loong កាលពីសប្ដាហ៍មុនបានព្រមានផលប៉ះពាល់ដោយសារតែវីរុសនេះ អាក្រក់ខ្លាំងជាងការរីករាលដាលវីរុសជំងឺផ្លូវដង្ហើមធ្ងន់ធ្ងរ (SARS) កាលពីឆ្នាំ ២០០៣ ខណៈសេដ្ឋកិច្ចក្នុងតំបន់ត្រូវបានតភ្ជាប់កាន់តែជិតស្និទ្ធ និងបង្កើនលទ្ធភាពនៃការដើរថយក្រោយនៃសេដ្ឋកិច្ចសម្រាប់ប្រទេស សិង្ហបុរី។
លោកបានប្រាប់ក្រុមអ្នកយកព័ត៌មានកាលពីថ្ងៃសុក្រថា៖ «ខ្ញុំគិតថា ផលប៉ះពាល់នឹងមានគួរឲ្យកត់សម្គាល់យ៉ាងហោចណាស់ក្នុងរយៈពេល ២ ទៅ ៣ ត្រីមាសក្រោយ។ ខ្ញុំមិនអាចនិយាយថា តើយើងនឹងមានការដើរថយក្រោយនៃសេដ្ឋកិច្ច ឬអត់នោះទេ វាអាចទៅរួច ប៉ុន្តែច្បាស់លាស់សេដ្ឋកិច្ចរបស់យើងនឹងទទួលរងផលប៉ះពាល់»។
សិង្ហបុរីបានទទួលរងផលប៉ះពាល់យ៉ាងខ្លាំងពីការការរីករាលដាលនៃជំងឺ SARS ដែលបានសម្លាប់មនុស្សរាប់រយនាក់ បន្ទាប់ពីការផ្ទុះឡើងក្នុងប្រទេស ចិន ប៉ុន្តែបន្ទាប់ពីនោះសេដ្ឋកិច្ចសិង្ហបុរីបានស្ទុះងើបឡើងវិញយ៉ាងលឿន។
លោក Lawrence Wong រដ្ឋមន្ដ្រីក្រសួងអភិវឌ្ឍន៍ជាតិកាលពីសប្ដាហ៍មុន បានបង្ហាញថវិកា «ដ៏រឹងមាំ» ដែលគ្រោងនឹងផ្ដល់កាលពីថ្ងៃអង្គារ ដើម្បីប្រឆាំងនឹងផលប៉ះពាល់ដោយសារវីរុសកូរ៉ូណាថ្មី៕ LA