ក្រុងតូក្យូៈ ផលិតផលក្នុងស្រុកសរុប (GDP) របស់ជប៉ុនបានកើនឡើង ០,៥ ភាគរយនៅត្រីមាសទី១ ឆ្នាំនេះ ដែលប្រសើរជាងការរំពឹងទុក ទោះបីជាក្រុមអ្នកវិភាគបានព្រមានថា ប្រទេសមានសេដ្ឋកិច្ចឈានមុខគេទី ៣ របស់ពិភពលោកមួយនេះនៅតែកំពុងប្រឈមនឹងឧបសគ្គ ជាច្រើនក្តី។ នេះបើយោងតាមទិន្នន័យផ្លូវការកាលពីថ្ងៃចន្ទ។
នេះជាកំណើន ២ ត្រីមាសជាប់គ្នាសម្រាប់សេដ្ឋកិច្ចជប៉ុន បន្ទាប់ពីកំណើន ០,៤ ភាគរយ កាលពីត្រីមាសទី៤ ឆ្នាំមុន។
លទ្ធផលនេះមានភាពផ្ទុយពីការរំពឹងដែលថា មិនល្អដោយក្រុមអ្នកវិភាគ ដែលបានព្យាករថា ធ្លាក់ចុះបន្តិចនៅដើមឆ្នាំ ២០១៩ ប៉ុន្តែសេដ្ឋវិទូមួយចំនួនបានព្រមានថា សញ្ញានៃភាពចុះខ្សោយនៅតែបង្កប់ក្នុងតួលេខវិជ្ជមាននេះនៅឡើយ។
លោក Takeshi Minami ប្រធានសេដ្ឋវិទូនៅវិទ្យាស្ថានស្រាវជ្រាវ Norinchukin Research Institute បានថ្លែងថា៖ «តួលេខមានភាពល្អលើសពីការរំពឹងទុក ប៉ុន្តែប្រសិនបើអ្នកពិនិត្យកាន់តែដិតដល់ ទិន្នន័យនេះមិនមែនជាអ្វី ដែលយើងគួរតែសប្បាយរីករាយនោះទេ»។
លោកបានប្រាប់ទីភ្នាក់ងារព័ត៌មាន AFP ថា៖ «កាន់តែច្បាស់ជាងនេះ ទិន្នន័យនេះបានបង្ហាញយ៉ាងច្បាស់ពីចំណុចខ្សោយក្នុងសេដ្ឋកិច្ចនេះ ដោយសារការប្រើប្រាស់ និងវិនិយោគរបស់សាជីវកម្មលើរោងចក្រ និងឧបករណ៍មិនល្អ»។
ការចំណេញសុទ្ធបានរួមចំណែកយ៉ាងខ្លាំងដល់តួលេខចុងក្រោយបំផុតនេះ ប៉ុន្តែគ្រាន់តែដោយសារការធ្លាក់ចុះក្នុងការនាំចូលមានច្រើនជាងការធ្លាក់ចុះផ្នែកនាំចេញប៉ុណ្ណោះ។ នេះបើយោងតាមទិន្នន័យពីខុទ្ទកាល័យគណៈរដ្ឋមន្ដ្រី។
លោក Yoshiki Shinke ប្រធានសេដ្ឋវិទូនៅវិទ្យាស្ថានស្រាវជ្រាវ Dai-ichi Life បានថ្លែងថា៖ «មិនមានសញ្ញាច្បាស់លាស់ដែលបង្ហាញពីការធ្លាក់ចុះដល់បាតនៃការនាំចេញ ការផលិត និងទំនុកចិត្តអាជីវកម្មនៅឡើយទេ ហើយដូច្នេះខ្ញុំមិនគិតថា យើងអាចមានសុទិដ្ឋិនិយមអំពីអនាគតនៃសេដ្ឋកិច្ចនោះទេ»។
ទិន្នន័យចុងក្រោយបំផុតនេះ កំពុងត្រូវបានឃ្លាំមើលយ៉ាងយកចិត្តទុកដាក់ ក្នុងគ្រាដែលមានការរំពឹងទុកថា កំណើនសេដ្ឋកិច្ចខ្សោយអាចជំរុញឲ្យរដ្ឋាភិបាលរបស់លោកនាយករដ្ឋមន្ដ្រី ស៊ីនហ្សូ អាបេ ពន្យារពេលក្នុងការចាត់វិធានការដំឡើងពន្ធលើការលក់រាយដែលគ្រោងនឹងធ្វើឡើងជាលើកទី៣៕ AFP/LA