ក្រុងដូហាៈ មូលនិធិរូបិយវត្ថុអន្តរជាតិ (IMF) បានឲ្យដឹងកាលពីថ្ងៃចន្ទថា សេដ្ឋកិច្ចរបស់ប្រទេស កាតា បានបង្ហាញពីការស្ទុះងើបឡើងក្នុងគ្រាដែលមានការដាក់ហ៊ុមព័ទ្ធសេដ្ឋកិច្ចដោយប្រទេសជិតខាងរបស់ខ្លួន និងការធ្លាក់ចុះតម្លៃប្រេង។
ទីក្រុងដូហា បានទទួលរងគ្រោះដោយសារការធ្វើពហិកាផ្នែកសេដ្ឋកិច្ចដែលដឹកនាំដោយប្រទេស អារ៉ាប៊ីសាអ៊ូឌីត អស់រយៈពេល ២ ឆ្នាំ មកនេះដោយសារការចោទប្រកាន់ថា ប្រទេសនេះបានគាំទ្រពួកចលនាអ៊ិស្លាមនិយម និងប្រទេស អ៊ីរ៉ង់ ពោលគឺជាការចោទប្រកាន់ដែលច្រានចោលដោយកាតា។
មូលនិធិ IMF បានឲ្យដឹងក្នុងសេចក្តីថ្លែងការណ៍មួយថា៖ «លទ្ធផលសេដ្ឋកិច្ចមានភាពប្រសើរឡើងក្នុងឆ្នាំ ២០១៨។ សេដ្ឋកិច្ចរបស់ប្រទេស កាតា បានទប់ស្កាត់ដោយជោគជ័យនូវបញ្ហានានាដែលកើតចេញពីការធ្លាក់ចុះតម្លៃប្រេងឆៅចន្លោះឆ្នាំ ២០១៤-២០១៦។
មូលនិធិ IMF បានឲ្យដឹងទៀតថា៖ «កំណើនផលិតផលក្នុងស្រុកសរុបពិតត្រូវបានប៉ាន់ប្រមាណថា មានអត្រា ២,២ ភាគរយ កើនឡើងពី ១,៦ ភាគរយ ក្នុងឆ្នាំ ២០១៧»។
សេចក្តីថ្លែងការណ៍របស់មូលនិធិ IMF ដែលធ្វើឡើងត្រឹមតែ ២ ថ្ងៃ មុនពេលខួបឆ្នាំទី២ នៃការហ៊ុមព័ទ្ធសេដ្ឋកិច្ចរបស់ប្រទេសនេះពីសំណាក់ប្រទេសជិតខាងរបស់ខ្លួននោះគឺជាការវាយតម្លៃសេដ្ឋកិច្ចជាប្រចាំមួយដែលទាមទារឲ្យធ្វើឡើងដោយ IMF ដោយសារប្រទេស កាតា ជាសមាជិករបស់មូលនិធិនេះ។
ប្រទេស អារ៉ាប៊ីសាអ៊ូឌីត រួមជាមួយសម្ព័ន្ធមិត្តរបស់ខ្លួនដូចជាប្រទេស អារ៉ាប៊ីសាអ៊ូឌីត អេហ្ស៊ីប និងបារ៉ែន បានចាត់វិធានការសេដ្ឋកិច្ចមួយចំនួនប្រឆាំងនឹងទីក្រុងដូហាចាប់ពីថ្ងៃទី ៥ ខែ មិថុនា ឆ្នាំ ២០១៧ មកក្នុងគោលបំណងបង្ខំឲ្យមានការផ្លាស់ប្តូរឥរិយាបថរបស់ប្រទេស កាតា។
ជម្លោះជាសាធារណៈមួយរវាងភាគីទាំង ២ បានផ្ទុះឡើងប៉ុន្មានថ្ងៃបន្ទាប់ពីបញ្ចប់កិច្ចពិភាក្សាថ្នាក់តំបន់មួយដែលរៀបចំធ្វើឡើងដោយព្រះមហាក្សត្រ Salman របស់ប្រទេស អារ៉ាប៊ីសាអ៊ូឌីត ក្នុងទីក្រុង Mecca ជុំវិញការកើនឡើងភាពតានតឹងជាមួយប្រទេស អ៊ីរ៉ង់ ដែលធ្វើឲ្យក្តីសង្ឃឹមថានឹងមានការស្តារទំនាក់ទំនងឡើងវិញកាន់តែឃ្លាតឆ្ងាយ។
IMF បានប្រកាសថា វិស័យធនាគាររបស់កាតា មានសុខភាពល្អ ប៉ុន្តែមានសេចក្តីរាយការណ៍ថា បានថមថយក្នុងទីផ្សារអចលនទ្រព្យ។
តម្លៃអចលនទ្រព្យបានធ្លាក់ចុះ ១៥ ភាគរយ ក្នុងអំឡុងឆ្នាំ ២០១៧-២០១៨ បន្ទាប់ពីកើនឡើង ៨២ ភាគរយ អំឡុងឆ្នាំ ២០១២ ដល់ ២០១៦៕ AFP/KC