.jpg)
ទិដ្ឋភាពនៅកំពង់ផែរបស់សិង្ហបុរី។ សិង្ហបុរីពឹងផ្អែកលើការនាំចេញខ្លាំង។ រូបថត AFP
សិង្ហបុរីៈ កំណើនសេដ្ឋកិច្ចរបស់ប្រទេស សិង្ហបុរី ដែលពឹងផ្អែកលើការនាំចេញ បានទទួលរងការធ្លាក់ចុះដ៏គួរឲ្យភ្ញាក់ផ្អើលនៅត្រីមាសទី២ ឆ្នាំនេះ ដែលបញ្ចូនសារព្រមានថា ភាពតានតឹងផ្នែកពាណិជ្ជកម្មរវាងសហរដ្ឋអាមេរិក និងប្រទេស ចិន កំពុងធ្វើឲ្យប៉ះពាល់ដល់សេដ្ឋកិច្ចរបស់ពិភពលោក។ នេះបើយោងតាមទិន្នន័យផ្លូវការចេញផ្សាយនៅចុងសប្តាហ៍មុន។
ផលិតផលក្នុងស្រុកសរុបរបស់បុរីរដ្ឋនេះបានធ្លាក់ចុះ ៣,៤ ភាគរយ នៃអត្រាប្រចាំឆ្នាំ ដែលធ្លាក់ចុះខ្លាំងពីកំណើន ៣,៨ ភាគរយ នៅត្រីមាសទី១ ឆ្នាំនេះ និងពីការព្យាករដែលថាមានកំណើនតិចតួច។
ក្រសួងពាណិជ្ជកម្មសិង្ហបុរីបានឲ្យដឹងថា បើគិតពីមូលដ្ឋានប្រៀបធៀបឆ្នាំលើឆ្នាំវិញ សេដ្ឋកិច្ចនៅត្រីមាសទី២ នេះកើនត្រឹមតែ ០,១ ភាគរយ ប៉ុណ្ណោះ ដែលបង្ហាញពីអត្រាកំណើនទាបបំផុតគិតចាប់ពីវិបត្តិហិរញ្ញវត្ថុពិភពលោកឆ្នាំ ២០០៩ មក ហើយក៏ទាបខ្លាំងជាងការព្យាករផងដែរ។
ជាមួយនឹងការពឹងផ្អែកខ្លាំងលើពាណិជ្ជកម្មបរទេស សិង្ហបុរីជាញឹកញាប់ត្រូវបានគេមើលឃើញថា ជាសូចនាករមួយនៃសុខភាពសេដ្ឋកិច្ចពិភពលោក។
តួលេខអវិជ្ជមាននេះ គឺជាសញ្ញាចុងក្រោយបំផុតដែលបង្ហាញថា ភាពតានតឹងផ្នែកពាណិជ្ជកម្មរវាងទីក្រុងវ៉ាស៊ីនតោន និងទីក្រុងប៉េកាំង កំពុងមានផលប៉ះពាល់ខ្លាំងលើប្រទេសមានសេដ្ឋកិច្ចពឹងផ្អែកលើការនាំចេញនៅទូទាំងពិភពលោក។
លោក Stephen Innes បម្រើការងារនៅក្រុមហ៊ុន Vanguard Markets បានថ្លែងថា៖ «សង្គ្រាមពាណិជ្ជកម្មដែលកំពុងបន្តកើតមាននេះកំពុងបង្កផលប៉ះពាល់អវិជ្ជមានដល់វិស័យផលិតកម្ម និងនាំចេញចម្បងរបស់សិង្ហបុរី»។
លោក Chua Hak Bin សេដ្ឋវិទូប្រចាំក្រុមហ៊ុន Maybank Kim Eng Research ក្នុងប្រទេស សិង្ហបុរី បានថ្លែងថា៖ «ប្រទេសសិង្ហបុរី ងាយរងគ្រោះខ្លាំង មានការបើកចំហខ្លាំង និងមានភាពរសើបទៅនឹងពាណិជ្ជកម្ម»។
លោកបន្ថែមថា ទិន្នន័យ «ចង្អុលទៅកាន់ហានិភ័យនៃការធ្លាក់ចុះសេដ្ឋកិច្ចកាន់តែខ្លាំងស្រាប់ប្រទេសផ្សេងទៀតនៅក្នុងតំបន់អាស៊ី»។
វិស័យផលិតកម្មដ៏សំខាន់របស់សិង្ហបុរីបានទទួលរងគ្រោះខ្លាំង ដោយធ្លាក់ចុះ ៣,៨ ភាគរយ នៅត្រីមាសទី២ ធៀបនឹងរយៈពេលដូចគ្នាកាលពីឆ្នាំមុន ខណៈដែលនៅត្រីមាសទី១ បានធ្លាក់ចុះតែ ០,៤ ភាគរយ ប៉ុណ្ណោះ៕ AFP/KC
