.jpg)
ពិធីបើកសម្ពោធព្រលានយន្តហោះ Rajapaksa កាលពីឆ្នាំ ២០១៣។ រូបថត AFP
ក្រុងកូឡុំបូៈ ក្រសួងហិរញ្ញវត្ថុរបស់ប្រទេសស្រីលង្កាបានរំឭកកាលពីថ្ងៃអាទិត្យថា ប្រទេសស្រីលង្កាកំពុងដើរឆ្ពោះទៅរកវិបត្តិបំណុលមួយដោយសារគម្រោងអភិវឌ្ឍន៍ដែលចំណាយប្រាក់ច្រើនមួយចំនួនដែលត្រូវបានគ្រប់គ្រងដោយរដ្ឋាភិបាលមុនបានបង្កឲ្យមានការសងបំណុលក្នុងបរិមាណច្រើនបំផុត។
លោក Mangala Samaraweera រដ្ឋមន្ត្រីក្រសួងហិរញ្ញវត្ថុស្រីលង្កាបានឲ្យដឹងថា ការទូរទាត់ប្រាក់ដើម និងប្រាក់ការនឹងកើនឡើងដល់ ២,៨៤ ពាន់លានដុល្លារក្នុងឆ្នាំនេះភាគច្រើនសងបំណុលសម្រាប់គម្រោងដែលចំណាយប្រាក់ច្រើន ក្រោមការដឹកនាំរបស់អតីតប្រធានាធិបតី Mahinda Rajapakse។
លោក Samaraweera បានឲ្យដឹងក្នុងសេចក្តីថ្លែងការណ៍មួយថា៖ «វិបត្តិនេះនឹងកាន់តែមានស្ថានភាពអាក្រក់នៅឆ្នាំក្រោយ»។ លោកបានបញ្ជាក់ថាការសងបំណុលនឹងកើនឡើងដល់ ៤,២៨ ពាន់លានដុល្លារនៅឆ្នាំ ២០១៩។
លោកបានឲ្យដឹងទៀតថា៖ «ការសងបំណុលនឹងចំណាយលើបំណុលដែលបានខ្ចីក្នុងអំឡុងពេលដឹកនាំរបស់លោក Rajapakse ដែលចំណាយខ្ជះខ្ជាយ ការកេងបន្លំ និងអំពើពុករលួយដែលត្រូវបានប្រព្រឹត្តដោយបក្ខពួករបស់លោក Rajapakses»។
ធនាគារកណ្តាលរបស់ប្រទេសនេះឲ្យដឹងថា ប្រាក់បម្រុងជារូបិយប័ណ្ណបរទេសមានចំនួនសរុប ៩,៩ ពាន់លានដុល្លារនៅចុងខែមេសា។
លោក Samaraweera មានប្រសាសន៍ថារដ្ឋបាលរបស់លោក Rajapakse ទទួលបានឥណទានដែលមានការប្រាក់ខ្ពស់ចំនួនពីរលើកដែលមានចំនួន ១,៥ ពាន់លានដុល្លារនៅឆ្នាំចុងក្រោយនៃការកាន់អំណាចរបស់លោករយៈពេលមួយទសវត្សរ៍របស់ខ្លួន។
ក្រុមមន្ត្រីបានឲ្យដឹងថាលោក Rajapakse បានពឹងផ្អែកខ្លាំងលើប្រទេសចិនដើម្បីផ្តល់ហិរញ្ញប្បទានគម្រោងហេដ្ឋារចនាសម្ព័ន្ធធំៗរបស់លោក តែគម្រោងជាច្រើនបានក្លាយជាបន្ទុកលើសេដ្ឋកិច្ចដែលមានទំហំ ៨៧ ពាន់លានដុល្លាររបស់ស្រីលង្កា។
រដ្ឋាភិបាលដែលបណ្តេញលោក Rajapakse ចេញពីតំណែងកាលពីឆ្នាំ ២០១៥ ត្រូវបង្ខំចិត្តជួលឲ្យប្រទេសចិននូវកំពង់ផែដែលខាតបង់ច្រើននៅទីក្រុង Hambantota ភាគខាងត្បូងប្រទេសនេះ។
អាកាសយានដ្ឋានអន្តរជាតិមួយត្រូវបានសាងសង់ឡើងដោយដាក់ឈ្មោះរបស់លោក Rajapakse បានជួបនឹងជោគវាសនាដូចគ្នានេះដែរ ដោយមានប្រាក់ចំណូលមិនគ្រប់គ្រាន់ ដើម្បីឆ្លើយតបនឹងចំណាយប្រាក់បៀវត្សរ៍បុគ្គលិក។
មានតែក្រុមហ៊ុនអាកាសចរណ៍មួយប៉ុណ្ណោះដែលប្រតិបត្តិការជើងហោះហើរអន្តរជាតិចេញពីអាកាសយានដ្ឋាន Rajapaksa នេះហើយបំណងធ្វើឯកជនីនយកម្មអាកាសយានដ្ឋាននេះមិនមានការវិវឌ្ឍអ្វីឡើយ។
បច្ចុប្បន្នប្រទេសស្រីលង្កាកំពុងប្រើប្រាស់ថវិកាសង្គ្រោះរយៈពេលបីឆ្នាំតម្លៃ ១,៥ ពាន់លានដុល្លារដែលបានចរចាជាមួយនឹងមូលនិធិរូបិយវត្ថុអន្តរជាតិកាលពីខែមិថុនាឆ្នាំ ២០១៦ បន្ទាប់ពីបានប្រឈមនឹងវិបត្តិតុល្យភាពនៃការទូទាត់។
រដ្ឋាភិបាលស្រីលង្កាបានដំឡើងថ្លៃប្រេងក្នុងស្រុកយ៉ាងលឿននៅដើមខែនេះ បន្ទាប់ពីមានសម្ពាធពីមូលនិធិ IMF ហើយធនាគារកណ្តាលរបស់ប្រទេសនេះបានកាត់បន្ថយបន្ទុកនៃការឧបត្ថម្ភដ៏ច្រើនទៅលើសេដ្ឋកិច្ចដែលកំពុងជួបការលំបាករបស់ខ្លួន។
IMF ឲ្យដឹងថាខ្លួននឹងបញ្ចេញកញ្ចប់ថវិកាបន្ទាប់នៃថវិកាសង្គ្រោះរបស់ខ្លួនឲ្យបានលុះត្រាតែស្រីលង្កាកែសម្រួលតម្លៃប្រេងដោយផ្អែកលើការចំណាយផលិតកម្ម៕ BP
