.jpg)
ក្រុមហ៊ុនផ្សារមូលបត្រកម្ពុជា គ្រោងនឹងចុះបញ្ជីគ្រឹះស្ថានមីក្រូហិរញ្ញវត្ថុហត្ថាកសិករ ក្នុងនាមក្រុមហ៊ុនទី ៦ របស់ខ្លួន។ ហុង មិនា
ភ្នំពេញៈ គ្រឹះស្ថានមីក្រូហិរញ្ញវត្ថុ ហត្ថាកសិករលីមីតធីត (HKL) កាលពីថ្ងៃម្សិលមិញបានរៀបចំកម្មវិធីរ៉ូដសូ (ផ្សព្វផ្សាយ) សម្រាប់ការបោះផ្សាយសញ្ញាបណ្ណសាជីវកម្ម ដើម្បីបង្ហាញពីឱកាសវិនិយោគទៅកាន់វិនិយោគិនសក្តានុពល ដោយរំពឹងថានឹងប្រមូលមូលនិធិ ១២០ ពាន់លានរៀល (៣០ លានដុល្លារ) ពីទីផ្សារមូលធនបំណុលកម្ពុជា។
ក្រុមហ៊ុនគ្រោងបោះផ្សាយសញ្ញាបណ្ណសាជីវកម្ម ១,២ លានបណ្ណ ក្នុងតម្លៃ ១០ ម៉ឺនរៀល (២៥ ដុល្លារ) ក្នុងមួយសញ្ញាបណ្ណ ដោយមានអត្រាគូប៉ុង (ការប្រាក់) ពី ៧,៥ ទៅ ៨,៥ ភាគរយក្នុងមួយឆ្នាំ ដែលមានរយៈពេល ៣ ឆ្នាំ។
លោក ហួត អៀងតុង ប្រធានអគ្គនាយកគ្រឹះស្ថានមីក្រូហិរញ្ញវត្ថុ ហត្ថាកសិករ បានថ្លែងថា ការបោះផ្សាយសញ្ញាបណ្ណនេះរំពឹងនឹងទទួលបានជោគជ័យ ទោះវាជាទីផ្សារថ្មីសម្រាប់កម្ពុជាក៏ដោយ ខណៈមានវិនិយោគិនធំៗមួយចំនួនបានបង្ហាញការប្តេជ្ញាចិត្តវិនិយោគរួចហើយ។
លោកបានថ្លែងថា៖ «នៅពេលយើងចាប់ផ្តើមរៀបចំ [បោះផ្សាយសញ្ញាបណ្ណ] គឺមានវិនិយោគិនជាច្រើនមកទាក់ទងជាមួយហត្ថាកសិករយើង ដើម្បីវិនិយោគលើសញ្ញាបណ្ណរបស់ហត្ថាកសិករ»។
ការបោះផ្សាយសញ្ញាបណ្ណសាជីវកម្មរបស់ហត្ថាកសិករ បង្ហាញពីការចាប់កំណត់ទីផ្សារមូលធនបំណុលក្នុងស្រុក។
លោក Shuzo Shikata នាយកប្រតិបត្តិក្រុមហ៊ុន អេសប៊ីអាយ រ៉ូយ៉ាល់ ស៊ីឃ្យួរឹធី ដែលជាក្រុមហ៊ុនធានាទិញមូលបត្រតែមួយគត់នៃសញ្ញាបណ្ណសាជីវកម្មរបស់ហត្ថាកសិករ បានថ្លែងថា វានឹងបង្កើតបានជាប្រភពមូលនិធិថ្មី និងប្រកបដោយចីរភាពមួយសម្រាប់ក្រុមហ៊ុននានាបន្តរីកចម្រើន។
លោកបន្តថា៖ «សញ្ញាបណ្ណនេះ ក៏ជួយបង្កើតទីផ្សារមួយដែលកាន់តែមានថាមពល ដែលវិនិយោគិនមានឧបករណ៍ និង យុទ្ធសាស្រ្តកាន់តែច្រើនសម្រាប់ វិនិយោគសាច់ប្រាក់»។
សាជីវកម្មហិរញ្ញវត្ថុកម្ពុជា (FIC) បានបង្ហាញការប្តេជ្ញាចិត្តរួចហើយក្នុងការទិញសញ្ញាបណ្ណនេះក្នុងទឹកប្រាក់រហូតដល់ ៨០ ពាន់លានរៀល (២០លានដុល្លារ) ខណៈធនាគារវឌ្ឍនៈសម្រេចចិត្ត វិនិយោគ ២០ ពាន់លានរៀល (ប្រហែល ៥ លានដុល្លារ)។
ធនាគារកម្ពុជាពាណិជ្ជ និងក្រុមហ៊ុនធានារ៉ាប់រងបន្តកម្ពុជា ក៏បានសន្យាវិនិយោគជាមួយនឹងសញ្ញាបណ្ណនេះផងដែរ។
លោក Chan Kok Choy អគ្គនាយកធនាគារវឌ្ឍនៈ បានឲ្យដឹងថា ការសម្រេចចិត្តនេះបង្ហាញការគាំទ្រដល់ទីផ្សារបណ្ណបំណុលនេះ។ លោកថ្លែងថា៖ «ពិតណាស់ យើងក៏កោតសរសើរចំពោះលទ្ធផលហិរញ្ញវត្ថុ កំណត់ត្រាល្អ ការគ្រប់គ្រងល្អ ម្ចាស់ភាគហ៊ុនល្អ និងចក្ខុវិស័យល្អរបស់ហត្ថាកសិករផងដែរ»។
ក្រុមហ៊ុននឹងរៀបចំធ្វើបរិវិសកម្មចាប់ពីថ្ងៃទី ២៤ ដល់ថ្ងៃទី ៣១ ខែតុលា ខណៈការចុះបញ្ជីនៅផ្សារមូលបត្រកម្ពុជាគ្រោងធ្វើឡើងនៅថ្ងៃទី ១ ខែវិច្ឆិកា។
វិនិយោគិនត្រូវវិនិយោគយ៉ាងហោច ៥ សែនដុល្លារក្នុងការទិញមូលបត្របំណុលក្នុងទីផ្សារដំបូង(ដំណាក់កាល រ៉ូដសូ និងបរិវិសកម្ម) និងបង្កើនទឹកប្រាក់ម្តង ១ សែនដុល្លារសម្រាប់ការវិនិយោគបន្ថែម បើវិនិយោគិនណាចង់ទិញសញ្ញាបណ្ណបន្ថែមទៀត៕LA
