ក្រុងឡុងដ៍ៈ ចក្រភពអង់គ្លេសបានឲ្យដឹងនៅដើមសប្តាហ៍នេះថា ខ្លួននឹងបញ្ចប់ភ្លាមៗនូវការធ្វើដំណើរដោយសេរីសម្រាប់មនុស្សមកពីសហភាពអឺរ៉ុប បន្ទាប់ពីអង់គ្លេសចាកចេញពីសហភាពអឺរ៉ុប (Brexit) នៅថ្ងៃទី ៣១ ខែតុលានៅក្នុងការផ្លាស់ប្តូរគោលនយោបាយមួយស្ថិតក្រោមលោក Boris Johnson នាយករដ្ឋមន្ត្រីរបស់ចក្រភពអង់គ្លេស។
អ្នកនាំពាក្យការិយាល័យ Downing Street របស់នាយករដ្ឋមន្ត្រីបានថ្លែងថា៖ «ការធ្វើដំណើរដោយសេរីដែលជាគោលជំហរនាពេលបច្ចុប្បន្ននឹងត្រូវបញ្ចប់នៅថ្ងៃទី ៣១ ខែតុលាជាពេលដែលអង់គ្លេសត្រូវចាកចេញពីសហភាពអឺរ៉ុប»។
អ្នកស្រីបានបន្ថែមថារដ្ឋាភិបាលមានផែនការ «ដាក់ចេញវិធានឧក្រិដ្ឋកាន់តែតឹងរ៉ឹងសម្រាប់មនុស្សដែលចូលមកចក្រភពអង់គ្លេស» ដែលជាផ្នែកមួយនៃគោលជំហរតឹងរ៉ឹងថ្មី។
អ្នកនាំពាក្យរូបនេះបានថ្លែងថា៖ «ព័ត៌មានលម្អិតនៃការផ្លាស់ប្តូរភ្លាមៗផ្សេងទៀតនៅថ្ងៃទី ៣១ ខែតុលាសម្រាប់ប្រព័ន្ធអន្តោប្រវេសន៍ថ្មីមួយ បច្ចុប្បន្នបាននិងកំពុងបង្កើតឡើង»។
ការផ្លាស់ប្តូរនេះកើតមានឡើងក្នុងគ្រាដែលកើតមានការភ័យខ្លាចកាន់តែខ្លាំងថា ចក្រភពអង់គ្លេសគ្រោងនឹងចាកចេញពីប្លុកប្រទេសដែលមានសមាជិក ២៨ ប្រទេសនេះដោយគ្មានកិច្ចព្រមព្រៀងចាកចេញណាមួយក្នុងរយៈពេល ២ ខែកន្លះខាងមុខទៀតដែលនៅសេសសល់នេះ។
ប្រជាពលរដ្ឋសហភាពអឺរ៉ុបប្រហែល ៣,៦ លាននាក់រស់នៅក្នុងចក្រភពអង់គ្លេសត្រូវបានជូនដំណឹងរួចហើយឲ្យដាក់ពាក្យសុំ «ឋានៈរស់នៅអចិន្រៃ្តយ៍» ស្ថិតក្រោមគម្រោងមួយរបស់ក្រសួងមហាផ្ទៃអង់គ្លេសដោយផ្តួចផ្តើមដោយលោកស្រី Theresa May អតីតនាយករដ្ឋមន្ត្រីអង់គ្លេស។
មកដល់ពេលនេះប្រជាពលរដ្ឋតែប្រហែល ១ លាននាក់ប៉ុណ្ណោះបានចុះឈ្មោះសុំឋានៈរស់នៅនេះ៕ KC