ក្រុងស៊ាងហៃៈ ការប្តេជ្ញាចិត្តរបស់ប្រទេស ចិន ក្នុងការបើកចំហរសេដ្ឋកិច្ចកាន់តែខ្លាំង កំពុងបង្កើតឱកាសបន្ថែមទៀតសម្រាប់ក្រុមហ៊ុនបរទេសចូលក្នុងទីផ្សារដ៏ធំរបស់ចិន និងស្វែងរកកិច្ចសហប្រតិបត្តិការជាមួយក្រុមហ៊ុនចិន។
ក្នុងអំឡុងពិព័រណ៍ទំនិញនាំចូលអន្តជាតិចិន (CIIE) លើកដំបូង ដែលរៀបចំធ្វើឡើងក្នុងទីក្រុងស៊ាងហៃចាប់ពីថ្ងៃចន្ទដល់ថ្ងៃសៅរ៍សប្តាហ៍មុន ក្រុមហ៊ុនក្នុងវិស័យកម្សាន្តរបស់អង់គ្លេសបានចុះហត្ថលេខាចំនួន ៨ ជាមួយក្រុមហ៊ុនចិន ដែលមានតម្លៃទឹកប្រាក់ចំនួន ៤០ លានផោន (៥២,៧ លានដុល្លារ)។ កិច្ចព្រមព្រៀងនេះផ្តោតលើវិស័យនានា រួមទាំងទូរទស្សន៍ ភាពយន្ត ផ្សព្វផ្សាយពាណិជ្ជកម្ម និងហ្គេម។
លោកស្រី Rona Fairhead រដ្ឋមន្ត្រីចក្រភពអង់គ្លេសទទួលបន្ទុកពាណិជ្ជកម្ម និងការផ្សព្វផ្សាយការនាំចេញ បានថ្លែងក្នុងពិធីចុះហត្ថលេខាកិច្ចព្រមព្រៀងទាំង ៨ កាលពីថ្ងៃពុធសប្តាហ៍មុនថា៖ «នេះគឺជាព័ត៌មានដ៏អស្ចារ្យដែលនឹងនាំមកនូវកំណើនចំពោះវិស័យកម្សាន្តនៅចក្រភពអង់គ្លេស និងប្រទេស ចិន»។
ឧស្សាហកម្មភាពយន្តគឺជាផ្នែកដ៏សំខាន់ និងអភិវឌ្ឍន៍យ៉ាងល្អនៃវិស័យកម្សាន្តនៅចក្រភពអង់គ្លេសដែលមានប្រជាជន ៦៦ លាននាក់។ នៅប្រទេស ចិន ដែលមានប្រជាជនច្រើនជាងគេលើពិភពលោក និងជាទីផ្សារភាពយន្តធំទីពីរក្នុងពិភពលោក ដែលមានប្រាក់ចំណូល ៥៥,៩ ពាន់លានយន់ (៨,០៥ ពាន់លានដុល្លារ) ក្នុងឆ្នាំ ២០១៧ មិនទាន់បានផលិតភាពយន្តដែលដល់កម្រិតពិភពលោកច្រើននៅឡើយទេ៕ People’s Daily/KC