.jpg)
ទិដ្ឋភាពនៅកំពង់ផែ Long Beach សហរដ្ឋអាមេរិក។ រូបថត AFP
ក្រុងប៉េកាំងៈ ទិន្នន័យផ្លូវការបានបង្ហាញកាលពីថ្ងៃសុក្រថា អតិរេកពាណិជ្ជកម្មរបស់ប្រទេសចិនជាមួយអាមេរិកបានកើនឡើងខ្លាំងដល់កម្រិតខ្ពស់បំផុត ៣៤,១ ពាន់លានដុល្លារកាលពីខែកញ្ញា ទោះបីជាអាមេរិកដកហូតពន្ធនាំចូលច្រើនក៏ដោយ ដែលបង្កឲ្យ ភ្លើងសង្គ្រាមពាណិជ្ជឆេះកាន់តែខ្លាំងឡើង។
ទំនាក់ទំនងរវាងប្រទេសមានសេដ្ឋកិច្ចឈានមុខគេទាំងពីររបស់ពិភពលោកនេះ បានធ្វើឲ្យមានភាពជូរចត់យ៉ាងខ្លាំងនៅឆ្នាំនេះ ជាមួយនឹងការប្ដេជ្ញាចិត្តរបស់លោកប្រធានាធិបតីអាមេរិក ដូណាល់ ត្រាំ កាលពីថ្ងៃព្រហស្បតិ៍ថា នឹងធ្វើឲ្យភាពឈឺចាប់ផ្នែកសេដ្ឋកិច្ចលើប្រ ទេសចិន ប្រសិនបើប្រទេសនេះនៅតែមិនប្តូរឥរិយាបថ។
ការនាំចេញរបស់ប្រទេសចិនទៅអាមេរិក បានកើនឡើងដល់ ៤៦,៧ ពាន់លានដុល្លារ ខណៈការនាំចូលបានធ្លាក់ចុះមកនៅត្រឹម ១២,៦ ពាន់លានដុល្លារ។ នេះបើយោងតាមរដ្ឋបាលគយរបស់ប្រទេសចិន។
ប្រទេសមានសេដ្ឋកិច្ចឈានមុខគេទាំងពីររបស់ពិភពលោកនេះ បានហូតពន្ធនាំចូលក្នុងទឹកប្រាក់ច្រើនលើទំនិញនាំចូលទៅវិញទៅមកកាលពីពាក់កណ្ដាលខែកញ្ញា ដោយអាមេរិក ដែលកំណត់ទិសដៅ ២០០ ពាន់លានដុល្លារលើការនាំចូលរបស់ប្រទេសចិន ហើយទីក្រុងប៉េកាំងតបតវិញក្នុងតម្លៃ ៦០ ពាន់លានដុល្លារលើទំនិញអាមេរិក។
លោក Li Kuiwen អ្នកនាំពាក្យទីភ្នាក់ងារគយចិនបានប្រាប់ក្រុមអ្នកយកព័ត៌មានកាលពីថ្ងៃសុក្រថា៖ «ជម្លោះពាណិជ្ជកម្មចិន និងអាមេរិក បានបណ្ដាលឲ្យមានបញ្ហា និងបានធ្វើឲ្យប៉ះពាល់ដល់ការអភិវឌ្ឍពាណិជ្ជកម្មបរទេស»។
ពាណិជ្ជកម្មរួមរបស់ប្រទេសចិន ពោលគឺជាអ្វីដែលប្រទេសនេះទិញ និងលក់ជាមួយបណ្ដាប្រទេសទាំងអស់ដែលរួមទាំងអាមេរិកផងដែរនោះ បានកត់ត្រាអតិរេក ៣១,៧ ពាន់លាន ខណៈដែលការនាំចេញបានកើនឡើងខ្ពស់ជាងការនាំចូល។
ការនាំចេញបានកើនឡើង ១៤,៥ ភាគរយសម្រាប់ខែកញ្ញាធៀបនឹងរយៈពេលដូចគ្នាកាលពីឆ្នាំមុន ដែលលើសពីការព្យាករដោយក្រុមអ្នកវិភាគ ដែលបានស្ទង់មតិដោយទីភ្នាក់ងារព័ត៌មាន Bloomberg News ខណៈដែលការនាំចូលបានកើនឡើង ១៤,៣ ភាគរយធៀបនឹងរយៈពេលដូចគ្នាកាលពីឆ្នាំមុន៕ AFP/LA
