.jpg)
ព្រះរាជអាជ្ញាជប៉ុន បានចោទប្រកាន់លោក Carlos Ghosn ជាផ្លូវការហើយពីបទប្រព្រឹត្តកំហុសហិរញ្ញវត្ថុ។ AFP
ក្រុងតូក្យូៈ ប្រព័ន្ធផ្សព្វផ្សាយជប៉ុន បានរាយការណ៍កាលពីថ្ងៃចន្ទថា ព្រះរាជអាជ្ញាជប៉ុន បានចោទប្រកាន់លោក Carlos Ghosn ជាផ្លូវការហើយពីបទប្រព្រឹត្តកំហុសហិរញ្ញវត្ថុតាមរយៈរាយការណ៍មិនត្រឹមត្រូវនូវប្រាក់ខែរបស់លោក។
ការចោទប្រកាន់នេះបានធ្វើឡើង ៣ សប្ដាហ៍ បន្ទាប់ពីការចាប់ខ្លួនមហាសេដ្ឋីក្នុងឧស្សាហកម្មរថយន្តនេះ ដែលធ្វើឲ្យភ្ញាក់ផ្អើលពិភពពាណិជ្ជកម្ម។
លោក Ghosn អាយុ ៦៤ ឆ្នាំដែលជាអតីតប្រធានក្រុមហ៊ុន Nissan ត្រូវបានឃុំខ្លួន ចាប់តាំងពីការចាប់ខ្លួនរបស់លោកកាលពីថ្ងៃទី ១៩ វិច្ឆិកាមកពីបទសង្ស័យថា ប្រកាសប្រាក់ចំណូលរបស់លោកមិនត្រឹមត្រូវចំនួនប្រហែល ៥ ពាន់លានយ៉េន (៤៤ លានដុល្លារ) នៅចន្លោះឆ្នាំ ២០១០ ដល់ឆ្នាំ ២០១៥។
កាលពីថ្ងៃចន្ទព្រះរាជអាជ្ញាបានចោទប្រកាន់ជាផ្លូវការផងដែរលើលោក Greg Kelly ដែលជាជំនួយការជិតស្និទ្ធរបស់លោក Ghosn ជុំវិញការចោទប្រកាន់នេះ ដែលអ្នកទាំង ២ បានបដិសេធ។
អ្នកទាំង ២ ក៏ត្រូវបានចាប់ខ្លួនជាថ្មីភ្លាមៗផងដែរជុំវិញការចោទប្រកាន់ថ្មីៗដែលថា ពួកគេបានសមគំនិតរាយការណ៍ប្រាក់ចំណូលរបស់លោក Ghosn មិនត្រឹមត្រូវចំនួន ៤ ពាន់លានយ៉េនបន្ថែមទៀតក្នុងរយៈពេល ៣ ឆ្នាំកន្លងមក។
ស្ថិតក្រោមច្បាប់របស់ប្រទេស ជប៉ុន ជនសង្ស័យអាចត្រូវបានចាប់ខ្លួនជាថ្មី ជាច្រើនដងតាមការចោទប្រកាន់ផ្សេងៗគ្នា ដែលអាចឲ្យក្រុមព្រះរាជអាជ្ញា ចោទសួរពួកគេក្នុងអំឡុងពេលវែង ជាប្រព័ន្ធមួយដែលធ្វើឲ្យមានការរិះគន់ទូទាំងពិភពលោក។
ថ្ងៃចន្ទ គឺជាថ្ងៃចុងក្រោយដែលព្រះរាជអាជ្ញាអាចឃុំខ្លួនលោក Ghosn និងលោក Greg Kelly ដែលជាជំនួយការជិតស្និទ្ធរបស់លោក Ghosn មុនពេលចោទប្រកាន់ ឬចាប់ខ្លួនពួកគេជាថ្មី ហើយការចាប់ខ្លួនបន្ថែមទៀត នឹងអាចឲ្យព្រះរាជអាជ្ញាបន្តការសាកសួររយៈពេល ២២ ថ្ងៃផ្សេងទៀត។
យោងតាមប្រព័ន្ធផ្សព្វផ្សាយរបស់ប្រទេស ជប៉ុន ក្រៅពីការចោទប្រកាន់ប្រឆាំងនឹងលោក Ghosn ក្រុមព្រះរាជអាជ្ញាក៏បានចោទប្រកាន់ក្រុមហ៊ុន Nissan ផងដែរ ដោយសារបានបញ្ជូនឯកសារផ្លូវការ ដែលរាយការណ៍មិនត្រឹមត្រូវអំពីប្រាក់ចំណូល។
លោក Ghosn បដិសេធការចោទប្រកាន់នេះ និងកំពុងស្ថិតក្នុងអារម្មណ៍ «មិនចុះចាញ់»។ នេះបើយោងតាមប្រភពមួយមកពីក្រុមហ៊ុនផលិតរថយន្ត Renault៕ AFP/LA
