.jpg)
លោក អាបេ និងលោក ត្រាំ ក្នុងជំនួបទ្វេភាគីក្រៅកិច្ចប្រជុំ G7។ AFP
ក្រុងប៊ីអារីត្សៈ លោកប្រធានាធិបតីអាមេរិក ដូណាល់ ត្រាំ និងលោកនាយករដ្ឋមន្ដ្រីជប៉ុន ស៊ីនហ្សូ អាបេ កាលពីថ្ងៃអាទិត្យបានប្រកាសកិច្ចព្រមព្រៀងសេរីជាគោលការណ៍រវាងប្រទេសទាំង ២។
លោក ត្រាំ បានឲ្យដឹងបន្ទាប់ពីការចរចាជាមួយលោក អាបេ នៅក្រៅជំនួបកិច្ចប្រជុំកំពូលក្រុមប្រទេសមានសេដ្ឋកិច្ចរីកចម្រើនទាំង ៧ (G7) នៅក្នុងទីក្រុងប៊ីអារីត្ស ប្រទេសបារាំងថា៖ «វាជាប្រតិបត្តិការដ៏ធំបំផុតមួយ»។
លោកថ្លែងថា៖ «រាប់ពាន់លាន និងរាប់ពាន់លានដុល្លារ»។ លោកបន្តថា៖ «វាពាក់ព័ន្ធនឹងកសិកម្ម វាពាក់ព័ន្ធនឹងពាណិជ្ជកម្មអេឡិត្រូនិក។ វាពាក់ព័ន្ធនឹងអ្វីៗជាច្រើន។ យើងបានយល់ព្រមជាគោលការណ៍»។
លោក អាបេ បានបញ្ជាក់ថាប្រទេសទាំង ២ «សម្រេចបានការព្រមព្រៀងប្រកបដោយជោគជ័យ» បន្ទាប់ពីការចរចា «ប្រកបដោយភាពតានតឹង»។
មេដឹកនាំទាំង ២ បានឲ្យដឹងថា ពួកគេសង្ឃឹមថានឹងមានការចុះហត្ថលេខាជាផ្លូវការមួយក្នុងអំឡុងមហាសន្និបាតអង្គការសហប្រជាជាតិនៅទីក្រុងញូវយ៉កនៅខែក្រោយ។
ប៉ុន្តែលោក អាបេ បានបង្ហាញការប្រុងប្រយ័ត្នថា៖ «យើងនៅតែមានការងារដែលនៅសល់មួយចំនួនដែលត្រូវធ្វើឲ្យហើយ ដែលភាគច្រើនជាការងារពាក់ព័ន្ធនឹងពាក្យពេជន៍»។
លោក Robert Lighthizer អ្នកតំណាងពាណិជ្ជកម្មអាមេរិកបានឲ្យដឹងថា កិច្ចព្រមព្រៀងនេះនឹងផ្ដល់អត្ថប្រយោជន៍ជាពិសេសដល់កសិករអាមេរិក ដែលជាក្រុមនយោបាយដ៏សំខាន់មួយសម្រាប់លោក ត្រាំ នៅក្នុងការជំរុញការបោះឆ្នោតក្នុងឆ្នាំ ២០២០។
នៅពេលសួរថា តើពន្ធនាំចូលអាមេរិកដែលបានដាក់រួចហើយលើរថយន្តរបស់ប្រទេសជប៉ុននឹងត្រូវបានលុបចោលដោយកិច្ចព្រមព្រៀងនេះដែរឬយ៉ាងណា? លោក Lighthizer ថ្លែងថាពន្ធនាំចូលមួយចំនួននឹងត្រូវលុបចោល «ប៉ុន្តែមិនមែនពន្ធនាំចូលទាំងអស់ទេ»។
លោក ត្រាំ ក៏បានឲ្យដឹងថា ពន្ធនាំចូលនេះ «គឺនៅដដែល» ប៉ុន្តែនឹងមិនដំឡើងនោះទេ។
លោក ត្រាំ និងលោក អាបេ មានទំនាក់ទំនងយ៉ាងជិតស្និទ្ធ ប៉ុន្តែលោក ត្រាំ ជារឿយៗបានបញ្ជាក់ថា ទីក្រុងតូក្យូមានអត្ថប្រយោជន៍មិនស្មើភាពក្នុងពាណិជ្ជកម្មទ្វេភាគី។
ទីភ្នាក់ងារព័ត៌មានជប៉ុន NHK និងសារព័ត៌មានជប៉ុនផ្សេងទៀតបានរាយការណ៍ថា ក្រុមអ្នកចរចាបានយល់ព្រមថា ជប៉ុននឹងហូតពន្ធនាំចូលលើផលិតផលកសិកម្មអាមេរិកក្នុងកម្រិតដែលអនុវត្តចំពោះសមាជិកនៃកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP)។
NHK បានរាយការណ៍ថាភាគីទាំង ២ បានយល់ព្រមថា ជប៉ុននឹងកាត់បន្ថយពន្ធលើសាច់គោ និងសាច់ជ្រូកអាមេរិកមកត្រឹមកម្រិតពន្ធដែលដកលើប្រទេសជាសមាជិករបស់ TPP ប៉ុន្តែនឹងមិនកំណត់កូតាថ្មីសម្រាប់ប៊័រ និងទឹកដោះគោមានជាតិខ្លាញ់ទាប៕ LA
