.jpg)
លោកប្រធានាធិបតីអាមេរិក ដូណាល់ ត្រាំ និងលោកប្រធានាធិបតីចិន ស៊ី ជីងភីង ដើរចេញពីកិច្ចប្រជុំនៅ ប្រទេស ជប៉ុន កាលពីកន្លងទៅ។ AFP
ក្រុងប៉េកាំងៈ ប្រទេសចិនបានឲ្យដឹងនៅថ្ងៃព្រហស្បតិ៍ថា ក្រុមអ្នកចរចាពាណិជ្ជកម្មរបស់អាមេរិក និងចិននឹងចាប់ផ្តើមចរចាឡើងវិញនៅទីក្រុងវ៉ាស៊ីនតោននៅដើមខែតុលា បន្ទាប់ពីពន្ធពិន័យថ្មីបានបង្កើនការភ័យខ្លាចកើតមានការបរាជ័យក្នុងការចរចា។
ប្រទេសដែលមានសេដ្ឋកិច្ចធំទាំង ២ ក្នុងពិភពលោកនេះបានជាប់ជំពាក់ក្នុងសង្គ្រាមពាណិជ្ជកម្មដ៏តានតឹងក្នុងរយៈពេលមួយឆ្នាំមកនេះដែលបានកើនឡើងថែមទៀតកាលពីថ្ងៃទី ១ ខែកញ្ញា នៅពេលប្រទេសទាំង ២ បានដំឡើងការដកហូតពន្ធគយគ្នាទៅវិញទៅមក។
ការចរចាត្រូវបានរំពឹងថានឹងចាប់ផ្តើមឡើងវិញនៅខែនេះ ប៉ុន្តែក្រសួងពាណិជ្ជកម្មចិនបានឲ្យដឹងថា ឧបនាយករដ្ឋមន្ត្រីចិនលោក Liu He ដែលជាមេដឹកនាំចរចាបានព្រមព្រៀងចរចានៅខែតុលា បន្ទាប់ពីបានសន្ទនាគ្នាតាមទូរស័ព្ទជាមួយលោក Robert Lighthizer អ្នកតំណាងពាណិជ្ជកម្មអាមេរិក និងលោក Steven Mnuchin រដ្ឋមន្ត្រីក្រសួងហិរញ្ញវត្ថុអាមេរិកកាលពីថ្ងៃព្រហស្បតិ៍។
ក្រសួងពាណិជ្ជកម្មចិនបានឲ្យដឹងថា ក្រុមមន្ត្រីទាំងនេះបានព្រមព្រៀង «ធ្វើការងាររួមគ្នា និងចាត់វិធានការជាក់ស្តែង ដើម្បីបង្កើតលក្ខខណ្ឌអំណោយផលសម្រាប់ការប្រឹក្សាយោបល់»។
ក្រសួងឲ្យដឹងទៀតថា ភាគីទាំង ២ នឹង «រក្សាការទាក់ទងជិតស្និទ្ធ» មុនពេលចរចា។
មន្ត្រីចរចាកំពូលទាំងនេះបានជួបគ្នាចុងក្រោយក្នុងទីក្រុងស៊ាងហៃកាលពីខែកក្កដា សម្រាប់ការចរចាមួយដែលត្រូវបានពិពណ៌នាថាជាការចរចា «ប្រកបដោយស្ថាបនា» ប៉ុន្តែបានបញ្ចប់ដោយគ្មានការប្រកាសលទ្ធផល។
លោកប្រធានាធិបតីអាមេរិក ដូណាល់ ត្រាំ បន្ទាប់មកបានប្រកាសថាលោកនឹងដំឡើងពន្ធគយលើទំនិញដែលនាំចូលពីប្រទេសចិន ដែលមានតម្លៃជាង ៥០០ ពាន់លានដុល្លារនៅក្នុងជុំថ្មីមួយនៃវិធានការពន្ធពិន័យដែលជំរុញឲ្យទីក្រុងប៉េកាំងឆ្លើយតបវិញជាមួយនឹងការដកហូតពន្ធថ្មីលើទំនិញអាមេរិកតម្លៃ ៧៥ ពាន់លានដុល្លារ៕ KC
