.jpg)
សហរដ្ឋអាមេរិកបានជាប់ចំណាត់ថ្នាក់ទី ១ ក្នុងតារាងចំណាត់ថ្នាក់ប្រកួតប្រជែងពិភពលោករបស់អង្គការវេទិកាសេដ្ឋកិច្ចពិភពលោក (WEF) ប្រចាំឆ្នាំ២០១៨ តាមពីក្រោយដោយសិង្ហបុរី អាល្លឺម៉ង់ ស្វ៊ីស ជប៉ុន ហូឡង់ ខណៈប្រទេសដែលជាប់ចំណាត់ថ្នាក់ទាបជាងគេមកពីទ្វីបអា្រហ្វិក ដូចជា ប្រទេស ឆាដ យេម៉ែន ហៃទី អង់ហ្គោឡា ប៊ូរុនឌី កុងហ្គោ។ រូបថត AFP
ក្រុងហ្សឺណែវៈ សហរដ្ឋអាមេរិក ទទួលបានចំណាត់ថ្នាក់ប្រកួតប្រជែងខ្ពស់ជាងគេក្នុងពិភពលោក ប៉ុន្តែបញ្ហាវិសមភាព និងសុខភាពរួមទាំងភាពជំងឺធាត់បានប៉ះពាល់ទៅលើពិន្ទុរបស់ខ្លួន។ នេះបើយោងតាមរបាយការណ៍របស់វេទិកាសេដ្ឋកិច្ចពិភពលោក (WEF) ដែលបានចេញផ្សាយកាលពីថ្ងៃពុធ។
វេទិកាសេដ្ឋកិច្ចពិភពលោកបានឲ្យដឹងក្នុងរបាយការណ៍ស្តីពីភាពប្រកួតប្រជែងពិភពលោក (Global Competitiveness Report) ប្រចាំឆ្នាំរបស់ខ្លួនថា៖ «សហរដ្ឋអាមេរិកស្ថិតនៅចំណាត់ថ្នាក់កំពូលនៅក្នុងតារាងចំណាត់ថ្នាក់ឆ្នាំ ២០១៨ ដោយបង្ហាញពីឋានៈជាសេដ្ឋកិច្ចដែលមានភាពប្រកួតប្រជែងបំផុតរបស់ខ្លួននៅក្នុងពិភពលោក»។
អង្គការដែលរៀបចំកិច្ចប្រជុំឥស្សរជនធុរកិច្ច និងនយោបាយប្រចាំឆ្នាំនៅទីក្រុង ដាវ៉ូស ប្រទេស ស្វ៊ីស បានថ្លែងថា ខ្លួនបានប្រើវិធីសាស្រ្តថ្មីមួយសម្រាប់ការបោះពុម្ពផ្សាយរបាយការណ៍ឆ្នាំ ២០១៨ ដើម្បីឆ្លុះបញ្ចាំងពីភាពផ្លាស់ប្តូរនៅក្នុងពិភពលោកមួយដែលត្រូវបានកែប្រែខ្លាំងឡើងដោយបច្ចេកវិទ្យាថ្មី និងឌីជីថល។
ការផ្លាស់ប្តូរវិធីសាស្រ្តនេះបានជួយសហរដ្ឋអាមេរិកឲ្យទម្លាក់ប្រទេស ស្វ៊ីស ដែលស្ថិតនៅលើចំណាត់ថ្នាក់កំពូលអស់រយៈពេលជិត ១ ទសវត្សរ៍។ នៅក្នុងរបាយការណ៍កាលពីថ្ងៃពុធ បានបង្ហាញថា ប្រទេស ស្វ៊ីស បានស្ថិតនៅក្នុងចំណាត់ថ្នាក់ទី ៤ បន្ទាប់ពីសហរដ្ឋអាមេរិក ប្រទេស សិង្ហបុរី និងអាល្លឺម៉ង់។
របាយការណ៍ឆ្នាំនេះបានសិក្សាអំពីរបៀបដែលប្រទេសចំនួន ១៤០ គ្រប់គ្រងសេដ្ឋកិច្ចរបស់ខ្លួននៅពេលវាស់វែងសូចនាករចំនួន ៩៨ ដែលរៀបចំចេញជាសសរស្តម្ភចំនួន ១២ ដែលរួមមានទាំង ស្ថាប័ន ហេដ្ឋារចនាសម្ព័ន្ធ ស្ថិរភាពម៉ាក្រូសេដ្ឋកិច្ច កម្លាំងធុរកិច្ច ព្រមទាំងសមត្ថភាពនវានុវត្តន៍ផងដែរ។
ជារួម សហរដ្ឋអាមេរិកទទួលបានពិន្ទុមធ្យមចំនួន ៨៥,៦ នៅពេលសូចនាករចំនួនជិត ១០០ ត្រូវបានវាស់វែងដោយជ្រើសយកមាត្រដ្ឋានពី ០ ទៅ ១០០៕ AFP/PS
