ក្រុងវ៉ាស៊ីនតោនៈ សហរដ្ឋអាមេរិកបានឲ្យដឹងកាលពីថ្ងៃចន្ទថា ខ្លួននឹងចាំបាច់ត្រូវមើលឃើញ «អ្វីៗច្បាស់លាស់» ពីប្រទេសចិនក្នុងរយៈពេល ៩០ ថ្ងៃក្រោយ ដើម្បីបង្កើតកិច្ចព្រមព្រៀងពិតប្រាកដមួយស្ដីពីពាណិជ្ជកម្ម ២ ថ្ងៃបន្ទាប់ពីលោក ដូណាល់ ត្រាំ និងលោក ស៊ី ជីនភីង បានអំពាវនាវឲ្យបញ្ឈប់ការប្រឈមមុខគ្នាកាន់តែខ្លាំងឡើងរវាងប្រទេសមហាអំណាចសេដ្ឋកិច្ចទាំង ២ នេះ។
លោក Steven Mnuchin រដ្ឋមន្ដ្រីក្រសួងហិរញ្ញវត្ថុរបស់សហរដ្ឋអាមេរិកបានឲ្យដឹងតាមទូរទស្សន៍ CNBC ថា អាមេរិក និងចិនបានរៀបចំ «ការពិភាក្សាយ៉ាងជាក់លាក់» នៅទីក្រុងប៊ុយណូស៊ែកាលពីថ្ងៃល្ងាចសៅរ៍ស្ដីពីគោលជំហរក្នុងការដោះស្រាយជម្លោះរបស់ប្រទេសទាំង ២ ដែលពាក់ព័ន្ធនឹងប្រាក់រាប់រយពាន់លានក្នុងពាណិជ្ជកម្មទ្វេភាគី និងបានធ្វើឲ្យប៉ះពាល់ដល់ទីផ្សារពិភពលោកអស់រយៈពេលជាច្រើនខែ។
លោក Larry Kudlow ទីប្រឹក្សាផ្នែកសេដ្ឋកិច្ចរបស់សេតវិមានបានឲ្យដឹងថា លោកបានរំពឹងថាពន្ធនាំចូលពិន័យ ២៥ ភាគរយលើទំនិញកសិកម្មរបស់អាមេរិកនឹងត្រូវបានដកចេញវិញ និងបានជំរុញឲ្យប្រទេសចិនចាត់វិធានការភ្លាមៗ ដើម្បីអនុវត្តការប្ដេជ្ញាចិត្តមួយចំនួនរបស់ខ្លួនដើម្បីផ្ដល់ «ភាពជឿជាក់បន្ថែមទៀត» ដល់ពួកគេ។
លោក Mnuchin បានឲ្យដឹងថា ជាលើកដំបូងហើយដែលមាន «ផ្លូវដ៏ច្បាស់លាស់» មួយដើម្បីកាត់បន្ថយឱនភាពពាណិជ្ជកម្មរបស់អាមេរិក ជាមួយប្រទេសចិនមកនៅត្រឹមចំនួនសូន្យ។
លោក Mnuchin មានប្រសាសន៍ថា៖ «មានការប្ដេជ្ញាចិត្តដ៏សំខាន់មួយពីមេដឹកនាំទាំង ២ លើអ្វីដែលចាំបាច់ត្រូវធ្វើឲ្យហើយក្នុងរយៈពេល ៩០ ថ្ងៃ និងការណែនាំដល់ភាគីទាំង ២ ឲ្យចរចា និងប្រែក្លាយការចរចានេះទៅជាកិច្ចព្រមព្រៀងពិតប្រាកដមួយដោយមានសកម្មភាពជាក់លាក់អាចសម្រេចបាន និងក្របខ័ណ្ឌពេលវេលាច្បាស់លាស់»។
បន្ទាប់ពីការចរចារវាងលោក ត្រាំ និងលោក ស៊ី ដែលបានធ្វើឡើងនៅអំឡុងពេលអាហារពេលល្ងាចនៅចុងបញ្ចប់នៃកិច្ចប្រជុំកំពូលរបស់ប្រទេសមានសេដ្ឋកិច្ចរីកចម្រើនទាំង ២០ (G20) ក្នុងប្រទេសអាហ្សង់ទីន ទីក្រុងវ៉ាស៊ីនតោនបានយល់ព្រមផ្អាកការគំរាមកំហែងរបស់លោក ត្រាំ ថានឹងដំឡើងការហូតពន្ធនាំចូល ២៥ ភាគរយលើទំនិញរបស់ប្រទេសចិនតម្លៃ ២០០ ពាន់លានដុល្លារចាប់ពីថ្ងៃទី ១ ខែធ្នូ ដែលជួយឲ្យទំនិញទាំងនោះស្ថិតក្នុងអត្រាពន្ធពិន័យ ១០ ភាគរយក្នុងពេលបច្ចុប្បន្ន។
ជាថ្នូរវិញប្រទេសចិននឹងទិញផលិតផលកសិកម្ម ថាមពល ឧស្សាហកម្ម និងផលិតផលផ្សេងទៀតពីអាមេរិកក្នុងបរិមាណ «ច្រើន» ។
ក្នុងសេចក្ដីប្រកាសគួរឲ្យភា្ញក់ផ្អើលមួយដែលបានសរសេរលើទំព័រ Twitter កាលពីយប់ថ្ងៃអាទិត្យលោក ត្រាំ បានឲ្យដឹងថា ប្រទេសចិននឹង «កាត់បន្ថយ និងលុបចោល» ពន្ធនាំចូល ៤០ ភាគរយលើរថយន្ត ទោះបីជាទីក្រុងប៉េកាំងមិនបានបញ្ជាក់ពីវិធានការនេះក៏ដោយ។
លោក Kudlow បានប្រាប់ក្រុមអ្នកយកព័ត៌មានថា៖ «ខ្ញុំរំពឹងថាពន្ធនាំចូលទាំងនោះនឹងធ្លាក់ចុះដល់សូន្យ»៕AFP/LA