ក្រុងម៉ិកស៊ិកូៈ អាមេរិក កាលពីថ្ងៃអង្គារបានហូតពន្ធនាំចូលលើប៉េងប៉ោះរបស់ប្រទេស ម៉ិកស៊ិក ដែលបន្ថែមភាពតានតឹងរវាងប្រទេសជិតខាងទាំង ២។
ពន្ធនាំចូល ១៧,៥ ភាគរយបានចូលជាធរមាន បន្ទាប់ពីប្រទេសទាំង ២ បានបរាជ័យក្នុងការបន្តជាថ្មីនូវកិច្ចព្រមព្រៀងមួយ ដែលបានផ្អាកដោយសារការស៊ើបអង្កេតប្រឆាំងការបង្ខូចតម្លៃរបស់អាមេរិក ដែលបានបើកដំណើរការដំបូងកាលពី ២៣ ឆ្នាំមុន។
ក្រសួងពាណិជ្ជកម្មអាមេរិកបានឲ្យដឹងកាលពីថ្ងៃអង្គារថា ការចរចាដើម្បីធ្វើឲ្យកិច្ចព្រមព្រៀងនេះរស់ឡើងវិញនឹងបន្តធ្វើឡើង។
រដ្ឋមន្ដ្រីក្រសួងពាណិជ្ជកម្មអាមេរិកលោក Wilbur Ross ថ្លែងថា៖ «យើងនៅតែមានសុទិដិ្ឋនិយមថា នឹងមានដំណោះស្រាយដោយការចរចាមួយ»។
ពន្ធនាំចូលនេះជាចុងក្រោយអាចត្រូវបានរារាំង ប្រសិនបើគណៈកម្មការពាណិជ្ជកម្មអន្តរជាតិអាមេរិកដែលជាស្ថាប័នឯករាជ្យមួយរកឃើញថា មិនមានឧស្សាហកម្មអាមេរិកណាមួយបានរងការខូចខាតដោយសារការលក់បង្ខូចថ្លៃប៉េងប៉ោះរបស់ម៉ិកស៊ិកលើទីផ្សារអាមេរិកដូចដែលបានចោទប្រកាន់នោះ។
ម៉ិកស៊ិកផ្គត់ផ្គង់ប៉េងប៉ោះស្រស់ពាក់កណ្ដាលនៃប៉េងបោះដែលប្រើប្រាស់នៅអាមេរិក និងប៉ាន់ប្រមាណថា ពន្ធនាំចូលនេះនឹងធ្វើឲ្យក្រុមហ៊ុននាំចេញរបស់ខ្លួនខាតបង់ប្រាក់ជាង ៣៥០ លានដុល្លារ ក្នុង ១ ឆ្នាំ។
សមាគមដាំដុះប៉េងប៉ោះរបស់ប្រទេស ម៉ិកស៊ិក បានបដិសេធការចោទពីការបង្ខូចតម្លៃនេះ។ លោក Manuel Antonio Cazares អនុប្រធានសមាគមនេះបានប្រាប់ទីភ្នាក់ងារព័ត៌មាន AFP ថា ឧស្សាហកម្មប៉េងប៉ោះនឹង «រងផលប៉ះពាល់យ៉ាងខ្លាំង» ដោយសារពន្ធនាំចូលនេះ និងបានព្យាករថា អតិថិជនរបស់អាមេរិកនឹងទទួលរងផលប៉ះពាល់ផងដែរ។
ម៉ិកស៊ិកបាននាំចេញប៉េងប៉ោះក្នុងតម្លៃប្រហែល ២ ពាន់លានដុល្លារ ទៅអាមេរិកកាលពីឆ្នាំមុន៕ AFP/LA