ក្រុងវ៉ាស៊ីនតោនៈ សហរដ្ឋអាមេរិកកាលពីថ្ងៃពុធបានប្រកាសដកហូតពន្ធគយថ្មីក្នុងទឹកប្រាក់ជាង ១ ពាន់លានដុល្លារលើដែកគ្រោងសំណង់ (structural steel) ដែលនាំចូលពីប្រទេសចិន និងម៉ិកស៊ិក ដោយនិយាយថា ក្រុមហ៊ុនផលិតកម្មក្នុងប្រទេសទាំង ២ បានលក់ផលិតផលបង្ខូចថ្លៃ (ទាបជាងតម្លៃធម្មតា) នៅទីផ្សារអាមេរិក។
លទ្ធផលរកឃើញរបស់ក្រសួងពាណិជ្ជកម្មអាមេរិកដែលជាលទ្ធផលបឋម និងអាចដកចេញវិញបាននោះកើតមានឡើងបន្ទាប់ពីមានសេចក្តីសម្រេចស្រដៀងគ្នាមួយនៅខែមិថុនាពាក់ព័ន្ធនឹងការនាំចូលអាលុយមីញ៉ូមលោហៈចម្រុះ (alloy aluminum) មកពីប្រទេសចិនដែលមានតម្លៃជិត ១ ពាន់លានដុល្លារ។
ក្រសួងពាណិជ្ជកម្មអាមេរិកបានចោទប្រកាន់ក្រុមហ៊ុនផលិតកម្មចិន និងម៉ិកស៊ិកថាបានលក់បង្ខូចថ្លៃនូវដែកគ្រោងសំណង់ ដូចជាដែកអក្សរអាយ (I-beam) ជាដើមនៅចន្លោះពី ០ ទៅ ១៤១,១ ភាគរយ។
ទោះជាយ៉ាងណាក្រសួងបានបន្តថា ខ្លួនបានច្រានចោលការចោទប្រកាន់បែបនេះទាក់ទងនឹងផលិតផលប្រហាក់ប្រហែលគ្នានេះមកពីប្រទេសកាណាដា។
លទ្ធផលរកឃើញនេះគឺជាលទ្ធផលដែលកើតចេញពីបណ្តឹងមួយដែលដាក់កាលពីខែកុម្ភៈដោយសមាជិករបស់វិទ្យាស្ថានសំណង់ដែកអាមេរិកក្នុងទីក្រុងស៊ីកាហ្គោ។
សេចក្តីសម្រេចនេះកើតមានឡើងបន្ទាប់ពីលោកប្រធានាធិបតីអាមេរិក ដូណាល់ ត្រាំ កាលពីខែឧសភា បានព្រមព្រៀងលុបចោលពន្ធគយពិន័យលើដែកដែលនាំចូលពីប្រទេសម៉ិកស៊ិកដែលបានចូលរួមចរចាពាណិជ្ជកម្មសេរីថ្មីមួយជាមួយអាមេរិក និងកាណាដា។
កាលពីឆ្នាំមុនអាមេរិកបាននាំចូលដែកគ្រោងសំណង់ពីប្រទេសម៉ិកស៊ិក និងចិនដែលមានតម្លៃរួមគ្នាចំនួន ១,៦ ពាន់លានដុល្លារ។
សេចក្តីសម្រេចចុងក្រោយដោយក្រសួងពាណិជ្ជកម្មអាមេរិកនឹងធ្វើឡើងនៅដើមឆ្នាំ ២០២០៕ KC