វ៉ាស៊ីនតោនៈ បន្ទាប់ពីមានវិធានការផ្សះផ្សាដោយប្រទេសចិន លោកប្រធានាធិបតីអាមេរិក ដូណាល់ ត្រាំ កាលពីថ្ងៃពុធបានធ្វើការសម្រេចចិត្តផ្ទាល់ខ្លួនមួយដោយប្រកាសថា លោកបានយល់ស្របក្នុងការពន្យារពេលបង្កើនពន្ធនាំចូលលើទំនិញរបស់ប្រទេសចិនដែលមានតម្លៃ ២៥០ ពាន់លានដុល្លាររយៈពេល ២ សប្ដាហ៍។
ថ្លែងនៅមុនការចាប់ផ្ដើមការចរចាគ្នាឡើងវិញជាច្រើនសប្ដាហ៍ ដើម្បីដោះស្រាយសង្គ្រាមពាណិជ្ជកម្មរយៈពេលយូរលោក ត្រាំ បានឲ្យដឹងថា ការពន្យារពេលបង្កើនពន្ធនាំចូលត្រូវបានស្នើសុំដោយទីក្រុងប៉េកាំង។
ក្រុមអ្នកចរចាជាន់ខ្ពស់រំពឹងថា ការចរចានឹងចាប់ផ្ដើមឡើងវិញនៅទីក្រុងវ៉ាស៊ីនតោននាដើមខែក្រោយ បន្ទាប់ពីឆ្លងកាត់រដូវក្ដៅដ៏ជូរចត់នៃជម្លោះពាណិជ្ជកម្មរវាងរដ្ឋាភិបាលប្រទេសទាំង ២ ដែលជម្លោះនេះក៏បាននិងកំពុងជះឥទ្ធិពលដល់ល្បឿនកំណើនសេដ្ឋកិច្ចពិភពលោកផងដែរ។
លោក ត្រាំ បានសរសេរលើ Twitter កាលពីល្ងាចថ្ងៃពុធថា៖ «យើងបានយល់ស្របហើយ។ នេះជាកាយវិការនៃសុឆន្ទៈក្នុងការផ្លាស់ប្តូរការបង្កើនពន្ធនាំចូលលើទំនិញមានតម្លៃ ២៥០ ពាន់លានដុល្លារ (២៥ ភាគរយទៅ ៣០ ភាគរយ) ចាប់ពីថ្ងៃទី ១ ខែតុលា ដល់ថ្ងៃទី ១៥ ខែតុលា»។
លោកបានឲ្យដឹងថាការពន្យារពេលនេះត្រូវបានស្នើឡើងដោយ «លោក Liu He ឧបនាយករដ្ឋមន្ដ្រីប្រទេសចិន និងដោយសារតែសាធារណរដ្ឋប្រជាមានិតចិននឹងប្រារព្ធទិវាបុណ្យជាតិខួបលើកទី ៧០ របស់ពួកគេ» នៅថ្ងៃទី ១ ខែតុលា ខាងមុខ។
កាលពីព្រឹកថ្ងៃពុធ ទីក្រុងប៉េកាំងបានប្រកាសថាខ្លួនកំពុងលើកលែងជាបណ្ដោះអាសន្នលើទំនិញនាំចេញរបស់អាមេរិកមួយចំនួនពីបញ្ជីបង្កើនពន្ធនាំចូល។ នេះជាកាយវិការលើកស្ទួយទីផ្សារមូលធនដែលទទួលរងផលប៉ះពាល់រយៈពេលយូរដោយសារតែជម្លោះពាណិជ្ជកម្មរវាងប្រទេសទាំង ២ ដែលឈានចូលដល់ឆ្នាំទី ២។
លោក ត្រាំ បានប្រាប់ក្រុមអ្នកយកព័ត៌មាននៅសេតវិមានថា៖ «វាជាការផ្លាស់ប្តូរដ៏ធំមួយ»។ លោកបញ្ជាក់ថា ទីក្រុងប៉េកាំងកំពុងស្ថិតក្រោមសម្ពាធក្នុងការចរចា ខណៈសេដ្ឋកិច្ចរបស់ខ្លួនចុះខ្សោយដែលលោកបានសន្មតថា ជាវិធានការរបស់អាមេរិក។
ទោះយ៉ាងណាទំនិញដែលមិនត្រូវបានដាក់បញ្ចូលទៅក្នុងផលិតផលកសិកម្មសំខាន់ៗ មានដូចជាសណ្ដែកសៀង និងសាច់ជ្រូកដែលអាចមានសារៈសំខាន់ចំពោះភាពជោគជ័យនៅទីបំផុតនៃកិច្ចព្រមព្រៀងណាមួយ។
ការលើកលែងនេះនឹងចាប់ផ្ដើមអនុវត្តនៅថ្ងៃទី ១៧ ខែកញ្ញា និងមានសុពលភាពរយៈពេល ១ ឆ្នាំ។ នេះបើតាមគណៈកម្មការពន្ធគយនៃក្រុមប្រឹក្សារដ្ឋដែលបានចេញផ្សាយបញ្ជី ២ រួមមានផលិតផលអាហារសមុទ្រ និងឱសថប្រឆាំងជំងឺមហារីក។
ប្រភេទផ្សេងទៀតដែលនឹងត្រូវលើកលែងរួមមានគ្រាប់អាល់ហ្វាល់ហ្វា និងចំណីត្រី ហើយគណៈកម្មការនេះបានឲ្យដឹងថា ខ្លួនកំពុងពិចារណាលើកលែងផលិតផលផ្សេងៗទៀត។
ភាគីទាំង ២ បានហូតពន្ធទៅវិញទៅមកកាលពីថ្ងៃទី ១ ខែកញ្ញា ដែលជាការបន្ថែមពន្ធដោយគ្របដណ្ដប់លើទំនិញមានតម្លៃច្រើនពាន់លានដុល្លារ។
លោក ត្រាំ បានផ្តួចផ្ដើមសង្គ្រាមពាណិជ្ជកម្មជាមួយប្រទេសចិនដោយបានត្អូញត្អែរថា ចិនបានចូលរួមក្នុងការអនុវត្តពាណិជ្ជកម្មមិនស្មើភាព។
ក្រុមអ្នកវិភាគក្រុមហ៊ុន Barclays បានឲ្យដឹងក្នុងរបាយការណ៍ស្រាវជ្រាវមួយថា៖ «ការកែតម្រូវទាំងនេះផ្ដល់សញ្ញាថា ប្រទេសចិនកំពុងមានឆន្ទៈកាន់តែខ្លាំងក្នុងការធ្វើឲ្យមានការរីកចម្រើនក្នុងការចរចាពាណិជ្ជកម្មនៅខែតុលា ដែលទំនងជានឹងសម្រេចបានកិច្ចព្រមព្រៀងទាក់ទងនឹងប្រទេសចិនក្នុងការទិញទំនិញរបស់អាមេរិកកាន់តែច្រើន ជាថ្នូរនឹងការពន្យារពេលបង្កើនពន្ធនាំចូលបន្ថែមទៀតរបស់អាមេរិក»។
ពួកគេបានឲ្យដឹងថា ទីក្រុងប៉េកាំងកំពុងធ្វើឲ្យប្រសើរឡើងនូវរបាយការណ៍ «ប្រកបដោយន័យស្ថាបនា» កាន់តែច្រើននៅក្នុងរយៈពេលប៉ុន្មានសប្ដាហ៍ថ្មីៗនេះទៅលើទំនាក់ទំនងពាណិជ្ជកម្ម៕ LA