ក្រុងអាប៊ុយដាប៊ីៈ ប្រទេស អេមីរ៉ាតអារ៉ាប់រួម បានឲ្យដឹងកាលពីថ្ងៃអង្គារថា ខ្លួនបានសម្រេចលុបចោលការដាក់កម្រិតដែលមានអាយុកាល ១ ទសវត្សរ៍ លើភាពជាកម្មសិទ្ធិបរទេស និងអនុញ្ញាតឲ្យបរទេសមានសិទ្ធិគ្រប់គ្រងពេញលេញទៅលើការបណ្តាក់ទុកអាជីវកម្ម។
អនុប្រធានាធិបតី និងជានាយករដ្ឋមន្ត្រីរបស់អេមីរ៉ាតអារ៉ាប់រួមលោក Mohammed bin Rashed Al-Maktoum បានសរសេរលើ Twitter ថា៖ «ក្នុងកិច្ចប្រជុំគណៈរដ្ឋមន្ត្រីដែលខ្ញុំធ្វើជាប្រធានក្នុងទីក្រុងអាប៊ុយដាប៊ី យើងបានអនុម័តភាពជាម្ចាស់កម្មសិទ្ធិបរទេស ១០០ ភាគរយ ក្នុងសកម្មភាពសេដ្ឋកិច្ចចំនួន ១២២»។
សេចក្តីសម្រេចនេះលុបចោលច្បាប់ដែលដាក់កម្រិតភាពជាម្ចាស់កម្មសិទ្ធិបរទេសត្រឹម ៤៩ ភាគរយ ដែលច្បាប់នេះអនុវត្តអស់រយៈពេល ១ ទសវត្សរ៍មកហើយ។
លោក Mohammed បន្ថែមថា វិធានការនេះគ្របដណ្តប់លើ «វិស័យនានារួមទាំងកសិកម្ម ផលិតកម្ម ថាមពលកកើតឡើងវិញ ពាណិជ្ជកម្មអេឡិចត្រូនិក ដឹកជញ្ជូន សិល្បៈ សំណង់ និងកម្សាន្ត»។
សេចក្តីថ្លែងការណ៍មួយរបស់រដ្ឋាភិបាលបានឲ្យដឹងថា អាណាចក្រទាំង ៧ ដែលរួមគ្នាបង្កើតបានជាប្រទេស អេមីរ៉ាតអារ៉ាប់រួម នឹងមានឆន្ទានុសិទ្ធិក្នុងការចែងជាក់លាក់ពីកម្រិតកំណត់ខ្ពស់បំផុតផ្ទាល់របស់ខ្លួនទាក់ទងនឹងភាពជាម្ចាស់កម្មសិទិ្ធបរទេសក្នុងវិស័យអាជីវកម្មសំខាន់ៗ។
ដើម្បីគេចផុតពីកម្រិតកំណត់ភាពជាម្ចាស់កម្មសិទ្ធិ ៤៩ ភាគរយ អាណាចក្រមួយចំនួនដែលនាំមុខដោយអាណាចក្រឌូបៃ បានបង្កើតតំបន់ពាណិជ្ជកម្មសេរីជាទីដែលវិនិយោគិនបរទេសអាចកាន់កាប់អាជីវកម្មរបស់ខ្លួនបាន ១០០ ភាគរយ។
លោក Mohammed បានថ្លែងថា សេចក្តីសម្រេចនៅថ្ងៃអង្គារនេះបើកចំហសេដ្ឋកិច្ចរបស់អេមីរ៉ាតអារ៉ាប់រួមទៅដល់ជនជាតិបរទេសទាំងអស់ ដើម្បី «ធ្វើឲ្យប្រទេសនេះក្លាយជាទិសដៅមួយក្នុងចំណោមទិសដៅល្អបំផុតសម្រាប់ការវិនិយោគសកលលោក»។
សេចក្តីសម្រេចចិត្តរបស់គណៈរដ្ឋមន្ត្រីនេះបើកចំហជាពិសេសនូវវិស័យសេដ្ឋកិច្ចធំៗចំនួន ១៣ នៅក្នុងប្រទេសដែលមានសេដ្ឋកិច្ចធំទី២ និងមានពិពិធកម្មខ្លាំងបំផុតរបស់ពិភពអារ៉ាប់នេះ។
រដ្ឋធានីអាប៊ុយដាប៊ី ជាទីតាំងដែលមានកំណប់ប្រេងភាគច្រើននៃប្រេងរបស់អេមីរ៉ាតអារ៉ាប់រួម និងបូមប្រេងជិត ៣ លានបារ៉ែលក្នុង ១ ថ្ងៃ៕ AFP/KC