ក្រុង ហ្វ្រេងហ្វឺតៈ លោក Olaf Scholz រដ្ឋមន្ដ្រីក្រសួងហិរញ្ញវត្ថុអាល្លឺម៉ង់ បានឲ្យដឹងនៅក្នុងបទសម្ភាសមួយដែលត្រូវបានចេញផ្សាយកាលពីថ្ងៃអាទិត្យថា លោកបានគាំទ្រឲ្យមានរបបសារពើពន្ធអប្បបរមាពិភពលោកមួយសម្រាប់ក្រុមហ៊ុនអន្តរជាតិ ខណៈអឺរ៉ុបព្យាយាមដកហូតពន្ធ ជាពិសេសទៅលើក្រុមហ៊ុនបច្ចេកវិទ្យាធំៗរបស់អាមេរិក។
លោក Scholz ដែលជាអ្នកប្រជាធិបតេយ្យសង្គមនៅក្នុងរដ្ឋាភិបាលចម្រុះអភិរក្សរបស់លោកស្រីអធិការបតី Angela Merkel បានប្រាប់កាសែត «Welt am Sonntag» ប្រចាំសប្ដាហ៍ថា៖ «យើងត្រូវការអត្រាពន្ធអប្បបរមាដែលមានសុពលភាពនៅទូទាំងសកលលោក ដែលមិនមានប្រទេសណាមួយអាចនៅក្រៅ [របបពន្ធ] នេះបាន»។
អឺរ៉ុបកំពុងព្យាយាមបង្កើតយុទ្ធសាស្ដ្រមួយ ដើម្បីដកហូតពន្ធលើប្រាក់ចំណេញពីក្រុមហ៊ុនជាច្រើន ដូចជា ក្រុមហ៊ុន Google ក្រុមហ៊ុន Amazon ក្រុមហ៊ុន Facebook ក្រុមហ៊ុន Apple និងគេហទំព័រឌីជីថលនានា ដូចជា YouTube និង Airbnb ដែលបច្ចុប្បន្នក្រុមហ៊ុនទាំងនោះអាចគេចផុតពីការប្រឈមទៅនឹងសារពើពន្ធអប្បបរមា។
លោក Scholz បានថ្លែងថា គេហទំព័រឌីជីថល «ធ្វើឲ្យបញ្ហាកាន់តែធ្ងន់ធ្ងរ ដែលយើងដឹងច្បាស់រួចហើយពីការធ្វើសកលភាវូបនីយកម្ម និងដែលយើងកំពុងព្យាយាមទប់ទល់ ពោលគឺការផ្ទេរប្រាក់ចំណេញទៅកាន់តំបន់ដែលមានអត្ថប្រយោជន៍សារពើពន្ធ»។
ទោះយ៉ាងណា នៅសប្តាហ៍មុនមានសេចក្តីរាយការណ៍ថា លោក Scholz មិនបានគាំទ្រដល់សំណើរបស់ EU ដ៏ចម្រូងចម្រាសមួយ ដើម្បីដកហូតពន្ធអឺរ៉ុបលើក្រុមហ៊ុនបច្ចេកវិទ្យាធំៗរបស់អាមេរិកនោះទេ ក្នុងគ្រាដែលមានក្តីបារម្ភថា វាអាចប្រែក្លាយជាគ្មានប្រសិទ្ធភាព និងការគាំពារនិយម។
រយៈពេលមួយឆ្នាំ ប្រទេសបារាំងបានប្រមែប្រមូលផ្ដុំដៃគូ EU ជាច្រើន ដើម្បីរៀបចំពន្ធ ដែលទីក្រុងប៉ារីសបានឲ្យដឹងថា ចាំបាច់ត្រូវធានាថា ក្រុមហ៊ុនបច្ចេកវិទ្យាធំៗបង់ពន្ធតាមអ្វីដែលត្រូវបង់។
លោក Scholz បានពន្យល់ថា លោកបានបង្កើតគំនិតផ្ដួចផ្ដើមដែលបង្កើតឡើងដើម្បីជួយប្រទេសជាច្រើនឲ្យប្រតិកម្មតបនឹងអ្វីដែលហៅថា ការបង្ខូចសារពើពន្ធ ដើម្បីគាំទ្រដល់ផែនការរបស់អង្គការ OECD ដែលកំពុងបង្កើតឡើង ដើម្បីប្រយុទ្ធប្រឆាំងនឹងតម្លាភាពពន្ធ និងការគេចពន្ធឆ្លងកាត់ព្រំដែន។
លោក Scholz ថ្លែងថា៖ «យើងត្រូវការយន្តការសម្របសម្រួល ដែលទប់ស្កាត់ការផ្ទេរប្រាក់ចំណេញទៅបណ្ដាប្រទេសដែលដកហូតពន្ធទាប»។
គណៈកម្មការអឺរ៉ុប ដែលជាស្ថាប័នប្រតិបត្តិរបស់សហភាពអឺរ៉ុប EU បានស្នើបង្កើតពន្ធអឺរ៉ុបដកហូតពន្ធលើ «ក្រុមហ៊ុនបច្ចេកវិទ្យាធំៗ» ដែលមានប្រាក់ចំណូលឌីជីថលច្រើននៅអឺរ៉ុប ដោយផ្អែកលើប្រាក់ចំណូលរួមនៅអឺរ៉ុប និងមិនមែនគ្រាន់តែជាប្រាក់ចំណេញប៉ុណ្ណោះទេ។
ប៉ុន្តែប្រទេស អៀរឡង់ ដែលជាប្រទេសជំទាស់ឈានមុខគេបានឲ្យដឹងថា ប្រទេសកាន់តែច្រើនឡើងកំពុងរអ៊ូរទាំអំពីបញ្ហាលាក់បាំងពន្ធ។
ក៏មានក្តីបារម្ភផងដែរទាក់ទងនឹងអ្វីដែលជាផលវិបាកដែលអាចកើតមានពីផែនការបែបនេះនៅពេលមួយ ក្នុងគ្រាដែលសង្គ្រាមពាណិជ្ជកម្មរវាងអាមេរិក និងអឺរ៉ុបអាចកើតមានពេញបន្ទុក។
ទីក្រុងបែរឡាំង បារម្ភថា ការកើនឡើងជម្លោះពាណិជ្ជកម្មជាមួយសហរដ្ឋអាមេរិកតាមរយៈការចាប់ផ្តើមដកហូតពន្ធលើក្រុមហ៊ុនបច្ចេកវិទ្យាធំៗរបស់អាមេរិកនោះ អាចគំរាមកំហែងដល់ការនាំចេញរបស់អាល្លឺម៉ង់៕ AFP/LA