ក្រុងប៊ែរឡាំងៈ លោកស្រីអធិការបតីអាល្លឺម៉ង់ Angela Merkel (CDU) បានបញ្ជូនការព្រមានមួយទៅកាន់លោកប្រធានាធិបតីអាមេរិក ដូណាល់ ត្រាំ ថា សហភាពអឺរ៉ុប (EU) ត្រៀមខ្លួនរួចជាស្រេចដើម្បីសងសឹកក្នុងសង្គ្រាមពាណិជ្ជកម្មដែលកំពុងកើនឡើងរវាងប្រទេសមហាអំណាចអន្តរអាត្លង់ទិកទាំង ២ នេះ។
លោកស្រី Merkel បានថ្លែងតាមទូរទស្សន៍សាធារណៈរបស់ប្រទេសអាល្លឺម៉ង់ (ARD) កាលពីរាត្រីថ្ងៃអាទិត្យថា៖ «យើងនឹងមិនទុកបណ្តោយឲ្យខ្លួនយើងត្រូវបានគេបោកប្រាស់ម្ដងហើយម្ដងទៀតនោះទេ»។
ការប្ដេជ្ញាចិត្តរបស់លោកស្រីអធិការបតីរូបនេះត្រូវបានធ្វើឡើងភា្លមៗ បន្ទាប់ពីលោកប្រធានាធិបតីអាមេរិកបានដកការគាំទ្រគួរឲ្យភ្ញាក់ផ្អើលសម្រាប់ការចេញសេចក្ដីថ្លែងការណ៍រួមមួយស្ដីពីពាណិជ្ជកម្មសេរីដែលត្រូវបានប្រឹងប្រែងយ៉ាងខ្លាំងដើម្បីចេញសេចក្តីថ្លែងការណ៍នេះដែលបានចុះហត្ថលេខានៅក្នុងកិច្ចប្រជុំក្រុមប្រទេស G7 នៅពេលថ្មីៗនៅទីក្រុង La Malbaie ប្រទេសកាណាដា។
លោកស្រី Merkel បានហៅកាលៈទេសៈដែលលោក ត្រាំ បានប្រកាសការផ្លាស់ប្តូរចិត្តនៅនាទីចុងក្រោយរបស់លោកតាមរយៈបណ្តាញសង្គមធ្វីធើរ ដែលជាបណ្ដាញមិនផ្លូវការសម្រាប់ការផ្លាស់ប្តូរទស្សនៈការទូតកម្រិតខ្ពស់នោះថាជា «បញ្ហាធ្ងន់ធ្ងរ» និង «ការធ្វើឲ្យខកចិត្ត»។
បើទោះជារដ្ឋាភិបាលសហព័ន្ធអាល្លឺម៉ង់បានចាត់ទុកឯកសារកិច្ចប្រជុំកំពូលចុងក្រោយនេះថានៅតែត្រូវបានចងភ្ជាប់កាតព្វកិច្ចស្របច្បាប់ក៏ដោយ ក៏អាល្លឺម៉ង់ និងសហភាពអឺរ៉ុបនឹងមិនអង្គុយនៅស្ងៀមនោះដែរ ខណៈដែលអាមេរិកបានងាកយ៉ាងខ្លាំងទៅរកគោលនយោបាយគាំពារនិយម។
យោងតាមលោកស្រី Merkel អាល្លឺម៉ង់មានជម្រើសតិចតួច ប៉ុន្តែប្រឆាំងតបយ៉ាងខ្លាំងទៅវិធីសាស្ត្រមិនប្រក្រតី និងឯកតោភាគីដែលបានអនុម័តដោយលោក ដូណាល់ ត្រាំ។ ការធ្វើឲ្យខូចកាន់តែខ្លាំងឡើងនៃទំនាក់ទំនងអន្តរអាត្លង់ទិកនេះបានបង្ហាញថាអឺរ៉ុប «បានពឹងផ្អែកងាយស្រួលពេក» លើទីក្រុងវ៉ាស៊ីនតោននាពេលកន្លងមក ហើយឥឡូវនេះនឹងត្រូវធ្វើការងារឆ្ពោះទៅរកការរួបរួមគ្នាកាន់តែខ្លាំងបន្ថែមទៀតសម្រាប់អឺរ៉ុប ដើម្បីអភិរក្សស្វ័យភាពរបស់ខ្លួននៅលើឆាកអន្តរជាតិ។
ដោយប្រតិកម្មចំពោះការបញ្ចប់ដោយភាពវឹកវរនៃកិច្ចប្រជុំរបស់ក្រុមប្រទេស G7 គណបក្សប្រជាធិបតេយ្យសេរី (F- DP) របស់អាល្លឺម៉ង់បានជំរុញឲ្យលោកស្រី Merkel បង្ហាញមុខនៅចំពោះមុខសភាសហព័ន្ធ និងពន្យល់ប្រាប់តំណាងរាស្ដ្រអំពីរបៀបដែលទីក្រុងប៊ែរឡាំងមានបំណងធ្វើនៅពេលខាងមុខ។
លោក Marco Buschmann លេខាធិការសភាមកពីគណបក្ស FDP បានប្រាប់ទីភ្នាក់ងារព័ត៌មានអាល្លឺម៉ង់ DPA ថាវា «ចាំបាច់ខ្លាំងណាស់» សម្រាប់គណៈប្រតិភូដែលត្រូវសាកសួរឲ្យបានហ្មត់ចត់ បន្ទាប់ពីមាន «រឿងអាស្រូវមិនធ្លាប់មាន» នៅក្នុងកិច្ចប្រជុំកំពូលនេះ។
ថ្លែងទៅកាន់ទីភ្នាក់ងារព័ត៌មានស៊ីនហួកាលពីថ្ងៃចន្ទលោក Juergen Matthes បម្រើការនៅវិទ្យាសា្ថនសេដ្ឋកិច្ចអាល្លឺម៉ង់ (IW) បានថ្លែងថាលោក ដូណាល់ ត្រាំ បាន «ប្រែក្លាយ G7 ទៅជា G6 តាមព្រឹត្តន័យ»៕ People''s Daily/LA