.jpg)
រូបថតកាត់តផ្គុំគ្នារវាងលោកប្រធានាធិបតីអាមេរិក ដូណាល់ ត្រាំ និង ប្រធានាធិបតីអីុរ៉ង់ ក្នុងអំឡុងសន្និបាតUN កាលពីខែកញ្ញា។ AFP
ក្រុងតេអេរ៉ង់ៈ លោកប្រធានាធិបតីប្រទេស អីុរ៉ង់ Hassan Rouhani បានឲ្យដឹងថា រដ្ឋអ៊ិស្លាមមួយនេះ «នឹងគេចផុតពីទណ្ឌកម្ម» ដាក់ដោយអាមេរិក ដែលចូលជាធរមាន កាលពីថ្ងៃចន្ទ។
ទណ្ឌកម្មនេះ បានកំណត់ពីទិសដៅវិស័យប្រេង និងហិរញ្ញវត្ថុរបស់ប្រទេសរដ្ឋអ៊ិស្លាមមួយនេះ។
លោក Rouhani បានថ្លែងនៅក្នុងសុន្ទរកថាផ្សាយតាមទូរទស្សន៍ថា៖ «ខ្ញុំប្រកាសថា យើងនឹងគេចផុតដោយមោទនភាពនូវការដាក់ទណ្ឌកម្មខុសច្បាប់ អយុត្តិធម៌របស់អ្នកដោយសារវាប្រឆាំងនឹងបទប្បញ្ញត្តិអន្តរជាតិ»។
លោកបន្តថា៖ «យើងកំពុងស្ថិតក្នុងស្ថានភាពសង្គ្រាមសេដ្ឋកិច្ច ដែលប្រឈមនឹងការគំរាមកំហែងរបស់ប្រទេសមហាអំណាចមួយ។ ខ្ញុំមិនគិតថា នៅក្នុងប្រវត្តិសាស្ដ្ររបស់អាមេរិកនរណាម្នាក់បានចូលទៅក្នុងសេតវិមាន ប្រឆាំងនឹងច្បាប់ និងអនុសញ្ញាអន្តរជាតិទេ»។
វិធានការនេះត្រូវបានពណ៌នាដោយទីក្រុងវ៉ាស៊ីនតោនថាជា «ការដាក់ទណ្ឌកម្មដ៏ខ្លាំងបំផុតមិនធ្លាប់មាន» បន្ទាប់ពីការសម្រេចដ៏ចម្រូងចម្រាសរបស់ប្រធានាធិបតីអាមេរិក ដូណាល់ ត្រាំ កាលពីខែឧសភា ដើម្បីបោះបង់ចោលកិច្ចព្រមព្រៀងនុយក្លេអ៊ែរអន្តរជាតិ ជាមួយទីក្រុងតេអេរ៉ង់។
វិធានការចុងក្រោយបំផុតនេះ មានបំណងកាត់បន្ថយការនាំចេញប្រេងដ៏ធំរបស់ប្រទេសអីុរ៉ង់ ដែលបានធ្លាក់ចុះរួចហើយប្រហែល ១ លានបារ៉ែលក្នុងមួយថ្ងៃ គឺចាប់តាំងពីខែឧសភា និងកាត់ផ្ដាច់ប្រទេសមួយនេះចេញពីហិរញ្ញប្បទានអន្តរជាតិ។
អាមេរិក បានផ្ដល់ការលើកលែងជាបណ្ដោះអាសន្ន ដល់ប្រទេសចំនួន ៨ ដែលរួមមានឥណ្ឌា ជប៉ុន និងតួកគី ក្នុងការបន្តការទិញប្រេង ក្នុងគោលបំណងគេចផុតពីការបារម្ភទីផ្សារសេដ្ឋកិច្ចរបស់ពួកគេ និងទីផ្សារពិភពលោក។ ប៉ុន្តែលោក Mike Pompeo រដ្ឋមន្ដ្រីក្រសួងហិរញ្ញវត្ថុអាមេរិក បានប្ដេជ្ញាថា នឹងជំរុញការលក់ប្រេងរបស់អីុរ៉ង់ឲ្យដល់ចំណុចសូន្យ។
លោកបានប្រាប់ «កម្មវិធី Face the Nation» របស់ទូរទស្សន៍ CBS កាលពីថ្ងៃអាទិត្យ ថា៖ «ចូរមើលអ្វីដែលយើងធ្វើ។ ចូរមើល ខណៈយើងបានយកប្រេងឆៅរួចហើយចេញពីទីផ្សារនេះ ច្រើនជាងពេលណាៗទាំងអស់នៅក្នុងប្រវតិ្តសាស្ដ្រមុន»។
រដ្ឋការលោក ត្រាំ ឲ្យដឹងថា ខ្លួនចង់បានកិច្ចព្រមព្រៀងថ្មីមួយ ជាមួយនឹងប្រទេសអីុរ៉ង់ ដែលរារាំងការធ្វើអន្តរាគមន៍របស់អីុរ៉ង់ជុំវិញមជ្ឈិមបូព៌ា និងកម្មវិធីមីស៊ីល ជាការទាមទារដែលត្រូវបានបដិសេធដាច់អហង្ការពីទីក្រុងតេអេរ៉ង់។
លោក Rouhani ថ្លែងថា៖ «ជានិច្ចកាល ពួកគេកំពុងផ្ញើសារមកពួកយើង ដោយថ្លែងថា «ចូរយើងអង្គុយហើយចរចាគ្នា តែជាការចរចាដើម្បីអ្វី?»។
លោកបានថ្លែងថា៖ «ដំបូងអ្នកគោរពការចរចា ដែលបានសម្រេចរួចហើយ ដើម្បីឲ្យមានមូលដ្ឋានសម្រាប់ការចរចាពេលក្រោយ»។
លោក Rouhani ថ្លែងថា ប្រទេស ៤ បានជួបលោកក្នុងអំឡុងដំណើរទស្សនកិច្ចទៅកាន់ទីក្រុងញូវយ៉ក សម្រាប់មហាសន្និបាតអង្គការសហប្រជាជាតិកាលពីខែកញ្ញា ដោយផ្ដល់ការសម្របសម្រួលជាមួយអាមេរិក ប៉ុន្តែលោកបានបដិសេធ។
លោកបានបញ្ជាក់ថា៖ «មិនចាំបាច់មានការសម្របសម្រួលអ្វីនោះទេ។ មិនចាំបាច់ត្រូវមានសារទាំងអស់នេះទេ។ ចូរធ្វើតាមការប្ដេជ្ញាចិត្តរបស់អ្នក ហើយយើងនឹងអង្គុយចរចាគ្នា»។
សេដ្ឋកិច្ចរបស់ប្រទេស អីុរ៉ង់ កំពុងទទួលរងផលប៉ះពាល់រួចមកហើយដោយសារបញ្ហារចនាសម្ព័ន្ធសំខាន់ៗ មួយចំនួនដែលរួមទាំងបញ្ហាធនាគារធំៗ មុនពេលដែល លោកត្រាំ បានដើរចេញពីកិច្ចព្រមព្រៀងនុយក្លេអ៊ែរនេះទៅទៀត៕ AFP/LA
