.jpg)
សាច់គោដាក់ក្នុងផ្សារទំនើបមួយក្នុងទីក្រុងណង់ ប្រទេស បារាំង។ រូបថត AFP
ក្រុងប៊្រុចសែលៈ សហភាពអឺរ៉ុបសម្រេចបានកិច្ចព្រមព្រៀងមួយ ដើម្បីបញ្ចប់ជម្លោះរយៈពេលវែងជាមួយសហរដ្ឋអាមេរិកជុំវិញការនាំចូលសាច់គោអាមេរិក ដោយសង្ឃឹមថា កិច្ចព្រមព្រៀងនេះអាចបន្ធូរបន្ថយភាពតានតឹងរវាងភាគីទាំង ២។ នេះបើយោងតាមសេចក្តីថ្លែងការណ៍មួយកាលពីចុងសប្តាហ៍មុន។
លោក Phil Hogan ស្នងការទទួលបន្ទុកកសិកម្មរបស់សហភាពអឺរ៉ុបបានឲ្យដឹងក្នុងសេចក្តីថ្លែងការណ៍មួយថា៖ «ជាមួយនឹងជំហាននេះ សហភាពអឺរ៉ុបអះអាងជាថ្មីពីការប្តេជ្ញាចិត្តរបស់ខ្លួនក្នុងការនាំយកដំណាក់កាលថ្មីមួយសម្រាប់ទំនាក់ទំនងជាមួយសហរដ្ឋអាមេរិក»។
កិច្ចព្រមព្រៀងស្តីពីសាច់គោនេះសម្រេចបានបន្ទាប់ពីកាលជិត ១ ឆ្នាំមុន លោកប្រធានាធិបតីអាមេរិក ដូណាល់ ត្រាំ និងលោក Jean-Claude Juncker ប្រធានគណៈកម្មការអឺរ៉ុប បានប្តេជ្ញាថានឹងផ្អាកការដកហូតពន្ធសងសឹកគ្នាទៅវិញទៅមក និងថានឹងសម្រេចឲ្យបានកិច្ចព្រមព្រៀងដែលមានកម្រិត ១។
ភាពតានតឹងរវាងសម្ព័ន្ធមិត្តទាំង ២ បានកើនឡើងបន្ទាប់ពីលោក ត្រាំ បានដកហូតពន្ធលើដែកថែប និងអាលុយមីញ៉ូមរបស់អឺរ៉ុប និងបានគំរាមដកហូតពន្ធបន្ថែមទៀតលើរថយន្តអឺរ៉ុប។
ជម្លោះជុំវិញសាច់គោដែលមានសារធាតុអ័រម៉ូនកើតមានឡើងតាំងពីឆ្នាំ ១៩៨៨ នៅពេលដែលអឺរ៉ុបបានហាមឃាត់ការនាំចូលសាច់ដែលយកពីសត្វដែលមានចាក់អ័រម៉ូនឲ្យលូតលាស់លឿន ដែលការអនុវត្តនេះកើតមានជាធម្មតានៅសហរដ្ឋអាមេរិក។
ជាការសងសឹកវិញ និងស្របតាមច្បាប់របស់អង្គការពាណិជ្ជកម្មពិភពលោក នៅឆ្នាំ ១៩៩៩ សហរដ្ឋអាមេរិកបានដាកហូតពន្ធគយកាន់តែខ្ពស់លើផលិតផលរបស់អឺរ៉ុបមួយចំនួនដែលបង្កឲ្យមានបាតុកម្មខឹងសម្បាក្នុងប្រទេស បារាំង។
ស្ថិតក្រោមការសម្រុះសម្រួលដែលសម្រេចបានក្នុងឆ្នាំ ១៩៩៩ និងបានធ្វើវិសោធនកម្មនៅឆ្នាំ ២០១៤ សហរដ្ឋអាមេរិកបានលុបចោលទណ្ឌកម្មនានា ដែលខ្លួនបានដាក់ ហើយអឺរ៉ុបបានបង្កើតកូតានាំចូលមួយសម្រាប់សាច់គោបរទេសដែលមិនមានសារធាតុអ័រម៉ូន «ដែលមានគុណភាពខ្ពស់» រួមទាំងសាច់គោមកពីសហរដ្ឋអាមេរិកផងដែរ៕ AFP/KC
