ក្រុងប្រ៊ុចសែលៈ សហភាពអឺរ៉ុបបានថ្លែងកាលពីថ្ងៃចន្ទថា ខ្លួនសោកស្តាយយ៉ាងខ្លាំង ចំពោះការដាក់ទណ្ឌកម្មឡើងវិញរបស់អាមេរិកទៅលើប្រទេសអ៊ីរ៉ង់ បន្ទាប់ពីប្រធានាធិបតីអាមេរិកលោក ដូណាល់ ត្រាំ បានបោះបង់កិច្ចព្រមព្រៀងនុយក្លេអ៊ែរឆ្នាំ ២០១៥ ហើយបានប្តេជ្ញាថានឹងចាត់វិធានការភ្លាមៗ ដើម្បីការពារក្រុមហ៊ុនអឺរ៉ុប។
សេចក្តីថ្លែងការណ៍ដែលចេញផ្សាយដោយលោកស្រី Federica Mogherini ប្រធានផ្នែកការទូតសហភាពអឺរ៉ុប និងរដ្ឋមន្ត្រីការបរទេសអង់គ្លេស បារាំង និងអាល្លឺម៉ង់ បានឲ្យដឹងថាសហភាពអឺរ៉ុបនឹងធ្វើការងារផងដែរក្នុងការរក្សាការបើកចំហ «បណ្តាញហិរញ្ញវត្ថុប្រកបដោយប្រសិទ្ធភាព» ជាមួយប្រទេសអ៊ីរ៉ង់។
សេចក្តីថ្លែងការណ៍ដែលចេញនៅទីក្រុងប្រ៊ុចសែលនេះបានឲ្យដឹងថា៖ «យើងសោកស្តាយយ៉ាងខ្លាំងចំពោះការដាក់ទណ្ឌកម្មឡើងវិញ ដោយអាមេរិក ដោយសារការដកខ្លួនរបស់អាមេរិកចេញពីផែនការសកម្មភាពទូលំទូលាយរួមគ្នា (JCPOA)» ។
សហភាពអឺរ៉ុបបានឲ្យដឹងថាឥឡូវនេះអឺរ៉ុបនឹងនាំយកមកយ៉ាងឆាប់រហ័សនូវការការពារផ្នែកច្បាប់សម្រាប់ក្រុមហ៊ុនដែលស្ថិតក្នុងប្លុកដែលមានសមាជិក ២៨ ប្រទេស ដើម្បីធ្វើការជាមួយប្រទេសអ៊ីរ៉ង់»។
សេចក្តីថ្លែងការណ៍ដដែលនេះបន្តថា៖ «យើងប្តេជ្ញាការពារប្រតិបត្តិករសេដ្ឋកិច្ចអឺរ៉ុបដែលធ្វើអាជីវកម្មស្របច្បាប់ជាមួយអ៊ីរ៉ង់»។
សេចក្តីថ្លែងការណ៍នេះបានបន្តថា៖ «នេះគឺជាមូលហេតុដែលលក្ខន្តិកៈរារាំងដែលត្រូវបានធ្វើបច្ចុប្បន្នភាពរបស់សហភាពអឺរ៉ុបចូលជាធរមាននៅថ្ងៃទី ៧ សីហា ដើម្បីការពារក្រុមហ៊ុនសហភាពអឺរ៉ុបដែលធ្វើអាជីវកម្មស្របច្បាប់ជាមួយប្រទេសអ៊ីរ៉ង់មិនឲ្យរងផលប៉ះពាល់ពីការដាក់ទណ្ឌកម្មរបស់អាមេរិក»។
លក្ខន្តិកៈនេះហាមប្រាមក្រុមហ៊ុនរបស់សហភាពអឺរ៉ុបមិនឲ្យគោរពតាមទណ្ឌកម្មរបស់អាមេរិក ដោយអនុញ្ញាតឲ្យពួកគេរួចផុតពីការដាក់ទោសទណ្ឌបែបនេះ និងមោឃភាពចំពោះសេចក្តីសម្រេចរបស់តុលាការបរទេសណាមួយប្រឆាំងនឹងពួកគេ។
ក្រុមហ៊ុនផលិតរថយន្ត Renault របស់ប្រទេសបារាំងដែលមិនលក់រថយន្តនៅសហរដ្ឋអាមេរិកបានឲ្យដឹងថា ខ្លួននឹងនៅតែនៅធ្វើអាជីវកម្មក្នុងប្រទេសអ៊ីរ៉ង់បើទោះបីជាមានទណ្ឌកម្មនេះក៏ដោយ។ ប៉ុន្តែក្រុមហ៊ុនផលិតប្រេង Total និងក្រុមហ៊ុនផលិតរថយន្ត PSA របស់ប្រទេសបារាំងបានឲ្យដឹងរួចហើយថា ក្រុមហ៊ុនទាំង ២ នេះនឹងទំនងជាដកចេញពីប្រទេសអ៊ីរ៉ង់។
បើទោះបីជាសហរដ្ឋអាមេរិកដាក់ទណ្ឌកម្មឡើងវិញ ហើយរដ្ឋមន្ត្រីការបរទេសអាមេរិកលោក Mike Pompeo បានបញ្ជាក់ជាថ្មីអំពីបញ្ហានេះនៅក្នុងរដ្ឋអាឡាស្កាកាលពីល្ងាចថ្ងៃអាទិត្យក៏ដោយ ក៏សហភាពអឺរ៉ុបបានឲ្យដឹងថា ពួកគេនឹងបន្តធ្វើការជាមួយប្រទេសអ៊ីរ៉ង់ដើម្បីរក្សាកិច្ចព្រមព្រៀងនេះ៕ PS