ភ្នំពេញៈ ជាមួយនឹងការទទួលបានកំណើនរយៈពេលជាង ២ ទសវត្សរ៍ Acleda Bank Plc ដែលជាធនាគារពាណិជ្ជគ្រប់គ្រងដោយវិនិយោគិនក្នុងស្រុកឈានមុខគេមួយនៅកម្ពុជាមានសុទិដ្ឋិនិយមថា ការបោះផ្សាយមូលបត្រកម្មសិទ្ធិរបស់ខ្លួននឹងអាចទាក់ទាញវិនិយោគិនកាន់តែច្រើនឲ្យចូលមកផ្សារមូលបត្រកម្ពុជា (CSX)។
ACLEDA Bank Plc គឺជាធនាគារពាណិជ្ជលើកដំបូងដែលបានទទួលការយល់ព្រមជាគោលការណ៍លើការត្រួតពិនិត្យសិទ្ធិចុះបញ្ជីមូលបត្រភាគហ៊ុនពី CSX សម្រាប់ការជួញដូរមូលបត្ររបស់ខ្លួន បន្ទាប់ពីធនាគារនេះបានទទួលលិខិតជាផ្លូវការពីធនាគារជាតិនៃកម្ពុជា (NBC) កាលពីថ្ងៃទី ២៦ ខែវិច្ឆិកាដែលអាចឲ្យធនាគារនេះបន្តផែនការរបស់ខ្លួនសម្រាប់ការបោះផ្សាយមូលបត្រសាធារណៈលើកដំបូង( IPO)។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាបានឲ្យដឹងក្នុងកម្មវិធីនៃការធ្វើរ៉ូដសូរយៈពេល ៣ ថ្ងៃ នៅការិយាល័យកណ្ដាលរបស់ខ្លួនកាលពីថ្ងៃសុក្រថាជាមួយបទពិសោធជាង ២៧ ឆ្នាំក្នុងវិស័យហិរញ្ញវត្ថុ ចាប់តាំងពីការចាប់ផ្ដើមដំបូងជាអង្គការមិនមែនរដ្ឋាភិបាលមួយកាលពីឆ្នាំ ១៩៩៣ ជាមួយនឹងទុនវិនិយោគត្រឹមតែ ៦០០ ០០០ ដុល្លារប៉ុណ្ណោះ បច្ចុប្បន្នទុនរបស់ធនាគារនេះបានកើនឡើង ៧០០ ដង ខណៈទ្រព្យសកម្មសរុបមានប្រហែល ៩០០ លានដុល្លារ ដែលបានកើនឡើងជាង ៩ ០០០ ដង និងប្រាក់ចំណេញសុទ្ធក៏បានកើនឡើងជិត ២ ០០០ ដង។
លោកថ្លែងថា៖ «វាជាការបើកទំព័រថ្មីមួយនៃធនាគាររបស់យើងនៅក្នុងផ្សារហ៊ុន ហើយមូលហេតុអ្វីយើងចាំបាច់ត្រូវឡើងផ្សារហ៊ុន? ដោយសារតែធនាគាររបស់យើងកំពុងរីកចម្រើនជាមួយប្រជាជនរបស់យើងក្នុងរយៈពេលជាច្រើនទសវត្សរ៍មកហើយ ហើយនៅពេលនេះវាដល់ពេលក្នុងការបន្តការរីកចម្រើននៅក្នុងទីផ្សារមូលធនដើម្បីអាចឲ្យអតិថិជនរបស់យើងអាចវិនិយោគជាមួយពួកយើងនៅផ្សារហ៊ុន ដូច្នេះពួកគេនឹងក្លាយជាភាគទុនិករបស់យើង»។
លោកបន្តថា៖ «ការបោះផ្សាយមូលបត្ររបស់ធនាគារអេស៊ីលីដា ខុសគ្នាពីក្រុមហ៊ុនចុះបញ្ជីផ្សេងទៀតដែលលក់ឲ្យការវិនិយោគស្ថាប័ន ប៉ុន្តែយើងលក់ឲ្យទាំងវិនិយោគិនស្ថាប័ន សាធារណជន និងវិនិយោគិនបុគ្គលនេះគឺជាការចែករំលែកការរីកចម្រើនដល់ប្រជាជនរបស់យើង»។
លោក ហុង សុខហួរ អគ្គនាយក CSX បានឲ្យដឹងថា Acleda Bank Plc គឺជាធនាគារពាណិជ្ជដំបូងគេនៅក្នុងប្រទេសកម្ពុជាដែលបានសម្រេចចិត្តបោះផ្សាយមូលបត្រកម្មសិទ្ធិរបស់ពួកគេលើ CSX ដែលវានឹងមានផលប៉ះពាល់វិជ្ជមានសម្រាប់ទីផ្សារនេះ។
លោកបញ្ជាក់ថា៖ «ខ្ញុំសង្ឃឹមថានឹងមានក្រុមវិនិយោគិនកាន់តែច្រើនវិនិយោគក្នុងធនាគារអេស៊ីលីដា ហើយវាដល់ពេលសម្រាប់វិនិយោគិនទាំងអស់អាចក្លាយជាភាគទុនិកធនាគារនេះ។ យើងអនុម័តលើសិទ្ធិទទួលបានការចុះបញ្ជីរបស់ពួកគេរួចហើយ»។
លោក Han Kyung Tae អគ្គនាយកក្រុមហ៊ុន Yuanta Securities ក៏បានឲ្យដឹងថាធនាគារអេស៊ីលីដានឹងទទួលបានការគាំទ្រកាន់តែច្រើនពីក្រុមវិនិយោគិន ដោយសារតែវាជាធនាគារតែមួយគត់ដែលគ្រប់គ្រងដោយវិនិយោគិនកម្ពុជា។
លោកបន្តថា៖ «នៅពេល IPO កើតឡើងធនាគារអេស៊ីលីដានឹងក្លាយជាធនាគារដំបូងគេ និងតែមួយគត់នៅកម្ពុជាដែលគ្រប់គ្រងដោយប្រជាជនកម្ពុជា ដូច្នេះធនាគារនេះនឹងរីកចម្រើនជាមួយប្រជាជនកម្ពុជា មិនមែនគ្រាន់តែអតិថិជនប៉ុណ្ណោះទេ ប៉ុន្តែភាគទុនិកផងដែរ ដែលនេះគឺជាសារៈសំខាន់របស់ IPO នេះ»។
លោក អ៊ិន ចាន់នី បានឲ្យដឹងថា នៅពេលនេះធនាគារកំពុងរង់ចាំការយល់ព្រមពីនិយតករគឺគណៈកម្មការមូលបត្រកម្ពុជា (SECC) ហើយសង្ឃឹមថា មូលបត្រកម្មសិទ្ធិរបស់ធនាគារនេះនឹងត្រូវបានជួញដូរនៅលើ CSX នៅដើមខែមេសា។
លោកលើកឡើងថា៖ «នៅពេលនេះយើងចាំបាច់ត្រូវទទួលបានការយល់ព្រមពីនិយតកររបស់យើង ខ្ញុំគិតថាយើងនឹងមិនត្រូវការរយៈពេលវែងនោះទេក្នុងការទទួលបានការយល់ព្រមពី SECC ដោយសារតែយើងបានត្រៀមយ៉ាងល្អសម្រាប់ការចុះបញ្ជី ហើយយើងបានដាក់ឯកសារពាក់ព័ន្ធដែលចាំបាច់ទាំងអស់ដល់និយតកររួចហើយ ខ្ញុំគិតថានឹងចាប់ផ្ដើមការជួញដូរមិនឲ្យលើសពីខែមេសា ឆ្នាំ ២០២០ នេះទេ»៕LA