ក្រុងញូវយ៉កៈ ឧស្សាហកម្មធ្វើដំណើរ និងទេសចរណ៍របស់អាមេរិកកំពុងបារម្ភអំពីចក្ខុវិស័យនៃការបាត់បង់អាជីវកម្មកាន់តែច្រើនពីប្រទេស ចិន ដោយសារតែភាពតានតឹងពាណិជ្ជកម្មទ្វេភាគីដែលពន្យារពេលកាន់តែយូរ។
ទិន្នន័យដែលចេញផ្សាយកាលពីខែមុនដោយការិយាល័យធ្វើដំណើរ និងទេសចរណ៍ជាតិរបស់អាមេរិកបានបង្ហាញថា ចំនួនភ្ញៀវទេសចរចិនដែលធ្វើដំណើរទៅអាមេរិក បានធ្លាក់ចុះ ៥,៧ ភាគរយ មកនៅត្រឹម ២,៩ លាននាក់ កាលពីឆ្នាំ ២០១៨ ទោះបីជាចំនួនធ្វើដំណើរក្រៅប្រទេសនៃភ្ញៀវទេសចរចិនសរុបបានចុះបញ្ជីកំណើនគួរឲ្យកត់សម្គាល់ក្តី។
លោក Christopher Heywood អនុប្រធានប្រតិបត្តិផ្នែកទំនាក់ទំនងពិភពលោកនៅក្រុមហ៊ុន NYC &Company ដែលជាអង្គការធ្វើទីផ្សារទិសដៅផ្លូវការសម្រាប់ទីក្រុងធំៗរបស់អាមេរិកបានប្រាប់ទីភ្នាក់ងារសារព័ត៌មាន ស៊ីនហួ ក្នុងបទសម្ភាសមួយថា៖ «យើងបារម្ភយ៉ាងខ្លាំងអំពីការធ្លាក់ចុះភ្ញៀវទេសចរចិន»។ លោកបន្តថា៖ «យើងកំពុងតាមដានស្ថានការណ៍នេះយ៉ាងយកចិត្តទុកដាក់បំផុត»។
យោងតាមសេចក្ដីរាយការណ៍ដែលចេញផ្សាយដោយសមាគមទេសចរណ៍អាមេរិក (USTA) កាលពីខែមីនា វិស័យធ្វើដំណើរ និងទេសចរណ៍គាំទ្រការងារប្រជាជនអាមេរិកដោយផ្ទាល់ និងប្រយោលចំនួន ១៥,៧ លាននាក់ ដោយ ១,២ លាននាក់ ក្នុងចំណោមពួកគេធ្វើការងារដោយផ្ទាល់ជាមួយនឹងការធ្វើដំណើរមកដល់របស់ភ្ញៀវទេសចរអន្តរជាតិ។
លោក Roger Dow ប្រធាន និងជាអគ្គនាយករបស់ USTA បានថ្លែងថា៖ «ការធ្លាក់ចុះណាមួយក្នុងដំណើរទេសចរណ៍អន្តរជាតិនឹងប៉ះពាល់ដល់ការងារ»៕ People''s Daily/LA