ក្រុងប្រ៊ុចសែលៈ ប្រមុខ គោលនយោបាយការបរទេសរបស់សហភាពអឺរ៉ុបកាលពីថ្ងៃសៅរ៍ បានស្នើឲ្យតួកគី បោះបង់ចោលសកម្មភាពយោធាឯកតោភាគីនៅលើទឹកដីស៊ីរី ជាទីដែលក្រុងអង់ការ៉ា បានគំរាមវាយប្រហារជាថ្មីប្រឆាំងនឹងក្រុមជីវពលឃើដគាំទ្រដោយអាមេរិកនោះ។
នៅក្នុងសេចក្តីថ្លែងការណ៍មួយ លោកស្រី Federica Mogherini បានថ្លែងថា៖ «របាយការណ៍អំពីលទ្ធភាពកិច្ចប្រតិបត្តិការយោធាតួកគីនៅស៊ីរីភាគឦសាន គឺជាប្រភពគួរឲ្យព្រួយបារម្ភ»។
លោកស្រី បានថ្លែងថា៖ «យើងមានបំណងបញ្ចប់អំពើហិង្សា ដោយកម្ទេចអំពើភេរវកម្ម និងធ្វើយ៉ាងណាឲ្យមានស្ថិរភាពនៅក្នុងប្រទេសស៊ីរី និងតំបន់ដ៏ទូលំទូលាយនេះ។ យើងសង្ឃឹមថា ក្រុមអាជ្ញាធរតួកគី បញ្ចប់សកម្មភាពយោធាជាឯកតោភាគី ដោយមិនបានបំផ្លាញកិច្ចប្រឹងប្រែងរបស់ក្រុមចម្រុះប្រឆាំងនឹងក្រុម IS ឬ ក៏បង្កអស្ថិរភាពនៅស៊ីរីទេ»។
ប្រធានាធិបតីតួកគី លោក រ៉េសិបតៃយីប អេរដូហ្គែន បានថ្លែងកាលពីថ្ងៃពុធថា តួកគីគ្រោងចាប់ផ្តើមកិច្ចប្រតិបតិ្តការថ្មីនៅស៊ីរីក្នុងពេលប៉ុន្មានថ្ងៃនេះប្រឆាំងនឹងជនសកម្មប្រយុទ្ធ ការពារប្រជាជនឃើដ (YPG) ដែលមានការគាំទ្រពីក្រុងវ៉ាស៊ីនតោន ប៉ុន្តែក្រុងអង់ការ៉ាបានចាត់ទុកក្រុមជនសកម្មប្រយុទ្ធនោះជាក្រុមភេរវករ។
មន្ទីរបញ្ចកោណ បានព្រមានកាលពីថ្ងៃពុធថា សកម្មភាពយោធាឯកតោភាគីនៅស៊ីរីភាគខាងជើងនោះ មិនអាចទទួលយកបានទេ។
លោកស្រី Mogherini ដែលបានចាត់ទុកតួកគីជាអ្នកដើរតួដ៏សំខាន់មួយនៅក្នុងវិបត្តិនេះ និងក្នុងតំបន់នេះបានថ្លែងថា ការប្រយុទ្ធគ្នាប្រឆាំងនឹង IS កំពុងចូលដល់ដំណាក់កាលចុងក្រោយរបស់ខ្លួននោះ គ្រប់ភាគីទាំងអស់ ត្រូវតែធ្វើការរួមគ្នាដើម្បីសម្រេចគោលដៅយកឈ្នះក្រុម IS ទាំងស្រុង។
កិច្ចប្រតិបត្តិកាយោធាណាមួយប្រឆាំងនឹង YPG នឹងមានការលំបាកដោយសារលទ្ធភាពរបស់កងទ័ពក្រុងអង់ការ៉ា ដែលចេញមកប្រឈមជាមួយទាហានអាមេរិក ដែលត្រូវដាក់ពង្រាយជាមួយជនសកម្មប្រយុទ្ធឃើដ។
ទោះបីជាតួកគី និងអាមេរិកគឺជាសម្ព័ន្ធមិត្តរបស់អង្គការណាតូក្តីក៏ទំនាក់ទំនងការទូតរបស់ពួកគេ បានតានតឹងឡើងក្នុងរយៈពេលប៉ុន្មានឆ្នាំថ្មីៗនេះ ខណៈការជួយរបស់ក្រុងវ៉ាស៊ីនតោនដល់ក្រុមឃើដបានធ្វើឲ្យក្រុងអង់ការ៉ាផ្ទុះកំហឹង៕