ក្រុងយ៉ាំងហ្គោនៈ អ្នកស៊ើបអង្កេតសិទ្ធិមនុស្សអង្គការសហប្រជាជាតិបានថ្លែងថា ការកាត់ផ្តាច់ប្រព័ន្ធអ៊ីនធឺណិតនៅផ្នែកខ្លះនៃប្រទេសមីយ៉ាន់ម៉ា អាចជាការបិទបាំង «ការរំលោភសិទ្ធិមនុស្សទាំងស្រុង» នៅក្នុងតំបន់មួយ ជាទីដែលមានការបង្ក្រាបដោយយោធាយ៉ាងឃោរឃៅ បានបង្ខំឲ្យជនរ៉ូហ៊ីងយ៉ារាប់សែននាក់បានរត់ភៀសខ្លួន។
យោធាបានផ្តាច់អ៊ីនធឺណិតនៅក្នុងការប្រយុទ្ធជាមួយកងកម្លាំងអារ៉ាឃីន (AA) ជាក្រុមឧទ្ទាមដែលបានប្រយុទ្ធ ដើម្បីស្វ័យភាពឲ្យបានច្រើនជាងនេះ សម្រាប់ជនភាគតិចកាន់ ព្រះពុទ្ធសាសនានៅក្នុងតំបន់រដ្ឋរ៉ាក់ឃីន។
រដ្ឋាភិបាលកាលពីថ្ងៃសុក្រ បានចាត់វិធានការមិនធ្លាប់មានពីមុន ដោយបានបញ្ជាឲ្យក្រុមប្រតិបត្តិករទូរស័ព្ទចល័ត បិទទិន្នន័យអ៊ីនធឺណិតយ៉ាងហោចនៅក្នុងក្រុងចំនួន ៨ នៃរដ្ឋរ៉ាក់ឃីន និងមួយទៀតនៅក្នុងរដ្ឋឈីនដែលនៅជិតខាង។
អ្នករាយការណ៍ពិសេសអង្គការសហប្រជាជាតិប្រចាំនៅមីយ៉ាន់ម៉ា លោកស្រី Yanghee-Lee បានថ្លែងថា៖ «ខ្ញុំមានការព្រួយបារម្ភចំពោះជនស៊ីវិលទាំងអស់នៅទីនោះ» ដោយបានអំពាវនាវឲ្យដកការរឹតបន្តឹងទាំងអស់នោះជាបន្ទាន់។
លោកស្រីបានថ្លែងថា៖ «ប្រតិបត្តិការបោសសម្អាត» របស់យោធាអាចត្រូវបាន «ធ្វើឡើងដោយការរំលោភសិទ្ធិមនុសុ្សទាំងស្រុងប្រឆាំងក្រុមជនស៊ីវិល» ដោយបានថ្លែងអំពីការបង្ក្រាបយ៉ាងឃោរឃៅ ដែលរងការចោទប្រកាន់ប្រឆាំងជនមូស្លីមរ៉ូហ៊ីងយ៉ាកាលពីឆ្នាំ ២០១៧។
បទបញ្ជាឲ្យបិទអ៊ីនធឺណិត ត្រូវបានធ្វើឡើងនៅក្រោមច្បាប់ទូរគមនាគមន៍របស់ប្រទេស មីយ៉ាន់ម៉ា ដែលបានបង្កឲ្យមានការប៉ះពាល់ដល់ក្រុមអ្នកប្រើប្រាស់ទូរស័ព្ទចល័តទាំងអស់នៅទូទាំងប្រទេស៕ AFP/SK