បុរីញូវយ៉ក៖ អ្នកនាំពាក្យអង្គការសហប្រជាជាតិបានថ្លែងកាលពីថ្ងៃអង្គារថា ខណៈការរៀបចំការបែងចែកជំនួយសម្រាប់រដូវរងារ កំពុងដំណើរការសម្រាប់ផ្តល់ដល់ជនភៀសខ្លួនស៊ីរីប្រហែល ៩ សែននាក់ ដែលបានចាកចេញពីផ្ទះសំបែងរបស់ពួកគេដោយសារសង្គ្រាមនោះ អង្គការនេះ ត្រូវការជំនួយជាទឹកប្រាក់ប្រមាណ ៣២ លានដុល្លារ។
អ្នកនាំពាក្យឲ្យអគ្គលេខាធិការអង្គការសហប្រជាជាតិរបស់លោក អានតូនីញ៉ូ ហ្គាតឺររ៉េស គឺលោក ស្ទេបហ្វេន ឌូចារិក បានថ្លែងថា៖ «មនុស្សប្រហែល ៩ សែននាក់ នៅស៊ីរីភាគពាយព្យ ត្រូវបានគេរំពឹងថានឹងទទួលបានប្រាក់ពីអ្នកផ្តល់ជំនួយសម្រាប់រដូវរងានៅឆ្នាំនេះ» «ទោះបីជាយ៉ាងណាក៏ដោយ គឺមាន ៤០ ភាគរយ នៃចំនួនទឹកប្រាក់ប្រហែល ៣២ លានដុល្លារ ដែលនៅតែត្រូវការចាំបាច់បន្ថែមទៀត»។
លោក ឌូចារិក បានថ្លែងប្រាប់ក្រុមអ្នកឆ្លើយឆ្លងព័ត៌មាន នៅឯសន្និសីទកាសែតជាប្រចាំមួយថា យុទ្ធនាការបែងចែកជំនួយសម្រាប់រដូវរងា បានផ្តល់សម្លៀកបំពាក់ ភួយ ម៉ាស៊ីនកម្តៅ ចង្ក្រាន ម៉ាស៊ីនកម្តៅប្រើឥន្ទនៈ ពូក កម្រាលព្រំ និងកម្រាលប្លាស្ទិក ជូនដល់ពួកគេដែលត្រូវការជាចាំបាច់ សម្រាប់រដូវរងានៅពេលខាងមុខ។
លោកបានថ្លែងថា UN បានអំពាវនាវឲ្យក្រុមដៃគូទាំងអស់ ត្រូវធានាការការពារក្រុមជនស៊ីវិល និងហេដ្ឋារចនាសម្ព័ន្ធស៊ីវិល និងអនុញ្ញាតឲ្យមានប្រតិបត្តិការឆ្លើយតបរដូវរងា ដើម្បីអនុវត្តដោយសុវត្តិភាព គ្មានការរារាំង និងត្រូវទៅឲ្យដល់ពួកគេដែលត្រូវការជំនួយនោះ។
លោកស្រី មីលីសសា ហ្វ្លីមីង អ្នកនាំពាក្យទីភ្នាក់ងារជនភៀសខ្លួន UN (UNHCR) បានថ្លែងប្រាប់ក្រុមអ្នកកាសែតថា៖ «លក្ខខណ្ឌរដូវរងានៅស៊ីរីអាចត្រជាក់ខ្លាំង ជាពិសេសនៅទីជនបទ»៕ Xinhua/SK