.jpg)
ក្រុមឧត្តមសេនីយ៍យោធាជាន់ខ្ពស់ជួបប្រធានាធិបតីទើបតែងតាំងថ្មីលោក Win Mying (ស្តាំ ខ្នងបែរកកាមេរ៉ា)។ AFP
ក្រុងហ្សឺណែវៈ អ្នកស៊ើបអង្កេតអង្គការសហប្រជាជាតិម្នាក់ បានថ្លែងកាលពីថ្ងៃអង្គារថា កម្រិតនៃអំពើសាហាវព្រៃផ្សៃត្រូវបានប្រើប្រាស់ដោយយោធាមីយ៉ាន់ម៉ាប្រឆាំងនឹងជនភាគតិចរ៉ូហ៊ីងយ៉ា ពិបាកយល់ណាស់ ជាមួយនឹងរបាយការណ៍មិនអំណោយផល ដែលបានធ្វើការអំពាវនាវឲ្យក្រុមឧត្តមសេនីយ៍ជាន់ខ្ពស់ត្រូវបានគេកាត់ទោសពីបទប្រល័យពូជសាសន៍។
លោក Marzuki Darusman ដែលដឹកនាំបេសកកម្មស្វែងរកការពិតនៅក្នុងការរំលោភបំពាននៅក្នុងប្រទេសមីយ៉ាន់ម៉ា បានប្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិថា៖ «វាពិតជាពិបាកយល់ពីកម្រិតនៃអំពើព្រៃផ្សៃនៃកិច្ចប្រតិបត្តិការនៅខេត្ត Tatmadaw ដែលនេះ ពិតជាមិនបានយកចិត្តទុកដាក់ដល់ជីវិតជនស៊ីវិលឡើយ។
លោក បានបង្ហាញរបាយការណ៍ ៤៤៤ ទំព័រ ដែលលាតត្រដាងពីព័ត៌មានលម្អិតគួរឲ្យរន្ធត់នៃការរំលោភបំពានប្រព្រឹត្តដោយយោធាមានអំណាចនៅមីយ៉ាន់ម៉ា ជាពិសេសប្រឆាំងនឹងក្រុមជនមូស្លីមរ៉ូហ៊ីងយ៉ា។
ការបង្ក្រាបយ៉ាងសាហាវព្រៃផ្សៃរបស់យោធាកាលពីឆ្នាំទៅបានបង្ខំឲ្យរ៉ូហ៊ីងយ៉ា ៧០ ម៉ឺននាក់រត់ភៀសខ្លួនឆ្លងព្រំដែនទៅប្រទេសបង់ក្លាដែស។ ការទាមទាររកយុត្តិធម៌ មានការកើនឡើងជារៀងរាល់ថ្ងៃ។
កងទ័ពមីយ៉ាន់ម៉ា បានបដិសេធរាល់កំហុសទាំងអស់យ៉ាងដាច់អហង្ការ ដោយបានបញ្ជាក់ថា យុទ្ធនាការរបស់ខ្លួន មានភាពត្រឹមត្រូវ ក្នុងការបង្ក្រាបក្រុមអ្នកបះបោរ ដែលបានធ្វើការវាយប្រហារទៅលើប៉ុស្តិ៍នានាតាមព្រំដែននៅក្នុងខែសីហា ឆ្នាំ ២០១៧។
ប៉ុន្តែក្រុមអង្គការសហប្រជាជាតិ បាននិយាយថា យុទ្ធវិធីរបស់យោធាពិតជាមិនសមរម្យចំពោះការគំរាមកំហែងដល់សន្តិសុខនោះទេ។
ក្រុមជនជាតិភាគតិចរ៉ូហ៊ីងយ៉ាភៀសខ្លួនពីមីយ៉ាន់ម៉ាទៅប្រទេសបង់ក្លាដែស។ AFP
របាយការណ៍នោះ បានឲ្យដឹងថា តាមការប៉ាន់ប្រមាណមនុស្សប្រហែលមួយម៉ឺននាក់បានស្លាប់នៅក្នុងការបង្ក្រាបនោះ និងថា វាទំនងជាតួលេខនោះតិចតួចទេ។
នៅបទបង្ហាញរបស់លោកកាលពីថ្ងៃអង្គារលោក Darusman បានបញ្ជាក់លម្អិតអំពីការសម្លាប់រង្គាលនៅក្នុងភូមិរ៉ូហ៊ីងយ៉ាជាច្រើន ដោយបានធ្វើការពិពណ៌នាអំពីរបៀបដែលប្រជាជនមិនអាចគេចខ្លួន ត្រូវបានប្រមូលផ្តុំ និងត្រូវចាប់បំបែកដោយសារភេទ។ «បុរសៗ ត្រូវបានគេសម្លាប់ជាប្រព័ន្ធ។ ក្មេងៗត្រូវបានគេបាញ់បោះចូលទៅក្នុងទន្លេ ឬបោះចូលភ្លើងកំពុងឆេះ»។
នៅពេលជាមួយគ្នានោះដែរ ស្ត្រីជាច្រើន និងក្មេងស្រី ត្រូវបានទាហានចាប់រំលោភជាក្រុម៕
