ក្រុងហ្សឺណែវ៖ ប្រធានអង្គការសុខភាពពិភពលោកបានព្រមានថា ការអះអាងពីករណីឆ្លងវីរុសកូរ៉ូណា ដែលចម្លងដោយមនុស្សមិនធ្លាប់ធ្វើដំណើរទៅប្រទេស ចិន អាចជាភ័ស្តុតាងជាក់ស្តែងនៃបញ្ហាដ៏ធ្ងន់ធ្ងរ។
ការអធិប្បាយរបស់ លោក តេ្រដូស អាដហាណុម ហ្គេប្រ៊ីយេស៊ុស បានកើតឡើង ខណៈសមាជិកនៃបេសកកម្មរបស់អ្នកជំនាញអន្តរជាតិដឹកនាំដោយ WHO បានហោះហើរទៅកាន់ក្រុងប៉េកាំងកាលពីថ្ងៃចន្ទ ដើម្បីជួយសម្របសម្រួលការឆ្លើយតបមួយទៅនឹងការផ្ទុះវីរុសកូរ៉ូណាដែលរហូតមកទល់ពេលនេះ បានឆ្លងដល់មនុស្សជាង ៤ ម៊ឺននាក់ និងស្លាប់ ៩០៨ នាក់ នៅក្នុងប្រទេស ចិន។
លោក ហ្គេប្រ៊ីយេស៊ុស បានសរសេរនៅលើគេហទំព័រធ្វីធើរកាលពីថ្ងៃអាទិត្យដោយប្រើឈ្មោះវិទ្យាសាស្ត្របណ្តោះអាសន្នរបស់វីរុសផ្លូវដង្ហើមនេះថា៖ «មានការកើតឡើងនៃវីរុសកូរ៉ូណាឆ្នាំ ២០១៩ ពីមនុស្សដែលមិនមានប្រវត្តិទៅប្រទេស ចិន ទាល់តែសោះ»។
«ការរកឃើញករណីឆ្លងជាច្រើន អាចបង្ហាញឲ្យឃើញការឆ្លងរាលដាលកាន់តែច្រើនឡើងនៅក្នុងប្រទេសដទៃទៀតដោយនិយាយឲ្យខ្លីនោះយើងអាចមើលឃើញពីភ័ស្តុតាងជាក់ស្តែងនៃបញ្ហាដ៏ធ្ងន់ធ្ងរ»។
ខណៈដែលវីរុសនេះបានរាលដាលនៅក្រៅប្រទេស ចិន ហាក់ដូចជាយឺត លោក ហ្គេប្រ៊ីយេស៊ុស បានព្រមានថាវាអាចរាលដាលលឿន។
លោកបានថ្លែងថា៖ «ការទប់ស្កាត់នៅតែជាកម្មវត្ថុរបស់យើង ប៉ុន្តែប្រទេសទាំងអស់ត្រូវតែប្រើប្រាស់ឱកាសដែលបង្កើតឡើងដោយយុទ្ធសាស្ត្រទប់ស្កាត់ ត្រូវត្រៀមសម្រាប់លទ្ធភាពវីរុសនេះមកដល់»។
នៅក្រៅប្រទេស ចិនដីគោក មានអ្នកឆ្លងជាង ៣៥០ ករណី ដែលត្រូវបានរាយការណ៍នៅជិត ៣០ កន្លែង។ មានអ្នកស្លាប់ ២ នាក់ ម្នាក់នៅក្នុងប្រទេស ហ្វីលីពីន និងម្នាក់ទៀតនៅក្នុងក្រុងហុងកុង។
ប្រទេសជាច្រើនបានហាមប្រាមមិនមានមនុស្សចូលមកពីប្រទេស ចិន ខណៈក្រុមហ៊ុនអាកាសចរណ៍ធំៗ បានផ្អាកជើងហោះហើរហើយក្រុមហ៊ុនអាកាសចរណ៍ចិនបានលុបចោលជើងហោះហើររបស់ខ្លួនខ្លះទៅអាមេរិក។
លោក ហ្គេប្រ៊ីយេស៊ុស បានថ្លែងបេសកកម្មដឹកនាំដោយ WHO ទៅកាន់ប្រទេស ចិន កំពុងត្រូវបានដឹកនាំដោយលោក Bruce Aylward ជាអ្នកជំនាញនៃទីភ្នាក់ងារសុខភាពមុនៗ។ លោក Aylward បានតាមដានការឆ្លើយរបស់ WHO នៅក្នុងឆ្នាំ ២០១៤-២០១៦ ទៅនឹងការរាលដាលមេរោគអេបូឡា នៅក្នុងអាហ្វ្រិកខាងលិច។
WHO បាននិយាយថា ប៉ុន្មានថ្ងៃថ្មីៗនេះ មានករណីឆ្លងថ្មីមាននៅប្រទេស ចិន មានចំនួនថេរ។ ប៉ុន្តែទីភ្នាក់ងារថា UN ក្រើនរំឭកថាត្រូវរាយការណ៍ឲ្យបានឆាប់ បើសិនមានករណីឆ្លងវីរុសកូរ៉ូណា៕ AFP/PSA